ಗುರುವಾರ, 19 ನವೆಂಬರ್ 2026

ಬದಲಾಗಲಿದೆ ಜಗತ್ತಿನ ಧಾರ್ಮಿಕ ಭೂಪಟ: 2035ಕ್ಕೆ ಇಸ್ಲಾಂ ವಿಶ್ವದ ಅತಿ ದೊಡ್ಡ ಧರ್ಮ

Advertisement
Advertisement

ಪ್ಯೂ ರಿಸರ್ಚ್ ಸೆಂಟರ್ ಬಿಡುಗಡೆ ಮಾಡಿರುವ ‘The Future of World Religions: Population Growth Projections, 2020-2070’ ವರದಿಯ ಪ್ರಕಾರ, 2020ರಿಂದ 2070ರ ನಡುವೆ ವಿಶ್ವದ ಒಟ್ಟು ಜನಸಂಖ್ಯೆಯು ಶೇ. 29ರಷ್ಟು ಹೆಚ್ಚಾಗಲಿದೆ. 2035 ರ ವೇಳೆಗೆ ಇಸ್ಲಾಂ ಧರ್ಮವು ಕ್ರೈಸ್ತ ಧರ್ಮವನ್ನು ಹಿಂದಿಕ್ಕಿ ಜಗತ್ತಿನ ಅತಿದೊಡ್ಡ ಧರ್ಮವಾಗಿ ಹೊರಹೊಮ್ಮಲಿದೆ ಎಂದು ಪ್ಯೂ ಸಂಶೋಧನಾ ಕೇಂದ್ರವು ಅಂದಾಜು ತಿಳಿಸಿದೆ. ಅಲ್ಲದೇ ಜಾಗತಿ ಜನಸಂಖ್ಯೆಯಲ್ಲಿ ಹಿಂದೂಗಳು ಮತ್ತು ಯಹೂದಿಗಳ ಪ್ರಮಾಣ ಕಡಿಮೆಯಾಗುವ ಸಾಧ್ಯತೆಯಿದೆ ಎಂದು ವರದಿ ಹೇಳಿದೆ.

Sponsored

1. ಇಸ್ಲಾಂ ಧರ್ಮದ ವೇಗದ ಬೆಳವಣಿಗೆ ಮತ್ತು ಅಗ್ರಸ್ಥಾನ
2020ರಲ್ಲಿ ವಿಶ್ವದ ಒಟ್ಟು ಜನಸಂಖ್ಯೆಯಲ್ಲಿ ಸುಮಾರು ಶೇ. 25-26ರಷ್ಟಿದ್ದ ಮುಸ್ಲಿಮರ ಪಾಲು, 2070ರ ವೇಳೆಗೆ ಶೇ. 35.8ಕ್ಕೆ (ಸುಮಾರು ಶೇ. 36) ಏರಿಕೆಯಾಗಲಿದೆ. 2020ರಿಂದ 2070ರ ನಡುವೆ ಮುಸ್ಲಿಂ ಜನಸಂಖ್ಯೆಯು ಬರೋಬ್ಬರಿ ಶೇ. 80ರಷ್ಟು ವೃದ್ಧಿಯಾಗಿ, ಒಟ್ಟು ಸಂಖ್ಯೆ 3.64 ಬಿಲಿಯನ್ (364 ಕೋಟಿ) ತಲುಪಲಿದೆ. ಅಂದರೆ, ಈ ಅವಧಿಯಲ್ಲಿ ವಿಶ್ವದ ಇತರ ಎಲ್ಲಾ ಧರ್ಮಗಳ ಒಟ್ಟು ಜನಸಂಖ್ಯಾ ಬೆಳವಣಿಗೆಗಿಂತ ಮುಸ್ಲಿಂ ಜನಸಂಖ್ಯೆಯ ಬೆಳವಣಿಗೆಯೇ ಹೆಚ್ಚಿರಲಿದೆ. ಇದೇ ವೇಗದಲ್ಲಿ ಮುಂದುವರಿದರೆ 2035ರ ವೇಳೆಗೆ ಇಸ್ಲಾಂ ಕ್ರೈಸ್ತ ಧರ್ಮವನ್ನು ಹಿಂದಿಕ್ಕಿ ವಿಶ್ವದ ಅತಿ ದೊಡ್ಡ ಧರ್ಮವಾಗಲಿದೆ. ಇದಕ್ಕೆ ಮುಖ್ಯ ಕಾರಣ ಮುಸ್ಲಿಂ ಮಹಿಳೆಯರಲ್ಲಿ ಹೆಚ್ಚಿನ ಜನನ ಪ್ರಮಾಣ ಎಂದು ಪ್ಯೂ ವರದಿ ತಿಳಿಸಿದೆ.

Advertisement
Advertisement

    ​2. ಕ್ರೈಸ್ತ ಧರ್ಮದ ಸ್ಥಿರತೆ ಮತ್ತು ಸ್ಥಾನಪಲ್ಲಟ
    ಶತಮಾನಗಳಿಂದ ವಿಶ್ವದ ಅತಿ ದೊಡ್ಡ ಧರ್ಮವಾಗಿರುವ ಕ್ರೈಸ್ತ ಧರ್ಮದ ಒಟ್ಟು ಜನಸಂಖ್ಯೆ 2020ರಿಂದ 2070ರ ನಡುವೆ ಶೇ. 30ರಷ್ಟು ಹೆಚ್ಚಾಗಿ ಸುಮಾರು 3 ಬಿಲಿಯನ್ (300 ಕೋಟಿ) ತಲುಪಲಿದೆ. ಆದರೆ, ಜಾಗತಿಕ ಜನಸಂಖ್ಯೆಯಲ್ಲಿ ಅದರ ಪಾಲು 2020ರಲ್ಲಿದ್ದ ಶೇ. 31ರಿಂದ 2070ರ ವೇಳೆಗೆ ಶೇ. 29.1ಕ್ಕೆ ತುಸು ಇಳಿಕೆಯಾಗಲಿದೆ. ವಿಶೇಷವೆಂದರೆ, ಯುರೋಪ್ ಮತ್ತು ಉತ್ತರ ಅಮೆರಿಕದಲ್ಲಿ ಕ್ರೈಸ್ತರ ಸಂಖ್ಯೆ ಕುಸಿದು ಅವರು ಬಹುಮತ ಕಳೆದುಕೊಳ್ಳಲಿದ್ದು, 2070ರ ವೇಳೆಗೆ ವಿಶ್ವದ ಅರ್ಧಕ್ಕಿಂತ ಹೆಚ್ಚು ಕ್ರೈಸ್ತರು ಉಪ-ಸಹಾರನ್ ಆಫ್ರಿಕಾ ಭಾಗದಲ್ಲಿ ವಾಸಿಸಲಿದ್ದಾರೆ.

    Advertisement

    ​3. ಹಿಂದೂಗಳ ಜನಸಂಖ್ಯೆ ಏರಿಕೆ, ಆದರೆ ಪಾಲಿನಲ್ಲಿ ಇಳಿಕೆ
    ಜಾಗತಿಕವಾಗಿ ಹಿಂದೂಗಳ ಒಟ್ಟು ಜನಸಂಖ್ಯೆಯು 2020ರಲ್ಲಿದ್ದ 1.2 ಬಿಲಿಯನ್ (120 ಕೋಟಿ) ನಿಂದ 2070ರ ವೇಳೆಗೆ ಶೇ. 17ರಷ್ಟು ಬೆಳವಣಿಗೆ ಕಂಡು 1.4 ಬಿಲಿಯನ್ (140 ಕೋಟಿ) ತಲುಪಲಿದೆ. ಆದರೆ, ಇತರ ಧರ್ಮಗಳಿಗೆ (ವಿಶೇಷವಾಗಿ ಮುಸ್ಲಿಮರಿಗೆ) ಹೋಲಿಸಿದರೆ ಹಿಂದೂಗಳ ಜನಸಂಖ್ಯಾ ಬೆಳವಣಿಗೆಯ ದರ ಕಡಿಮೆ ಇರುವುದರಿಂದ, ವಿಶ್ವದ ಒಟ್ಟು ಜನಸಂಖ್ಯೆಯಲ್ಲಿ ಹಿಂದೂಗಳ ಪಾಲು ಶೇ. 15ರಿಂದ ಶೇ. 13.6ಕ್ಕೆ ಇಳಿಕೆಯಾಗಲಿದೆ.

    ​4. ಯಾವುದೇ ಧರ್ಮವಿಲ್ಲದವರ ಪಾಲು ಕುಸಿತ
    ಅಮೆರಿಕ ಮತ್ತು ಯುರೋಪ್‌ನಂತಹ ಪಾಶ್ಚಿಮಾತ್ಯ ದೇಶಗಳಲ್ಲಿ ಯಾವುದೇ ಧರ್ಮವನ್ನು ಅನುಸರಿಸದವರ (ನಾಸ್ತಿಕರು/ಅಜ್ಞೇಯತಾವಾದಿಗಳು) ಸಂಖ್ಯೆ ಗಣನೀಯವಾಗಿ ಹೆಚ್ಚಾಗುತ್ತಿದೆ. ಆದರೂ, ಜಾಗತಿಕ ಮಟ್ಟದಲ್ಲಿ ಇವರ ಪಾಲು 2020ರಲ್ಲಿದ್ದ ಶೇ. 24ರಿಂದ 2070ರ ವೇಳೆಗೆ ಶೇ. 17ಕ್ಕೆ ಕುಸಿಯಲಿದೆ. ವಿಶ್ವದ ಅತಿ ಹೆಚ್ಚು ಧರ್ಮರಹಿತ ಜನಸಂಖ್ಯೆಯನ್ನು ಹೊಂದಿರುವ ಚೀನಾದ ಒಟ್ಟು ಜನಸಂಖ್ಯೆಯಲ್ಲಿ ಭಾರಿ ಇಳಿಕೆಯಾಗುತ್ತಿರುವುದೇ ಈ ಜಾಗತಿಕ ಕುಸಿತಕ್ಕೆ ಪ್ರಮುಖ ಕಾರಣವಾಗಿದೆ.
    ​
    5. ಬೌದ್ಧ ಮತ್ತು ಯಹೂದಿ ಧರ್ಮಗಳ ಸ್ಥಿತಿಗತಿ
    ​ಬೌದ್ಧ ಧರ್ಮ: 2020ರಲ್ಲಿ ಶೇ. 6.6ರಷ್ಟಿದ್ದ ಬೌದ್ಧರ ಪಾಲು 2070ರ ವೇಳೆಗೆ ತೀವ್ರವಾಗಿ ಕುಸಿಯಲಿದೆ. ಬೌದ್ಧರು ಹೆಚ್ಚಾಗಿರುವ ಚೀನಾ, ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳಲ್ಲಿ ಜನಸಂಖ್ಯೆ ಕುಸಿಯುತ್ತಿರುವುದರಿಂದ ಬೌದ್ಧರ ಒಟ್ಟು ಸಂಖ್ಯೆ ಮತ್ತು ಜಾಗತಿಕ ಪಾಲು ಎರಡೂ ಇಳಿಕೆಯಾಗಲಿವೆ.

    ​ಯಹೂದಿ ಧರ್ಮ: ಯಹೂದಿಗಳ ಒಟ್ಟು ಜನಸಂಖ್ಯೆ 1.5 ಕೋಟಿಯಿಂದ 1.8 ಕೋಟಿಗೆ ಏರಿಕೆಯಾದರೂ, ಜಾಗತಿಕ ಜನಸಂಖ್ಯೆಯಲ್ಲಿ ಅವರ ಪಾಲು ಶೇ. 0.19ರಿಂದ ಶೇ. 0.17ಕ್ಕೆ ತುಸು ಕಡಿಮೆಯಾಗಲಿದೆ. 2070ರ ವೇಳೆಗೆ ವಿಶ್ವದ ಶೇ. 62ರಷ್ಟು ಯಹೂದಿಗಳು ಇಸ್ರೇಲ್‌ನಲ್ಲಿಯೇ ವಾಸಿಸಲಿದ್ದಾರೆ.

    Advertisement
    Advertisement