ನೀಲಿ ಡ್ರಮ್ಮಿನಲ್ಲಿತ್ತು ಕೆಂಪು ನೆತ್ತರು!

ಲಕ್ನೋ: ನೀಲಿ ಬಣ್ಣದ ಡ್ರಮ್ಮಿನಲ್ಲಿ ಹಸಿ-ಬಿಸಿ ಕೆಂಪು ರಕ್ತ ಬೆರೆಸಿ ಕಲಸಿದ ಪತ್ನಿ ಮತ್ತು ಪ್ರಿಯಕರನಿಗೆ ಕೋರ್ಟು ಗಲ್ಲು ಶಿಕ್ಷೆ ನೀಡಿದೆ.
ಮರ್ಚೆಂಟ್‌ ನೇವಿ ಅಧಿಕಾರಿಯಾಗಿದ್ದ ಪತಿ ಸೌರಭ್‌ ರಜಪೂತ್‌ ನನ್ನು ಆತನ ಪತ್ನಿ ಮುಸ್ಕಾನ್‌ ಮತ್ತು ಆಕೆಯ ಪ್ರಿಯಕರ ಸಾಹಿಲ್‌ ಸೇರಿ ಭೀಕರವಾಗಿ ಹತ್ಯೆ ಮಾಡಿದ್ದರು. ಇದೀಗ 13 ತಿಂಗಳ ಸುದೀರ್ಘ ವಿಚಾರಣೆ ಮುಗಿದು, ಮುಸ್ಕಾನ್–ಸಾಹಿಲ್ ದೋಷಿ ಎಂದು ಕೋರ್ಟ್ ಘೋಷಿಸಿದೆ. ಬೆಳಗಬೇಕಾದ ಮನೆಯಲ್ಲಿ ಕತ್ತಲು ಉರಿಸಿದ ಹಂತಕಿ ಪತ್ನಿಯ ಕೈಯಲ್ಲಿ ಸೌರಭ ಹತ್ಯೆ ಹೇಗಾಯಿತು? ಆ ರಹಸ್ಯ ಬಿಚ್ಚಿಡುವ ಇಂಟರೆಸ್ಟಿಂಗ್ ಕಥೆ ವಾರದ ಈ ಕ್ರೈಂ ಸ್ಟೋರಿಯಲ್ಲಿ.

Sponsored

‘ಫ್ಲೈದುಬೈ’ ನಲ್ಲಿ ನಡೆದಿತ್ತು ‘ಡೆತ್ ಗೇಮ್’

Advertisement

Advertisement

ಸೌರಭ್ ರಜಪೂತ್ ಮರ್ಚೆಂಟ್ ನೇವಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದರು. ಅದು 2025ರ ಮಾರ್ಚ್‌. ಸೌರಭ್ ರಜಪೂತ್ ಮರ್ಚೆಂಟ್ ನೇವಿ ಅಧಿಕಾರಿಯಾಗಿದ್ದರಿಂದ, ತಮ್ಮ ವೃತ್ತಿಯ ನಿಮಿತ್ತ ಲಂಡನ್‌ಗೆ ಹೋಗಿದ್ದರು. ಲಂಡನ್‌’ನಿಂದ ರಜೆ ಮೇಲೆ ಫೆಬ್ರವರಿ 24, 2025 ರಂದು ಅವರು ಭಾರತಕ್ಕೆ ಮರಳಿದ್ದರು. ಮರುದಿನವೇ, ಅಂದರೆ ಫೆಬ್ರವರಿ 25 ರಂದು ಪತ್ನಿ ಮುಸ್ಕಾನ್ ರಸ್ತೋಗಿ ಜನ್ಮ ದಿನವಿತ್ತು. ಮಗಳ ಹುಟ್ಟಿದ ಹಬ್ಬ ಕೂಡಾ ಕೆಲವೇ ದಿನಗಳ ದೂರದಲ್ಲಿತ್ತು. ಪತ್ನಿಯ ಹುಟ್ಟುಹಬ್ಬ ಮತ್ತು ಮಗಳಿಗೆ ಸರ್ಪ್ರೈಸ್ ನೀಡಲು ಆತ ರಜೆಯ ಮೇಲೆ ಖುಷಿಯಾಗಿ ಮೀರತ್‌ನ ಮನೆಗೆ ಬಂದಿದ್ದರು. ಅಲ್ಲಿ ಕಾಯಬೇಕಾದವರೇ ಯಮನಾಗಿ ಕಾದಿದ್ದಳು.

*ಹೇಗಾಯಿತು ಹತ್ಯೆ?*

ಮರ್ಚೆಂಟ್ ನೇವಿ ಅಧಿಕಾರಿ ಸೌರಭ್ ರಾಜ್‌ಪುತ್’ರನ್ನು ಕೊಲ್ಲಲು ಆತನ ಪತ್ನಿ ಮುಸ್ಕಾನ್ ಮತ್ತು ಆಕೆಯ ಪ್ರಿಯಕರ ಸಾಹಿಲ್ ಶುಕ್ಲಾ ಮುಂಚಿತವಾಗಿಯೇ ಭೀಕರ ಸ್ಕೆಚ್ ಹಾಕಿದ್ದರು. ಅದು ಲಂಡನ್‌ನಿಂದ ಮರಳಿದ 9 ನೆಯ ದಿನ. ಯಾವ ಅರಿವೂ ಇಲ್ಲದ ಸೌರಭ್ ಪತ್ನಿ ಮಗಳ ಜತೆ ರಜೆಯ ಮೂಡಿನಲ್ಲಿದ್ದ. 2025ರ ಮಾರ್ಚ್ 3 ರಂದು, ಕೊಲೆಯ ಮೊದಲ ಭಾಗವಾಗಿ ಸೌರಭ್ ನ ಊಟದಲ್ಲಿ ಪತ್ನಿ ಮುಸ್ಕಾನ್ ಅಂಗೈ ತುಂಬಾ ನಿದ್ರೆ ಮಾತ್ರೆಗಳನ್ನು ಮುರಿದು ಬೆರೆಸಿದ್ದಾಳೆ. ಆತನಿಗೆ ಗಾಢವಾಗಿ ನಿದ್ರೆ ಬಂದಿದೆ, ಜೊತೆಗೆ ಪ್ರಜ್ಞೆ ಕೂಡ ತಪ್ಪಿದೆ.

ಪ್ರಜ್ಞಾಹೀನನಾಗಿ ಬಿದ್ದವವನ್ನು ಕೊಲ್ಲುವುದು ಎಷ್ಟು ಕಷ್ಟ ಹೇಳಿ? ಗಾಢ ನಿದ್ರೆಗೆ ಜಾರಿದ ತಕ್ಷಣ, ಮುಸ್ಕಾನ್ ಮಚ್ಚನ್ನು ಎತ್ತಿಕೊಂಡಿದ್ದಾಳೆ. ಮೂರು ಬಾರಿ ಇರಿದಿದ್ದಾಳೆ, ಹಾಗೂ ಬ್ಲೇಡ್‌ನಿಂದ ಸೌರಭ್ ಗಂಟಲನ್ನು ಗೀರಿದ್ದಾಳೆ. ಒಂದು ಕಾಲದಲ್ಲಿ ಪ್ರೀತಿಸಿ, ಆತನ ಕೊರಳಿಗೆ ಜೋತು ಬಿದ್ದು ರಮಿಸಿದ್ದ ಹುಡುಗಿ ಅವತ್ತು ಅದೇ ಕೊರಳಿಗೆ ಕೈ ಹಾಕಿದ್ದಳು. ಹತ್ಯೆಯ ಬಳಿಕ ಮನೆಗೆ ಬಂದ ಸಾಹಿಲ್ ಶುಕ್ಲಾ ತಲೆ ಮತ್ತು ದೇಹವನ್ನು ಬೇರ್ಪಡಿಸಿದ್ದಾನೆ. ಇಬ್ಬರೂ ಸೇರಿ ಶವವನ್ನು ಒಟ್ಟು 15 ತುಂಡುಗಳಾಗಿ ಕತ್ತರಿಸಿದ್ದಾರೆ.

*ನೀಲಿ ಡ್ರಮ್‌ನಲ್ಲಿ ಕಾಂಕ್ರೀಟ್ ಲಾಕ್*

ಅಲ್ಲಿಗೆ ಕೊಲೆಯೇನೋ ಯಶಸ್ವಿಯಾಗಿ ಮುಗಿದಿತ್ತು. ಲೀಟರ್ ಗಟ್ಟಲೆ ರಕ್ತ ಬಿಸಿ ಬಸಿದ ಸೌರಭ ದೇಹ ತಣ್ಣಗಾಯಿತು. ಆದರೆ ಅಲ್ಲಿ ಶುರುವಾಗಿತ್ತು ಅಸಲಿ ಪೀಕಲಾಟ. ಸಾಮಾನ್ಯವಾಗಿ ಹತ್ಯೆಗಳು ಸುಲಭವಾಗಿ ನಡೆದು ಹೋಗುತ್ತವೆ. ನಂತರ, ಎಲ್ಲಾ ಕೊಲೆಗಳಲ್ಲಿ ತಲೆದೋರುವ ಶವ ವಿಲೇವಾರಿ ಸಮಸ್ಯೆ ಅವರಿಗೂ ಎದುರಾಗಿದೆ. ಆರಂಭದಲ್ಲಿ ಶವದ ತುಂಡುಗಳನ್ನು ಡ್ರಮ್‌ನಲ್ಲಿಟ್ಟು ಅದರ ಮೇಲೆ ಮಣ್ಣು ಮಗುಚಿ ಹಾಕಿ ಸುಂದರ ಗಿಡ ಅರಳಿಸುವ ಪ್ಲಾನ್ ಅವರಿಗಿತ್ತು. ಆದರೆ ಶವ ಕೊಳೆತು ವಾಸನೆ ಬಂದೀತು ಎಂದು ಹೆದರಿ ಪ್ಲಾನ್ ಬದಲಾಯಿಸಿದರು.

ಕೊಲೆ ನಂತರ ಅವರು ಮಾರುಕಟ್ಟೆಗೆ ತೆರಳಿ ಇನ್ನೂರು ಲೀಟರ್ ಸಾಮರ್ಥ್ಯದ ದೊಡ್ಡ ನೀಲಿ ಬಣ್ಣದ ಹೆಚ್ ಡಿಪಿಇ ಡ್ರಮ್ ತಂದರು. ಸೌರಭ್ ದೇಹದ 15 ತುಂಡುಗಳನ್ನು ಅದರೊಳಗೆ ತುರುಕಿದರು. ನಂತರ ದುರ್ವಾಸನೆ ಹೊರ ಬರಬಾರದು, ಶವ ಪತ್ತೆಯಾಗಬಾರದು ಎಂದು ಅದರೊಳಗೆ ಸಿಮೆಂಟ್, ಮರಳು ಮತ್ತು ನೀರನ್ನು ಸುರಿದು ಕಲಸಿ ಮೇಸ್ತ್ರಿಯಂತೆ ಶವದ ಮೇಲೆ ಗಾರೆ ಕೆಲಸ ಶುರು ಮಾಡಿಕೊಂಡರು. ಕೆಲವೇ ಗಂಟೆಗಳಲ್ಲಿ ಕಾಂಕ್ರೀಟ್ ಗಟ್ಟಿಯಾಯಿತು. ಇನ್ನೇನು ಯಾರಿಂದಲೂ ಗುಟ್ಟು ಬಿಚ್ಚಿಡಲು ಸಾಧ್ಯವಿಲ್ಲ ಎಂದು ಬಗೆದ ಜೋಡಿ ಅದೇ ಖುಷಿಯಲ್ಲಿ ಸಂಭ್ರಮಿಸಲು ಹೊರಟಿತು.

*ಕೃತ್ಯದ ಬಳಿಕ ಶಿಮ್ಲಾ-ಮನಾಲಿ ಟ್ರಿಪ್!*

ಹತ್ಯೆಯ ಮರುದಿನವೇ ಆರೋಪಿಗಳಿಬ್ಬರು ಸೌರಭ್‌ನ ಮೊಬೈಲ್ ಫೋನನ್ನು ತೆಗೆದುಕೊಂಡು ಶಿಮ್ಲಾ, ಮನಾಲಿ ಪ್ರವಾಸಕ್ಕೆ ತೆರಳಿದರು. ಸೌರಭ್ ಬದುಕಿದ್ದಾನೆ ಎಂದು ಎಲ್ಲರನ್ನೂ ನಂಬಿಸಲು, ಆತನ ಫೋನ್‌ನಿಂದಲೇ ಆತನ ಕುಟುಂಬದವರಿಗೆ “ನಾನು ಬಿಸಿನೆಸ್ ಟ್ರಿಪ್‌ನಲ್ಲಿದ್ದೇನೆ” ಎಂದು ಮುಸ್ಕಾನ್ ಮೆಸೇಜ್ ಕಳುಹಿಸುತ್ತಿದ್ದಳು. ಮತ್ತು ಸೋಶಿಯಲ್ ಮೀಡಿಯಾದಲ್ಲಿ ಆತನ ಅಕೌಂಟಿನಿಂದ ಪೋಸ್ಟ್ ಮಾಡುತ್ತಿದ್ದಳು.

ಮೊದಮೊದಲು ಸೌರಭ್ ನನ್ನು ಕೊಲ್ಲುವ ಯೋಜನೆಗೆ ಸಾಹಿಲ್ ಒಪ್ಪಿರಲಿಲ್ಲ. ಮುಸ್ಕಾನ್ ಮೇಲೆ ಪ್ರೀತಿ ಎಷ್ಟಿದ್ದರೂ, ಆಕೆ ಆತನಿಗೆ ತನ್ನ ಸರ್ವಸ್ವವನ್ನು ಬಿಚ್ಚಿಟ್ಟಿದ್ದರೂ ಕೊಲೆ ಅಂತ ಬಂದಾಗ ಆತ ಹಿಂಜರಿಯುತ್ತಿದ್ದ. ಆಗ ಮಸ್ಕಾನ್ ಹೊಸ ಕಥೆ ಹೆಣೆಯುತ್ತಾಳೆ: ಅದೀಗ ಸಾಹಿಲ್ ಮತ್ತು ಮುಸ್ಕಾನ್ ಅನ್ನು ನೇಣು ಮುಂದೆ ತಂದು ನಿಲ್ಲಿಸಿದೆ.

‘ಫ್ಲೈದುಬೈ’ ನಲ್ಲಿ ನಡೆದಿತ್ತು ‘ಡೆತ್ ಗೇಮ್’

ಮುಸ್ಕಾನ್ ತನ್ನ ಪ್ರಿಯಕರನನ್ನು ಕೊಲೆಗೆ ಒಪ್ಪಿಸಲು ಸತ್ತ ತಾಯಿಯ ಹೆಸರಿನಲ್ಲಿ ಸ್ನ್ಯಾಪ್‌ಚಾಟ್ ಸಂದೇಶ ಸೃಷ್ಟಿಸಿದ್ದಳು. ಸಾಹಿಲ್ ಶುಕ್ಲಾನನ್ನು ಕೊಲೆಗೆ ಒಪ್ಪಿಸಲು ಮತ್ತು ಅವನನ್ನು ತನ್ನ ಹತೋಟಿಯಲ್ಲಿಟ್ಟುಕೊಳ್ಳಲು ಅತ್ಯಂತ ಆಘಾತಕಾರಿ ಮತ್ತು ತಾಂತ್ರಿಕ ಸಂಚನ್ನು ಆಕೆ ರೂಪಿಸಿದ್ದಳು. ತನಿಖೆಯಲ್ಲಿ ಬಹಿರಂಗವಾದ ಸಂಚಿನ ರೋಚಕ ವಿವರಗಳು ಪೊಲೀಸರನ್ನು ಬೆಚ್ಚಿ ಬೀಳಿಸಿದ್ದವು.

*ಸತ್ತ ತಾಯಿಯ ಆತ್ಮದ ನಾಟಕ*

ಸಾಹಿಲ್ ಶುಕ್ಲಾನ ತಾಯಿ ಕೆಲವು ವರ್ಷಗಳ ಹಿಂದೆಯೇ ತೀರಿಕೊಂಡಿದ್ದರು. ಸಾಹಿಲ್ ಮೂಢನಂಬಿಕೆಗಳು, ಪುನರ್ಜನ್ಮ, ಮಾಟ-ಮಂತ್ರಗಳನ್ನು ಬಲವಾಗಿ ನಂಬುತ್ತಿದ್ದ. ಅವನ ಈ ದೌರ್ಬಲ್ಯವನ್ನು ಬಳಸಿಕೊಂಡ ಮುಸ್ಕಾನ್, ತನ್ನೊಳಗೆ ಸಾಹಿಲ್‌ನ ಸತ್ತ ತಾಯಿಯ ಆತ್ಮ ಆವಾಹನೆಯಾಗಿದೆ ಎಂದಳು. ಮುಸ್ಕಾನ್ ಸ್ನ್ಯಾಪ್‌ ಚಾಟ್‌ನಲ್ಲಿ ತನ್ನ ಹೆಸರಿನ ಖಾತೆ ಮಾತ್ರವಲ್ಲದೆ, ಸಾಹಿಲ್‌ನ ಸತ್ತ ತಾಯಿ ಮತ್ತು ಆಕೆಯ ಕಿರಿಯ ಸಹೋದರನ ಹೆಸರಿನಲ್ಲಿ ಒಟ್ಟು ಮೂರು ನಕಲಿ ಪ್ರೊಫೈಲ್‌ಗಳನ್ನು ತೆರೆದಿದ್ದಳು. ಬೇರೆ ಬೇರೆ ವ್ಯಕ್ತಿಗಳಂತೆ ನಟಿಸುತ್ತಾ ಸಾಹಿಲ್ ಜೊತೆ ಚಾಟ್ ಮಾಡುತ್ತಿದ್ದಳು. ಸತ್ತ ತಾಯಿಯ ಹೆಸರಿನ ಖಾತೆಯಿಂದ ಸಾಹಿಲ್‌ಗೆ ಸಂದೇಶಗಳನ್ನು ಕಳುಹಿಸಿ, “ಸೌರಭ್ ನಿನ್ನ ಕೈಯಿಂದಲೇ ಸಾಯಬೇಕಿರುವುದು ವಿಧಿಯ ಆಟ” ಎಂದು ಬ್ರೈನ್ ವಾಶ್ ಮಾಡಿದ್ದಳು.

*ತಾಯಿಯ ಆದೇಶವೆಂದು ಕೊಲೆಗೆ ಪ್ರಚೋದನೆ*

ತಾಯಿಯ ಆತ್ಮವೇ ತನಗೆ ಆದೇಶ ನೀಡುತ್ತಿದೆ ಎಂದು ಭಾವಿಸಿದ ಸಾಹಿಲ್, ಮುಸ್ಕಾನ್ ಹೇಳಿದುದ್ದನ್ನೆಲ್ಲಾ ದೇವರ ಆಜ್ಞೆಯಂತೆ ಕೇಳತೊಡಗಿದ. “ಸೌರಭ್ ಬದುಕಿದ್ದರೆ ನಮ್ಮಿಬ್ಬರ ಪ್ರೀತಿ ಒಂದಾಗಲು ಸಾಧ್ಯವಿಲ್ಲ, ಆದ್ದರಿಂದ ಅವನನ್ನು ಕೊಲ್ಲುವುದೇ ತಾಯಿಯ ಇಚ್ಛೆ” ಎಂದು ಮುಸ್ಕಾನ್ ನಕಲಿ ಸಂದೇಶಗಳ ಮೂಲಕ ಸಾಹಿಲ್‌ನನ್ನು ಸಂಪೂರ್ಣವಾಗಿ ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡು, ಕೊಲೆ ಮಾಡಲು ಒಪ್ಪಿಸಿದ್ದಳು.

“ರಹಸ್ಯ ಬಯಲಾಗಿದ್ದು ಹೇಗೆ?*

ಸೌರಭ್ ಗೆ ಸತತವಾಗಿ ಕರೆ ಮಾಡಿದರೂ ಆತ ಸಿಗದೇ ಇದ್ದಾಗ ಅನುಮಾನಗೊಂಡ ಆತನ ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಿದ್ದರು. 2025ರ ಮಾರ್ಚ್ 17 ರಂದು ಪೊಲೀಸರು ಮತ್ತು ಸಂಬಂಧಿಕರು ಮೀರತ್‌ನ ಇಂದ್ರನಗರದಲ್ಲಿರುವ ಸೌರಭ್ ಮನೆಗೆ ಬೀಗ ಒಡೆದು ತಪಾಸಣೆಗೆ ಬಂದಿದ್ದರು.

ಆ ಸಮಯದಲ್ಲಿ ಸೌರಭ್ ಮತ್ತು ಮುಸ್ಕಾನ್ ಅವರ 6 ವರ್ಷದ ಹೆಣ್ಣು ಮಗಳು ನೆರೆಹೊರೆಯವರ ಬಳಿ ಅಮಾಯಕಳಾಗಿ “ಪಪ್ಪಾ ಡ್ರಮ್ ಒಳಗಡೆ ಇದ್ದಾರೆ” ಎಂದು ಮುಗ್ಧವಾಗಿ ಹೇಳಿದ್ದಾಳೆ. ನೀಲಿ ಡ್ರಮ್ ನ ರಹಸ್ಯ ಅರ್ಧ ಬಿಚ್ಚಿಕೊಂಡಿದೆ. ತಕ್ಷಣ ಪೊಲೀಸರು ಮನೆಯಲ್ಲಿದ್ದ ನೀಲಿ ಡ್ರಮ್ ನ್ನು ಕತ್ತರಿಸಿ ನೋಡಿದಾಗ ಕಾಂಕ್ರೀಟ್ ಒಳಗೆ ಹೂತು ಹೋಗಿದ್ದ ಸೌರಭ್ ಹತ್ಯೆ ಪೂರ್ತಿಯಾಗಿ ತೆರೆದುಕೊಂಡಿದೆ.

*ಜೈಲಿನಲ್ಲೇ ಆಗಿತ್ತು ಎರಡನೆಯ ಹೆರಿಗೆ*

ಮುಸ್ಕಾನ್ ಅರೆಸ್ಟ್ ಆದದ್ದು ಮಾರ್ಚ್ 19 ರಂದು. ಆಕೆ ಜೈಲಿನಲ್ಲಿ, ನವೆಂಬರ್ 24ರಂದು ಹೆಣ್ಣು ಮಗುವನ್ನು ಹೆರುತ್ತಾಳೆ. ಅಂದರೆ, ಅರೆಸ್ಟ್ ಆಗುವ ಮೊದಲೇ ಆಕೆ ಒಂದು ಅಥವಾ ಒಂದೂವರೆ ತಿಂಗಳ ಗರ್ಭಿಣಿಯಾಗಿದ್ದಳು. ಆದರೆ ಆಕೆ ಗರ್ಭಿಣಿ ಆಗಬೇಕಾದ ಸಮಯದಲ್ಲಿ ಪತಿ ಲಂಡನ್ ನಲ್ಲಿದ್ದ. ‘ಹಿರಿ ಮಗಳನ್ನು ನಾವು ಸಾಕಲು ತಯಾರಾಗಿದ್ದೇವೆ. ಆದರೆ ಈಗ ಹುಟ್ಟಿದ ಮಗು ಸೌರಭ್ ಆಗಿದ್ದರೆ ಮಾತ್ರ ದತ್ತು ತೆಗೆದುಕೊಳ್ಳುತ್ತೇವೆ. ಅದರ ಡಿಎನ್ಎ ಪರೀಕ್ಷೆ ನಡೆಯಲಿ’ ಎಂದು ಸೌರಭ್ ಕುಟುಂಬ ಒತ್ತಾಯಿಸಿದೆ. ಇದರ ಮಧ್ಯೆ ನಡೆದ ವಿಚಿತ್ರ ಏನೆಂದರೆ, ಆಕೆಯ ಎರಡನೆಯ ಮಗುವಿನ ಜನನ ಸೌರಬ್ ಹುಟ್ಟಿದ ದಿನವೇ ನಡೆದದ್ದು!

*ಕೋರ್ಟ್ ನೀಡಿದ ತೀರ್ಪು*

ಬಂಧನದ ಬಳಿಕ ಈ ಪ್ರಕರಣ 13 ತಿಂಗಳುಗಳ ಕಾಲ ಸುದೀರ್ಘ ವಿಚಾರಣೆ ನಡೆಯಿತು. ಪ್ರಮುಖವಾಗಿ ಇವರಿಬ್ಬರಿಗೆ ಡ್ರಮ್, ಸಿಮೆಂಟ್, ಮರಳು, ಮಾದಕ ಮಾತ್ರೆ ಹಾಗೂ ಕೊಲೆಗೆ ಬಳಸಿದ ಕತ್ತಿ- ಬ್ಲೇಡ್‌ಗಳನ್ನು ಮಾರಾಟ ಮಾಡಿದ್ದ ಸ್ಥಳೀಯ ಅಂಗಡಿಯವರು ಕೋರ್ಟ್‌ನಲ್ಲಿ ಬಂದು ಪ್ರಮುಖ ಸಾಕ್ಷಿ ನುಡಿದರು. ಒಟ್ಟು 22 ಸಾಕ್ಷಿಗಳನ್ನು ವಿಚಾರಣೆ ನಡೆಸಿದ ನಂತರ ಮೀರತ್ ನ್ಯಾಯಾಲಯವು ಮರಣದಂಡನೆ ವಿಧಿಸಿದೆ.

ತನಿಖೆಯ ಪ್ರಕಾರ, ಸೌರಭ್’ಗೆ ಪತ್ನಿಯ ಅನೈತಿಕ ಸಂಬಂಧದ ಬಗ್ಗೆ ಮೊದಲೇ ತಿಳಿದಿತ್ತು. ಆದರೂ ಮಗಳ ಭವಿಷ್ಯಕ್ಕಾಗಿ ಸಂಸಾರವನ್ನು ಉಳಿಸಿಕೊಳ್ಳಲು ನಿರ್ಧರಿಸಿ, 2023ರಲ್ಲಿ ಲಂಡನ್’ಗೆ ಮರು ಪ್ರಯಾಣ ಬೆಳೆಸಿದ್ದರು. ಆದರೆ ಪತ್ನಿ ಮುಸ್ಕಾನ್ ತನ್ನ ಪ್ರಿಯಕರ ಸಾಹಿಲ್‌ಗೆ ಕೂಡಾ ಸಾಕಷ್ಟು ಸುಳ್ಳು ಹೇಳಿದ್ದಳು. ಸೌರಭ್ “ಲಂಡನ್‌ನ ಬೇಕರಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದಾನೆ” ಎಂದು ಹೇಳಿ ಆತನ ದಾರಿ ತಪ್ಪಿಸಿ ಈಗ ಗಲ್ಲು ಕಂಬದ ದಾರಿಯಲ್ಲಿ ಆತನನ್ನು ಕೈಹಿಡಿದು ನಡೆಸಿದ್ದಾಳೆ. ಅಪರೂಪದಲ್ಲಿ ಅಪರೂಪದ ಪ್ರಕರಣ ಎಂದು ಹೇಳಿದ ನ್ಯಾಯಾಧೀಶರು ‘ಅಧರ್ಮದ ದಾರಿಯಲ್ಲಿ ಹೋಗುವವರನ್ನು ಶಿಕ್ಷಿಸುವುದೇ ಧರ್ಮ’ ಎಂದು ಮಹಾಭಾರತದ ಸಾಲನ್ನು ಉಲ್ಲೇಖಿಸಿದ್ದಾರೆ.
ಪತ್ನಿಯ ಅನೈತಿಕ ವ್ಯವಹಾರವನ್ನು ಕ್ಷಮಿಸಿ, ಮಗಳಿಗಾಗಿ ಹೊಂದಿಕೊಂಡು ಬಾಳುತ್ತಿದ್ದ ಅಮಾಯಕ ಪತಿಯ ಕುತ್ತಿಗೆ ಸೀಳಿ ಉಸಿರು ನಿಲ್ಲಿಸಿದ ಆಕೆಯ ಕೊರಳಿಗೆ ಹಗ್ಗದ ಉರುಳು ಕಾದಿದೆ. ಸಿಮೆಂಟ್‌ನಲ್ಲಿ ಸತ್ಯವನ್ನು ಮುಚ್ಚಿದವರಿಗೆ, ನ್ಯಾಯವು ನೇಣಿನ ರೂಪದಲ್ಲಿ ಮರಳಿ ಬಂದಿದೆ. ಕರ್ಮ ರಿಟರ್ನ್ಸ್ ಅಂದರೆ ಇದೇನಾ?