ಕಂಡಕ್ಟರ್ ಒಬ್ಬರು ಬಸ್ಸಿನ ಮೇಲ್ಚಾವಣಿಗಿಂತ ಎತ್ತರವಿದ್ದ ಕಾರಣ ನಿರಂತರ ಅವರಿಗೆ ಬೆನ್ನು ಮತ್ತು ಕುತ್ತಿಗೆಯ ನೋವು ಕಾಡುತ್ತಿತ್ತು. ಹೀಗಾಗಿ ತೆಲಂಗಾಣ ಸಾರಿಗೆ ಇಲಾಖೆ ಕರುಣೆ ಕೆಲಸವನ್ನೇ ಬದಲಿಸಿದೆ.
ಯಸ್, ಸುಮಾರು 198 ಸೆಂಟಿಮೀಟರ್ (6 ಅಡಿ 6 ಇಂಚು) ಎತ್ತರವಿರುವ ಕಂಡಕ್ಟರ್ ಅಮೀನ್ ಅಹ್ಮದ್ ಅನ್ಸಾರಿ ಅವರಿಗೆ ಬಸ್ಸಿನ ಒಳಗಿನ ಇಕ್ಕಟ್ಟಾದ ಜಾಗದಲ್ಲಿ ಕೆಲಸ ಮಾಡುವುದು ಒಂದು ದೊಡ್ಡ ಶಿಕ್ಷೆಯಾಗಿತ್ತು. ಬಸ್ಸಿನ ಒಳಗೆ ನೇರವಾಗಿ ನಿಲ್ಲಲು ಸಾಧ್ಯವಾಗದ ಕಾರಣ, ಅವರು ಸದಾ ಕುತ್ತಿಗೆ ಬಗ್ಗಿಸಿಯೇ ಟಿಕೆಟ್ ನೀಡಬೇಕಿತ್ತು. ಈ ಕಾರಣದಿಂದಾಗಿ ಅವರು ತೀವ್ರವಾದ ಕುತ್ತಿಗೆ ಮತ್ತು ಬೆನ್ನು ನೋವಿನಿಂದ ಬಳಲುತ್ತಿದ್ದರು. ಏಪ್ರಿಲ್ 28 ರಂದು ಅವರ ತಾತ್ಕಾಲಿಕ ಬದಲಿ ಕರ್ತವ್ಯದ ಅವಧಿ ಮುಗಿದು ಮತ್ತೆ ಬಸ್ಸಿಗೆ ಮರಳಿದಾಗ, ಅವರ ನೋವು ಉಲ್ಬಣಿಸಿತ್ತು.
ಅನ್ಸಾರಿ ಅವರ ಈ ವಿಶೇಷ ಪರಿಸ್ಥಿತಿಯನ್ನು ಗಮನಿಸಿದ ತೆಲಂಗಾಣ ರಾಜ್ಯ ರಸ್ತೆ ಸಾರಿಗೆ ನಿಗಮವು (TGSRTC), ಮೇ 5 ರಂದು ಹೈದರಾಬಾದ್ನ ಬಸ್ ಭವನದಿಂದ ಅನ್ಸಾರಿ ಅವರಿಗೆ ಅವರ ಎತ್ತರಕ್ಕೆ ಪೂರಕವಾದ ಕರ್ತವ್ಯವನ್ನು ಮರು ನಿಯೋಜಿಸಲಾಗಿದೆ. ಇನ್ನು ಮುಂದೆ ಅವರನ್ನು ಬಸ್ ಪಾಸ್ ವಿಭಾಗಗಳಲ್ಲಿ ಅಥವಾ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಂತಹ ಕಚೇರಿ ಆಧಾರಿತ ಕೆಲಸಗಳಲ್ಲಿ ಬಳಸಿಕೊಳ್ಳಲು ನಿರ್ಧರಿಸಲಾಗಿದೆ. ನಿಗಮದ ಈ ಪ್ರಾಯೋಗಿಕ ನಿರ್ಧಾರವು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.