ಮಂಗಳೂರು: ದೇವರನ್ನು ತೋರಿಸುವುದಾಗಿ ವಶೀಕರಣದ ನಾಟಕ, ಹಣ ಲೂಟಿ: ಇಬ್ಬರು ಸನ್ಯಾಸಿಗಳ ಹಿಡಿದ ಟೆಂಪೋ ಚಾಲಕರು

ಮಂಗಳೂರು: ದೇವರನ್ನು ತೋರಿಸುವುದಾಗಿ ನಂಬಿಸಿ ವಶೀಕರಣದ ನಾಟಕ ಮಾಟಿ ಟೆಂಪೋ ಚಾಲಕರಿಂದ ಹಣ ಪೀಕಿಸುತ್ತಿದ್ದ ಸನ್ಯಾಸಿ ವೇಷಧಾರಿಗಳಾದ ಇಬ್ಬರನ್ನು ಸ್ಥಳೀಯರು ಹಿಡಿದು ಪೊಲೀಸರಿಗೆ ಒಪ್ಪಿಸಿದ ಘಟನೆ ಕಿನ್ನಿಗೋಳಿಯಲ್ಲಿ ನಡೆದಿದೆ. ತಂಡದಲ್ಲಿದ್ದ ಇನ್ನುಳಿದ ಇಬ್ಬರು ಪರಾರಿಯಾಗಿದ್ದಾರೆ.

Sponsored

ನಾಲ್ವರು ಸನ್ಯಾಸಿಗಳ ವೇಷ ಹಾಕಿಕೊಂಡು ಶನಿವಾರ ಬೆಳಗ್ಗಿನಿಂದಲೇ ಓಡಾಡುತ್ತಿದ್ದು, ನಂತರ ಕಿನ್ನಿಗೋಳಿ ಟೆಂಪೋ ಪಾರ್ಕ್‌ಗೆ ಬಂದ ಇವರು ಟೆಂಪೋ ಚಾಲಕನನ್ನು ಗುರಿಯಾಗಿಸಿ ವಂಚನೆಗೆ ಮುಂದಾಗಿದ್ದಾರೆ.

ಟೆಂಪೋ ಚಾಲಕರಿಗೆ ಯಾವುದೋ ವಸ್ತುವನ್ನು ನೀಡಿ ಮಾಯ ಮಾಡುವ ರೀತಿಯಲ್ಲಿ ಮ್ಯಾಜಿಕ್‌ ಮಾಡಿದ್ದಾರೆ. ನಂತರ ದೇವರನ್ನು ತೋರಿಸುವುದಾಗಿ ಹೇಳಿ, ನಿಮ್ಮ ಬಳಿ ಇರುವ ಹಣವನ್ನು ನೀವೇ ನಿಮ್ಮ ಕೈಯಾರೆ ನೀಡುವಂತೆ ಮಾಡುತ್ತೇವೆ ಎಂದು ನಂಬಿಸಿ, ಚಾಲಕರ ಕಿಸೆಯಲ್ಲಿದ್ದ ಹಣವನ್ನು ಎಗರಿಸಿದ್ದಾರೆ.

ಟೆಂಪೋ ಚಾಲಕರಿಗೆ ತಾವು ಮೋಸ ಹೋಗಿರುವುದಾಗಿ ತಿಳಿದು ಹಣ ಎಗರಿಸಿದ ತಂಡದ ಇಬ್ಬರನ್ನು ಕಿನ್ನಿಗೋಳಿಯ ಚರ್ಚ್‌ ಸಮೀಪ ಇರುವ ಕುರಿತು ಮಾಹಿತಿ ಪಡೆದು, ಅವರನ್ನು ಹಿಡಿದಿದ್ದಾರೆ. ಈ ಸಂದರ್ಭ ತಂಡದ ಇಬ್ಬರು ಪರಾರಿಯಾಗಿದ್ದಾರೆ. ಉಳಿದ ಇಬ್ಬರನ್ನು ಮೂಲ್ಕಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಸನ್ಯಾಸಿಗಳ ವೇಷ ಧರಿಸಿ ಸಾರ್ವಜನಿಕರನ್ನು ನಂಬಿಸಿ ಹಣ ದೋಚುವ ಕೃತ್ಯದಲ್ಲಿ ತೊಡಗಿದ್ದ ಇಬ್ಬರಿಗೆ ಪೊಲೀಸರು ಎಚ್ಚರಿಕೆ ನೀಡಿ ಕಳುಹಿಸಿದ್ದಾರೆ.