ಭಟ್ಕಳ: ದೈವಿಕ ಶಕ್ತಿಯ ಅಚ್ಚರಿಯ ಘಟನೆ: ಹರಕೆ ಹೊತ್ತ ಕ್ಷಣದಲ್ಲೇ ಪತ್ತೆಯಾದ ‘ಭೈರವ’ ನಂದಿ!
Sponsored
Sponsoredಭಟ್ಕಳ: ಭಟ್ಕಳದಲ್ಲಿ ದೈವಿಕ ಶಕ್ತಿಯೊಂದಕ್ಕೆ ಸಾಕ್ಷಿಯಾದ ಅಚ್ಚರಿಯ ಘಟನೆಯೊಂದು ನಡೆದಿದೆ. ಗೋಶಾಲೆಯಿಂದ ನಡುರಾತ್ರಿಯಲ್ಲಿ ನಾಪತ್ತೆಯಾಗಿದ್ದ ‘ಭೈರವ’ ಎಂಬ ಹೆಸರಿನ ನಂದಿ, ಮಾಲೀಕರು ಮುರುಡೇಶ್ವರ ದೇವರಿಗೆ ಹರಿಕೆ ಹೊತ್ತ ಕೆಲವೇ ಕ್ಷಣಗಳಲ್ಲಿ ಪತ್ತೆಯಾಗಿದ್ದು, ಭಕ್ತರಲ್ಲಿ ಭಕ್ತಿಭಾವವನ್ನು ಇಮ್ಮಡಿಗೊಳಿಸಿದೆ.
ಘಟನೆಯ ವಿವರ: ಭಟ್ಕಳದ ‘ದೇನು ಆತಿಥ್ಯ ವಸತಿ ಗೃಹ’ದ ಗೋಶಾಲೆಯಲ್ಲಿ ಭೈರವ ನಂದಿಯನ್ನು ಕಟ್ಟಿಹಾಕಲಾಗಿತ್ತು. ರಾತ್ರಿಯ ವೇಳೆ ಹಗ್ಗ ಬಿಚ್ಚಿಕೊಂಡು ನಂದಿ ಹೊರಹೋಗಿದ್ದು, ಬೆಳಿಗ್ಗೆ ಮಾಲೀಕ ಯೋಗೇಶ ಭಟ್ಟ ಅವರಿಗೆ ನಂದಿ ಕಾಣದಿರುವುದು ಆತಂಕವನ್ನುಂಟುಮಾಡಿತು. ಸುತ್ತಮುತ್ತಲ ಪ್ರದೇಶಗಳಲ್ಲಿ ತೀವ್ರ ಹುಡುಕಾಟ ನಡೆಸಿದರೂ ಯಾವುದೇ ಸುಳಿವು ಸಿಗಲಿಲ್ಲ. ಕೊನೆಗೆ ಪೊಲೀಸರಿಗೆ ದೂರು ನೀಡಲಾಯಿತು, ಆದರೆ ತಕ್ಷಣಕ್ಕೆ ನಂದಿ ಪತ್ತೆಯಾಗಲಿಲ್ಲ.
ಎಲ್ಲಾ ಪ್ರಯತ್ನಗಳು ವಿಫಲವಾದಾಗ ಕಂಗಾಲಾದ ಯೋಗೇಶ ಭಟ್ಟರು, ಅಂತಿಮವಾಗಿ ಮುರುಡೇಶ್ವರ ದೇವರ ಮೊರೆ ಹೋದರು. ದೇವಸ್ಥಾನದಲ್ಲಿ ಕಾಯಿ ಇಟ್ಟು, “ನನ್ನ ಭೈರವ ಸುರಕ್ಷಿತವಾಗಿ ಸಿಕ್ಕರೆ, ದೇವಸ್ಥಾನಕ್ಕೆ 11 ಸುತ್ತು ಪ್ರದಕ್ಷಿಣೆ ಹಾಕುತ್ತೇನೆ” ಎಂದು ಭಕ್ತಿಯಿಂದ ಹರಿಕೆ ಹೊತ್ತು ಪ್ರಾರ್ಥಿಸಿದರು.
ಅಚ್ಚರಿಯೆಂದರೆ, ದೇವರಿಗೆ ಪ್ರಾರ್ಥನೆ ಸಲ್ಲಿಸಿ ಹೊರಬರುತ್ತಿದ್ದಂತೆಯೇ, ಭೈರವ ಪತ್ತೆಯಾದ ಸಿಹಿಸುದ್ದಿ ಅವರನ್ನು ಅರಸಿ ಬಂತು. ಪೊಲೀಸರು ವಿವಿಧೆಡೆಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ, ನಂದಿಯ ಜಾಡು ಹಿಡಿದು ಅದನ್ನು ಪತ್ತೆಹಚ್ಚಿ ಸುರಕ್ಷಿತವಾಗಿ ಕರೆತರುವಲ್ಲಿ ಯಶಸ್ವಿಯಾಗಿದ್ದರು.
ತಮ್ಮ ಪ್ರಾರ್ಥನೆಗೆ ದೇವರು ತಕ್ಷಣವೇ ಸ್ಪಂದಿಸಿದ್ದರಿಂದ ಭಾವುಕರಾದ ಯೋಗೇಶ ಭಟ್ಟರು, ಹರಿಕೆಯಂತೆ ಭೈರವ ನಂದಿಯೊಂದಿಗೆ ದೇವಸ್ಥಾನಕ್ಕೆ 11 ಸುತ್ತು ಪ್ರದಕ್ಷಿಣೆ ಹಾಕಿದರು. ಅರ್ಚಕರ ಮೂಲಕ ದೇವರಿಗೆ ಕಾಯಿ ಅರ್ಪಿಸಿ ವಿಶೇಷ ಪೂಜೆ ಸಲ್ಲಿಸಿದರು. ದೇವಸ್ಥಾನದ ಅರ್ಚಕರು ಭೈರವನಿಗೆ ಹೂವಿನ ಹಾರ ಹಾಕಿ ಗೌರವಿಸಿದರೆ, ನೆರೆದಿದ್ದ ಭಕ್ತರು ಬಾಳೆಹಣ್ಣು ನೀಡಿ ನಮಸ್ಕರಿಸಿದರು.
ದೇವರ ಮಹಿಮೆಯಿಂದಲೇ ನಾಪತ್ತೆಯಾಗಿದ್ದ ನಂದಿ ಮರಳಿ ಸಿಕ್ಕಿದೆ ಎಂಬ ಮಾತು ಈಗ ಭಕ್ತರ ಬಾಯಲ್ಲಿ ಹರಿದಾಡುತ್ತಿದ್ದು, ಈ ಘಟನೆಯು ದೈವಭಕ್ತಿಯ ಶಕ್ತಿಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.




