ಪರೀಕ್ಷೆಯಲ್ಲಿ ಜಯಭೇರಿ: 9ನೇ ತರಗತಿ ವಿದ್ಯಾರ್ಥಿಗೆ ಕೋಟಿ ಮೌಲ್ಯದ BMW ಕಾರು ಗಿಫ್ಟ್ ಕೊಟ್ಟ ತಂದೆ!

ಮಕ್ಕಳು ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿದಾಗ ಸೈಕಲ್, ಮೊಬೈಲ್ ಅಥವಾ ಸಣ್ಣಪುಟ್ಟ ಉಡುಗೊರೆಗಳನ್ನು ನೀಡುವುದು ಸಾಮಾನ್ಯ. ಆದರೆ, ಪಶ್ಚಿಮ ಬಂಗಾಳದಲ್ಲಿ ತಂದೆಯೊಬ್ಬರು ತಮ್ಮ ಮಗ 9ನೇ ತರಗತಿ ಪರೀಕ್ಷೆಯಲ್ಲಿ ಉತ್ತಮ ಅಂಕಗಳಿಸಿದ ಖುಷಿಗೆ ಬರೋಬ್ಬರಿ ₹1.62 ಕೋಟಿ ಮೌಲ್ಯದ ಐಷಾರಾಮಿ BMW M4 ಸ್ಪೋರ್ಟ್ಸ್ ಕಾರನ್ನು ಗಿಫ್ಟ್ ಆಗಿ ನೀಡಿ ಅಚ್ಚರಿಗೊಳಿಸಿದ್ದಾರೆ.

Sponsored

Instagram

ಪಶ್ಚಿಮ ಬಂಗಾಳದ ಪೂರ್ವ ಬರ್ಧಮಾನ್ ಜಿಲ್ಲೆಯ ಗಲ್ಸಿ ಪ್ರದೇಶದ ಪರಾಜ್ ಗ್ರಾಮದ 15 ವರ್ಷದ ಮೊಹಮ್ಮದ್ ತಲ್ಹಾ ಎಂಬ 9ನೇ ತರಗತಿ ವಿದ್ಯಾರ್ಥಿಗೆ ಈ ಅದ್ಭುತ ಉಡುಗೊರೆ ಸಿಕ್ಕಿದೆ. ವಿದ್ಯಾರ್ಥಿಯ ತಂದೆ ಶಂಸುದ್ದೀನ್ ಮಿದ್ಯ ಒಬ್ಬ ಉದ್ಯಮಿ ಹಾಗೂ ಮಿಲ್ ಮಾಲೀಕರಾಗಿದ್ದು, ತಮ್ಮ ಮಗನ ಬಹುದಿನದ ಕನಸನ್ನು ನುಡಿಸುವ ಮೂಲಕ ಈ ದೊಡ್ಡ ಗಿಫ್ಟ್ ನೀಡಿದ್ದಾರೆ.
​
ಮೊಹಮ್ಮದ್ ತಲ್ಹಾಗೆ BMW M4 ಕಾರು ಎಂದರೆ ಅಚ್ಚುಮೆಚ್ಚು. ಈ ಕುರಿತು ಆತ ತನ್ನ ತಂದೆಯಲ್ಲಿ ಆಸೆ ವ್ಯಕ್ತಪಡಿಸಿದ್ದ. ಮಗನ ಆಸೆಯನ್ನು ಗಮನಿಸಿದ್ದ ತಂದೆ, ‘ಅರ್ಧವಾರ್ಷಿಕ ಪರೀಕ್ಷೆಯಲ್ಲಿ ಉತ್ತಮ ಅಂಕಗಳಿಸಿ ಪಾಸ್ ಆದರೆ ನಿನಗೆ ಈ ಕಾರು ಕೊಡಿಸುವುದಾಗಿ’ ಮಾತು ಕೊಟ್ಟಿದ್ದರು.

ಮಗ ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿ ತಂದೆಯ ಭರವಸೆಯನ್ನು ಉಳಿಸಿಕೊಂಡಾಗ, ತಂದೆ ಮುಂಬೈಗೆ ತೆರಳಿ ಅಲ್ಲಿನ ಅಂಧೇರಿ ಶೋರೂಮ್‌ನಿಂದ BMW M4 Competition ಕಾರನ್ನು ಖರೀದಿಸಿದರು. ನಂತರ ಆ ಕಾರನ್ನು ವಿಶೇಷ ಕಂಟೇನರ್‌ನಲ್ಲಿ ಪಶ್ಚಿಮ ಬಂಗಾಳದ ತಮ್ಮ ಗ್ರಾಮಕ್ಕೆ ತಲುಪಿಸಿದರು.
​
ನವೆಂಬರ್ 6 ರಂದು ಕಾರು ಗ್ರಾಮಕ್ಕೆ ಬಂದಾಗ ಅದನ್ನು ಕಣ್ತುಂಬಿಕೊಳ್ಳಲು ಸ್ಥಳೀಯರು ಮತ್ತು ಸಾರ್ವಜನಿಕರು ದೊಡ್ಡ ಸಂಖ್ಯೆಯಲ್ಲಿ ಜಮಾಯಿಸಿದ್ದರು. ಈ ಐಷಾರಾಮಿ ಕಾರು ತಂದೆಯ ಗ್ಯಾರೇಜ್‌ನಲ್ಲಿರುವ ರೇಂಜ್ ರೋವರ್ ಆಟೋಬಯೋಗ್ರಫಿ, ಮರ್ಸಿಡಿಸ್ ಬೆನ್ಸ್‌ ಮುಂತಾದ ವಾಹನಗಳ ಸಂಗ್ರಹಕ್ಕೆ ಹೊಸ ಸೇರ್ಪಡೆಯಾಗಿದೆ.

ತಲ್ಹಾಗೆ ಇನ್ನೂ 15 ವರ್ಷ ವಯಸ್ಸಾಗಿರುವುದರಿಂದ, ಭಾರತೀಯ ಕಾನೂನಿನ ಪ್ರಕಾರ ಆತನಿಗೆ ಡ್ರೈವಿಂಗ್ ಲೈಸೆನ್ಸ್ ಸಿಗುವುದಿಲ್ಲ. ಹೀಗಾಗಿ, ಲೈಸೆನ್ಸ್ ಬರುವವರೆಗೆ ತಾನು ಕಾರನ್ನು ಸ್ವತಃ ಚಾಲನೆ ಮಾಡುವುದಿಲ್ಲಂದೂ, ಕೇವಲ ಪ್ಯಾಸೆಂಜರ್ ಸೀಟ್‌ನಲ್ಲಿ ಕುಳಿತುಕೊಂಡು ವಾರಕ್ಕೊಮ್ಮೆ ತಂದೆಯೊಂದಿಗೆ ಪ್ರಯಾಣಿಸುವುದಾಗಿ ಹಾಗೂ ಓದಿನ ಕಡೆಗೂ ಗಮನಹರಿಸುವುದಾಗಿ ಬಾಲಕ ತಿಳಿಸಿದ್ದಾನೆ.
​
ಮಗನ ಪರಿಶ್ರಮವನ್ನು ಗುರುತಿಸಿ ತಂದೆ ಪ್ರೋತ್ಸಾಹಿಸಿರುವುದನ್ನು ಕೆಲವರು ಮೆಚ್ಚಿಕೊಂಡರೆ, ಇನ್ನು ಕೆಲವರು 9ನೇ ಕ್ಲಾಸ್ ಮಗನಿಗೆ ಇಷ್ಟೊಂದು ಕೋಟಿ ಬೆಲೆಬಾಳುವ ದುಬಾರಿ ಕಾರನ್ನು ಉಡುಗೊರೆಯಾಗಿ ನೀಡುವುದು ಎಷ್ಟು ಸರಿ ಎಂದು ಪ್ರಶ್ನಿಸುತ್ತಿದ್ದಾರೆ. ಒಟ್ಟಿನಲ್ಲಿ ಈ ಸುದ್ದಿ ಈಗ ದೇಶಾದ್ಯಂತ ಭಾರೀ ವೈರಲ್ ಆಗಿದ್ದು, ಚರ್ಚೆಗೆ ಗ್ರಾಸವಾಗಿದೆ.