‘ಫ್ಲೈದುಬೈ’ ನಲ್ಲಿ ನಡೆದಿತ್ತು ‘ಡೆತ್ ಗೇಮ್’

ಸೆಪ್ಟೆಂಬರ್ 30, 2026. ದುಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬೆಳಗ್ಗೆ 6:05ರ ಸಮಯ. ‘ಫ್ಲೈದುಬೈ FZ1073’ ಎಂಬ ವಿಮಾನವು ಇಸ್ರೇಲ್ ರಾಜಧಾನಿ ಟೆಲ್ ಅವಿವ್ ಕಡೆಗೆ ಸಾಗುವ ದಾರಿಯಲ್ಲಿ ರನ್‌ವೇ ಮೇಲೆ ಜಾರುತ್ತಾ ಸಾಗಿ ಆಗಸಕ್ಕೆ ರೆಕ್ಕೆ ಬೀಸಿತು. ಮುಂಜಾನೆಯ ಇಂಟರ್ನ್ಯಾಷನಲ್ ಪ್ರಯಾಣವಾದ ಕಾರಣ ಕಾರಣ ನಸುಕಿನ ನಿದ್ದೆ ತೊರೆದು ಯಾತ್ರಿಗಳು ವಿಮಾನ ನಿಲ್ದಾಣಕ್ಕೆ ಒಂದಷ್ಟು ಮುಂಚಿತವಾಗಿ ಧಾವಿಸಿದ್ದರು. ವಿಮಾನ ಆಗಸಕ್ಕೆ ಎಗರಿ ಅರ್ಧಗಂಟೆಯಲ್ಲಿ ಆರಂಭಿಕ ಅಲ್ಲಾಡುವಿಕೆ ನಿಂತು ಪ್ರಯಾಣ ಸಹಜ ಸ್ಥಿತಿಗೆ ಬಂದಿತ್ತು. ಅಷ್ಟರಲ್ಲಿ ಗಗನಸಖಿ ಬಂದು ಸುರಕ್ಷತಾ ಪ್ರೋಟೋಕಾಲ್ ನಿರ್ವಹಿಸಿ ಆಗ ತಾನೇ ನಿರ್ಗಮಿಸಿದ್ದಳು.

Sponsored

ನೀಲಿ ಡ್ರಮ್ಮಿನಲ್ಲಿತ್ತು ಕೆಂಪು ನೆತ್ತರು!

Advertisement

Advertisement

ವಿಮಾನದಲ್ಲಿದ್ದ 172 ಪ್ರಯಾಣಿಕರು ನೆಮ್ಮದಿಯಿಂದ ಸಣ್ಣ ತೂಕಡಿಕೆಗೆ ಇಳಿದಿದ್ದರು. ಆದರೆ, ಕಾಕ್‌ಪಿಟ್‌ನಲ್ಲಿ ಕುಳಿತಿದ್ದ ಒಮಾನ್ ಮೂಲದ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ ಮನಸ್ಸಿನಲ್ಲಿ ಎದೆ ನಡುಗಿಸುವ ಕ್ರಿಮಿನಲ್ ಪ್ಲಾನ್ ಸುರುಳಿ ಸುತ್ತಿಕೊಂಡು ಸೂಕ್ತ ಸಮಯಕ್ಕಾಗಿ ಹೊಂಚು ಹಾಕಿ ಕಾಯುತ್ತಿದ್ದ. ದುಬೈನಿಂದ ವಿಮಾನ ಇನ್ನಷ್ಟು ದೂರ ಹೋಗಬೇಕು ಮತ್ತು ಅದು ಇಸ್ರೇಲ್ ಗಡಿಯನ್ನು ಪ್ರವೇಶಿಸಬಾರದು: ಅದರ ಮಧ್ಯೆ ಬರುವ ಸೌದಿ ಅರೇಬಿಯಾದ ಗಡಿಯ ಅಂಚಿನಲ್ಲಿ ವಿಮಾನವನ್ನು ಕೈಗೆ ತೆಗೆದುಕೊಳ್ಳಬೇಕು. ಅಲ್ಲಿಂದ ಕೇವಲ 400 ಮೈಲಿಗಳಲ್ಲೇ ಇದೆ ಇಸ್ರೇಲ್. ಅಲ್ಲಿಗೆ ವಿಮಾನವನ್ನು ತಿರುಗಿಸಿ ಅಲ್ಲಿನ ಬಹುಮಹಡಿ ಕಟ್ಟಡವೊಂದರ ಮೇಲೆ ಅಮೆರಿಕಾ ಟ್ವಿನ್ ಟವರ್ ಅಟ್ಯಾಕ್ ಮಾದರಿಯಲ್ಲಿ ಅಟ್ಯಾಕ್ ಮಾಡಿದರೆ ಅಲ್ಲಿಗೆ ಜೀವನ ಸಾರ್ಥಕವಾಗುತ್ತದೆ; ತಾನು ಹುತಾತ್ಮನಾಗುತ್ತೇನೆ. ಜಿಹಾದಿ ಹೋರಾಟ ಜಾಗೃತವಾಗಿ ಉಳಿಯುತ್ತದೆ ಅನ್ನುವ ಪ್ಲಾನ್ ನಲ್ಲಿದ್ದ ಆ ಸಹ ಪೈಲೆಟ್. ಭಾರತೀಯ ಮೂಲದ ಮುಖ್ಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ವಿಮಾನ ಓಡಿಸುತ್ತಿದ್ದರೆ, ಹಮ್ಮಾಮಿ ಸಮಯ 8.30 ಆಗುವುದಕ್ಕೆ ಮೌನವಾಗಿ ಕಾಯುತ್ತಿದ್ದ.

ಕಾಕ್‌ಪಿಟ್‌ನಲ್ಲಿ ರಕ್ತಪಾತ

ಬೆಳಗ್ಗೆ ಸಮಯ 8:30 ಸಮೀಪಿಸಿತು. ಆಗ ವಿಮಾನವು ಸೌದಿ ಅರೇಬಿಯಾದ ವಾಯು ಪ್ರದೇಶದ ಅಂಚಿನಲ್ಲಿ ಸಾಗುತ್ತಿತ್ತು. ಇನ್ನೊಂದು ನೂರು ಕಿಲೋಮೀಟರ್ ದಾಟಿದರೆ ಜೋರ್ಡಾನಿನ ವಾಯು ಮಾರ್ಗ ಪ್ರವೇಶವಾಗುತ್ತದೆ. ಆಗ ಭೂಮಿಯಿಂದ ಬರೋಬ್ಬರಿ 33,000 ಅಡಿ ಎತ್ತರದಲ್ಲಿ ವಿಮಾನ ತೇಲುತ್ತಿತ್ತು. ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಕಾಲು ಚಾಚಿ ಕುಳಿತು ಫ್ಲೈಟ್ ಅನ್ನು ಅಟೋ ಮೋಡಿಗೆ ಹಾಕಿ ಒಂದಷ್ಟು ನಿರಾಳವಾಗಿದ್ದರು. ಆಗ ಹಿಂಬದಿಯಿಂದ ತಲೆಗೆ ಬಿತ್ತು ಹಮಾಮ್ ಮೊದಲ ಹೊಡೆತ.

ಸಹ-ಪೈಲಟ್ ಹಮಾಮ್ ದಿಢೀರನೆ ಎದ್ದು ನಿಂತು, ವಿಮಾನದಲ್ಲಿದ್ದ ತುರ್ತು ಕೊಡಲಿ ಮತ್ತು ಚಾಕುವನ್ನು ಕೈಗೆತ್ತಿಕೊಂಡಿದ್ದ. ಯಾವುದೇ ಮುನ್ಸೂಚನೆ ಇಲ್ಲದೆ ಕ್ಯಾಪ್ಟನ್ ಸ್ಮಿತ್ ತಲೆಗೆ ಬಡಿದು ಮತ್ತು ಕುತ್ತಿಗೆಯ ಭಾಗಕ್ಕೆ ಕೊಡಲಿಯಿಂದ ಭೀಕರವಾಗಿ ಚುಚ್ಚಿದ. ಕ್ಯಾಪ್ಟನ್ ಸ್ಮಿತ್ ಈ ಊಹಿಸದ ಆಘಾತದಿಂದ ರಕ್ತ ಒಸರುತ್ತಾ ಕುಸಿದು ಬಿದ್ದರೆ, ವಿಮಾನದ ಕಂಟ್ರೋಲ್ ಹಮಾಮ್ ಕೈವಶವಾಗಿತ್ತು.

6 ವರ್ಷದ ಬಾಲಕಿ ಮತ್ತು ವಾಶ್‌ರೂಮ್ ರಹಸ್ಯ!

ಅದೇ ಸಮಯಕ್ಕೆ ಈ ಇಡೀ ರಹಸ್ಯ ಸಂಚನ್ನು ಬಯಲಿಗೆಳೆದು 172 ಜನರ ಪ್ರಾಣ ಉಳಿಸಲು ಅತ್ಯಂತ ಪ್ರಮುಖ ಕಾರಣವಾದದ್ದು ಓರ್ವ ಪುಟಾಣಿ ಹುಡುಗಿಯ ವಾಶ್‌ರೂಮ್’ಗೆ ಹೋಗಬೇಕೆನ್ನುವ ಹಠ.

ಅತ್ತ ಸ್ಮಿತ್ ಮಚ್ಚರ್ ತಲೆಗೆ ಹಮಾಮ್ ಹ್ಯಾಮರ್ ತೆಗೆದುಕೊಂಡು ಬಡಿಯುವ ಸಂದರ್ಭದಲ್ಲಿ, ಇಸ್ರೇಲಿನ 6 ವರ್ಷದ ಬಾಲಕಿ ನೀನಾ ಮಾನೆಸ್ ತನ್ನ ತಾಯಿ ತಲಿ ಬೆರ್ಕೊವಿಚ್ ಮಾನೆಸ್ ಬಳಿ ತನಗೆ ವಾಶ್‌ರೂಮ್‌ಗೆ ಹೋಗಬೇಕೆಂದು ಅವಸರಿಸುತ್ತಾಳೆ. ಆಕೆಯ ಅಮ್ಮ ಆಕೆಯನ್ನು ಕರೆದುಕೊಂಡು ಕಾಕ್‌ಪಿಟ್‌ನ ಪಕ್ಕದಲ್ಲೇ ಇದ್ದ ವಾಶ್‌ರೂಮ್‌ ಒಳಕ್ಕೆ ಕಳಿಸಿ ಹೊರಗೆ ನಿಲ್ಲುತ್ತಾಳೆ.

ಅಲ್ಲಿ ಕಾಯುತ್ತಿದ್ದ ತಾಯಿ ತಲಿ ಬೆರ್ಕೊವಿಚ್’ಗೆ ಕಾಕ್‌ಪಿಟ್ ಒಳಗೆ ಯಾರೋ ಹೊಡೆಯುತ್ತಿರುವ ಸದ್ದು ಕಿರುಚಾಟದ ಸದ್ದು ಕೇಳಿಸಿದೆ.
ಅದೇ ಸಮಯಕ್ಕೆ ಸರಿಯಾಗಿ, ದೇಹದಿಂದ ರಕ್ತ ಹರಿಯುತ್ತಿದ್ದರೂ, ಪ್ರಜ್ಞೆ ಇಂಚಿಂಚಾಗಿ ಮರೆಯಾಗುತ್ತಿದ್ದರೂ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಕರ್ತವ್ಯ ಪ್ರಜ್ಞೆ ಎಚ್ಚೆತ್ತು ಆತನನ್ನು ಎಬ್ಬಿಸಿದೆ. ಬಹುಶಃ ಸ್ಮಿತ್ ಸತ್ತಿರಬಹುದು ಎಂದು ಹೈಜಾಕರ್ ಭಾವಿಸಿರಬೇಕು. ಆದರೆ ಸ್ಮಿತ್ ಕ್ಷೀಣ ಉಸಿರಿನ ಶಕ್ತಿ ಒಗ್ಗೂಡಿಸಿ ಕಾಕ್‌ಪಿಟ್‌ನ ಆಟೋಮ್ಯಾಟಿಕ್ ಲಾಕ್ ಬಾಗಿಲನ್ನು ಬಲವಾಗಿ ಒದ್ದಿದ್ದರು: ಬಾಗಿಲು ಅರೆಬರೆ ತೆರೆದುಕೊಂಡಿತ್ತು.

ಅದರ ಜತೆಗೆ ಹಮಾಮ್ ಕೊಡಲಿಯಿಂದ ದಾಳಿ ನಡೆಸಿದ ತಕ್ಷಣ, ಮುಖ್ಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಹೈಜಾಕರ್‌ನ ಕಣ್ಣು ತಪ್ಪಿಸಿ ಟ್ರಾನ್ಸ್‌ಪಾಂಡರ್‌ನ ಕೀಬೋರ್ಡ್‌ನಲ್ಲಿ ‘7500’ ಎಂಬ 4 ಅಂಕಿಗಳ ಕೋಡ್ ಅನ್ನು ಎಡಗೈಲಿ ಟೈಪ್ ಮಾಡಿ ಬಿಟ್ಟಿದ್ದರು. ಅಲ್ಲಿಗೆ ಆಗಬೇಕಾದ ಎರಡು ಅಗತ್ಯ ಕ್ರಮವನ್ನು ಮಚ್ಚರ್ ತೆಗೆದುಕೊಂಡಿದ್ದರು.

ಜಾಗತಿಕ ವಿಮಾನಯಾನ ನಿಯಮಗಳ ಪ್ರಕಾರ ‘7500’ ಎಂದರೆ ವಿಮಾನ ಅಪಹರಣಕ್ಕೊಳಗಾಗಿದೆ ಎಂದರ್ಥ. ಇದು ಇಡೀ ವಿಶ್ವದ ಎಲ್ಲಾ ಏರ್ ಟ್ರಾಫಿಕ್ ಕಂಟ್ರೋಲ್ ರೂಮ್‌ಗಳಿಗೆ ಇರುವ ರಹಸ್ಯ ಸಂಕೇತ. ಪೈಲಟ್ ಒಮ್ಮೆ ‘7500’ ಕೋಡ್ ಒತ್ತುತ್ತಿದ್ದಂತೆ, ವಿಮಾನದ ರೇಡಿಯೋ ಸಿಗ್ನಲ್‌ಗಳು ಜಾಗತಿಕ ರಾಡಾರ್ ಸ್ಕ್ರೀನ್‌ಗಳ ಮೇಲೆ ದೊಡ್ಡದಾಗಿ ಕೆಂಪು ಬಣ್ಣದಲ್ಲಿ ಹೈಜಾಕ್ ಎಂದು ಕಿರುಚಲು ಶುರು ಮಾಡಿವೆ. ವಾಯುಪ್ರದೇಶದ ಕಂಟ್ರೋಲ್ ರೂಮ್‌ಗಳಿಗೆ ಮತ್ತು ಸೌದಿ ಅರೇಬಿಯಾ, ಇಸ್ರೇಲ್ ಮಿಲಿಟರಿ ರಾಡಾರ್‌ಗಳಿಗೆ ಆಕಾಶದಲ್ಲಿ ದೊಡ್ಡದೊಂದು ಅನಾಹುತ ನಡೆಯುತ್ತಿದೆ ಎಂಬ ಸಂದೇಶ ಕ್ಷಣಾರ್ಧದಲ್ಲಿ ಸ್ವಯಂಚಾಲಿತವಾಗಿ ತಲುಪಿ ಬಿಟ್ಟಿದೆ. ಇಸ್ರೇಲಿನ ಯುದ್ಧ ವಿಮಾನಗಳು ತಕ್ಷಣ ಜಾಗೃತವಾಗಿ ಕುಳಿತಿವೆ.

ವಿಮಾನಯಾನ ವ್ಯವಸ್ಥೆಯಲ್ಲಿ ಯಾರೂ ಫೋನ್ ಮಾಡಿ ಅಥವಾ ಮೈಕ್‌ನಲ್ಲಿ “ವಿಮಾನ ಹೈಜಾಕ್ ಆಗಿದೆ” ಎಂದು ಕೂಗಿ ಹೇಳಬೇಕಾಗಿಲ್ಲ. ಅದಕ್ಕಾಗಿ ವಿಮಾನದಲ್ಲಿ ‘ಟ್ರಾನ್ಸ್‌ಪಾಂಡರ್’ ಎಂಬ ವಿಶೇಷ ರೇಡಿಯೋ ಕಮ್ಯುನಿಕೇಶನ್ ಸಾಧನವಿದ್ದು ಅಂದು ಆ ಕೋಡ್ ಆಕ್ಟಿವೇಟ್ ಆಗಿಬಿಡುತ್ತದೆ. ಅಲ್ಲೇ ಇರೋದು ಸ್ಮಿತ್ ಮಚ್ಚರ್ ಅವರ ಕಾರ್ಯ ತತ್ಪರತೆ ಮತ್ತು ಬುದ್ಧಿವಂತಿಕೆ. ಇಡೀ ವಿಮಾನ ವ್ಯವಸ್ಥೆಗೆ ಹಾಗೆ ಮೊದಲ ಸೂಚನೆಯನ್ನು ಭಾರತೀಯ ಕ್ಯಾಪ್ಟನ್ ಕೊಟ್ಟಿದ್ದರು.

ಇತ್ತ ಕಿರುಚಾಟ ಕೇಳಿದ ಹುಡುಗಿಯ ತಾಯಿ ತಲೆ ಒಳಗೆ ಇಣುಕಿ ನೋಡಿದಾಗ ಸಹ-ಪೈಲಟ್ ಒಬ್ಬನು ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಮೇಲೆ ಕೊಡಲಿ ಪ್ರಯೋಗ ನಡೆಸುತ್ತಿದ್ದ. ತಕ್ಷಣವೇ ಆ ತಾಯಿ ಗಾಬರಿಯಿಂದ ಇಡೀ ವಿಮಾನದ ಕ್ಯಾಬಿನ್‌ಗೆ ಕೇಳಿಸುವಂತೆ, “ಇಲ್ಲಿ ಪೈಲಟ್ ಅನ್ನು ಕೊಲೆ ಮಾಡುತ್ತಿದ್ದಾರೆ. ಬನ್ನಿ, ಹೆಲ್ಪ್ , ಹೆಲ್ಪ್” ಎಂದು ಜೋರಾಗಿ ಕಿರಿಚುತ್ತಾಳೆ. ಈ ಕೂಗಾಟ ಕೇಳಿ ಜಾಗೃತಗೊಳ್ಳುತ್ತವೆ- ಈ ಜಗತ್ತಿನಲ್ಲಿಯೇ ಅತ್ಯಂತ ಧೈರ್ಯಶಾಲಿಗಳು ಎಂದು ಕರೆದುಕೊಳ್ಳುವ ವಿಮಾನದಲ್ಲಿದ್ದ ಇಸ್ರೇಲಿ ಮನಸ್ಸುಗಳು!

ಹೈಜಾಕರ್ ಹಮಾಮ್ ಮುಖ್ಯ ಪೈಲಟ್‌ನನ್ನು ಕೆಡವಿದ ತಕ್ಷಣ ವಿಮಾನದ ಗೇರ್ ಅನ್ನು ಸಂಪೂರ್ಣವಾಗಿ ಕೆಳಮುಖವಾಗಿ ತಳ್ಳಿದ. ಪೈಲಟ್ ನ ತಲೆಗೆ ಏಟು ಬಿದ್ದ ಎರಡು ನಿಮಿಷಗಳ ಒಳಗೆ, ಅಂದರೆ 8:32ರ ಹೊತ್ತಿಗೆ ವಿಮಾನ ತಲೆ ಕೆಳಗೆ ಮಾಡಿ ನಿಯಂತ್ರಣ ಕಳೆದುಕೊಂಡು ನರಕದ ಕಡೆಗೆ ನುಗ್ಗುತ್ತಿರುವಂತೆ ಧಾವಿಸಿತು. ಏಕಾಏಕಿ ಕೆಳಕ್ಕೆ ಇಳಿದ ಪರಿಣಾಮ, ಸೀಟು ಬೆಲ್ಟ್ ಸಡಿಲಿಸಿ ಕುಳಿತಿದ್ದ ಪ್ರಯಾಣಿಕರು ಗಾಳಿಯಲ್ಲಿ ಹತ್ತಿಯಂತೆ ತೇಲಲಾರಂಭಿಸಿದ್ದರು. ಕೇವಲ 120 ಸೆಕೆಂಡುಗಳಲ್ಲಿ ವಿಮಾನವು 33,000 ಅಡಿಯಿಂದ 17,000 ಅಡಿಗೆ ಧಸಕ್ಕನೆ ಕುಸಿಯಿತು.

ನೀನಾಳ ತಾಯಿಯ ‘ಹೆಲ್ಪ್ ಹೆಲ್ಪ್ ‘ ಕೂಗು ಕೇಳಿದ ತಕ್ಷಣ ನೀನಾಳ ತಂದೆ ಟ್ವಿಕಾ ಮಾನೆಸ್ ಕಾಕ್ ಪಿಟ್’ಗೆ ಹದ್ದಿನoತೆ ನುಗ್ಗುತ್ತಾನೆ. ಅಷ್ಟೇ!! ಕುಟುಕಲು ರೆಡಿಯಾಗಿರುವ ಹೆಜ್ಜೇನುಗಳಂತೆ ಇತರ ಇಸ್ರೇಲಿ ಪ್ರಯಾಣಿಕರು ತಕ್ಷಣವೇ ಓಡಿಬಂದು ಕಾಕ್‌ಪಿಟ್ ಒಳಗೆ ಕೈ ಚಾಚುತ್ತಾರೆ. ಕೆಲವೇ ಕ್ಷಣಗಳಲ್ಲಿ ಹೈಜಾಕರ್‌ ವಿಮಾನದ ಕಾರಿಡಾರಿನಲ್ಲಿ ಅವರ ಕಾಲ ಕೆಳಗೆ ಬಂಧಿಯಾಗಿದ್ದ. ಈ ಮೂಲಕ ಪ್ರತಿ ಇಸ್ರೇಲಿಗನಲ್ಲಿ ಓರ್ವ ಯೋಧನಿದ್ದಾನೆ ಅನ್ನೋ ಸಂಗತಿ ಮತ್ತೊಮ್ಮೆ ವಿಶ್ವಕ್ಕೆ ಸಾಬೀತಾಗಿದೆ.

ನೀಲಿ ಡ್ರಮ್ಮಿನಲ್ಲಿತ್ತು ಕೆಂಪು ನೆತ್ತರು!

ಅದೇ ವಿಮಾನದಲ್ಲಿ ಪ್ಯಾಸೆಂಜರ್ ಆಗಿ ಪ್ರಯಾಣಿಸುತ್ತಿದ್ದ ಫ್ಲೈದುಬೈನ ಇತರೆ ಆಫ್-ಡ್ಯೂಟಿ ಪೈಲಟ್‌ಗಳು ತಕ್ಷಣ ಕಾಕ್‌ಪಿಟ್ ಸೀಟನ್ನು ಆಕ್ರಮಿಸಿ ವಿಮಾನವನ್ನು ಮೇಲಕ್ಕೆ ಏರಿಸಿದ್ದಾರೆ. ವಿಮಾನ ಕಂಟ್ರೋಲಿಗೆ ಬಂದು ಪಕ್ಕದ, ಸುಮಾರು 250 ಕಿಲೋಮೀಟರುಗಳ ದೂರದ ಸೌದಿಯ ತಾಬುಕ್ ವಿಮಾನ ನಿಲ್ದಾಣಕ್ಕೆ ತಿರುಗಿದೆ. ಘಟನೆ ನಡೆದ 45 ನಿಮಿಷಗಳ ಒಳಗೆ, ಬೆಳಿಗ್ಗೆ 9:28ಕ್ಕೆ ಸೌದಿಯ ತಾಬುಕ್ ನಿಲ್ದಾಣದಲ್ಲಿ ವಿಮಾನ ಸುರಕ್ಷಿತವಾಗಿ ಲ್ಯಾಂಡ್ ಆಗಿದೆ.

ಹಾಗೆ ಹುಟ್ಟಿಕೊಂಡಿದ್ದಾರೆ: ಭಾರತದ ಹೊಸ ಜಾಗತಿಕ ಹೀರೋ, ಕ್ಯಾಪ್ಟನ್ ಸ್ಮಿತ್ ಮಚ್ಚರ್!

ಒಂದು ವೇಳೆ ಅಂದು ಆ ಪುಟ್ಟ ಬಾಲಕಿ ನೀನಾ ವಾಶ್‌ರೂಮ್‌ಗೆ ಹೋಗದಿದ್ದರೆ, ಕಾಕ್‌ಪಿಟ್ ಒಳಗಿನ ರಕ್ತಪಾತದ ಬಗ್ಗೆ ಯಾರಿಗೂ ತಿಳಿಯುತ್ತಲೇ ಇರಲಿಲ್ಲ. ಹೈಜಾಕರ್ ತಾನು ಅಂದುಕೊಂಡಂತೆ ಇಸ್ರೇಲ್ ತಲುಪಿ ದೊಡ್ಡ ಬಿಲ್ಡಿಂಗ್‌ಗೆ ವಿಮಾನವನ್ನು ಕ್ರಾಶ್ ಮಾಡುವವರೆಗೂ ಸಂಚು ಯಾರ ಸುಳಿವಿಗೂ ಸಿಗುತ್ತಿರಲಿಲ್ಲ. ಹೀಗಾಗಿ ಆ ಬಾಲಕಿಯ ವಾಶ್‌ರೂಮ್ ಟ್ರಿಪ್ ಇಡೀ ಕಥೆಯ ಅತ್ಯಂತ ‘ಲಕ್ಕಿ ಟ್ವಿಸ್ಟ್’ ಎನ್ನಬಹುದು.

ಒಮಾನ್ ಮೂಲದ 34 ವರ್ಷದ ಹೈಜಾಕರ್ ಸಹ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ 8 ವರ್ಷಗಳ ಅನುಭವ ಉಳ್ಳವನು. ಆತನ ಸಹೋದ್ಯೋಗಿಗಳು ಹೇಳುವಂತೆ ಆತನದು ಶಾಂತ ಸ್ವಭಾವ. ಪ್ರಶಾಂತವಾಗಿ ಕಾಣುವ ಮನಸ್ಸಿನಲ್ಲಿ ಅದೇನು ಹುನ್ನಾರಗಳು ನಡೆದಿತ್ತು, ಅದರ ಹಿಂದೆ ಯಾರ್ಯಾರಿದ್ದಾರೆ ಎಂದು ಸೌದಿ ಸರ್ಕಾರ ತನಿಖೆ ನಡೆಸುತ್ತಿದೆ. ಮೇಲ್ನೋಟಕ್ಕೆ ಆತ ಇಸ್ರೇಲ್ ವಿರೋಧಿಯಾಗಿದ್ದ, ಮೂಲಭೂತವಾದವನ್ನು ತಲೆಗೆ ತುಂಬಿಕೊಂಡು ಇಂತಹಾ ಕೃತ್ಯಕ್ಕೆ ಇಳಿದಿದ್ದಾನೆ ಎನ್ನಲಾಗುತ್ತಿದೆ. ಪೂರ್ಣ ಪ್ರಮಾಣದ ತನಿಖೆಗಾಗಿ ಇನ್ನಷ್ಟು ದಿನಗಳು ಕಾಯಬೇಕಿದೆ.

ಆಕಾಶಕ್ಕೆ ರಕ್ತದ ಕಲೆ ಮೆತ್ತಿದ ಆ ಕಥೆ ಇಲ್ಲಿಗೆ ಮುಗಿಯುತ್ತದೆ. ಆದರೆ 172 ಜನರ ಕಣ್ಣಲ್ಲಿ ಸಾವಿನ ಮನೆಗೆ ಹೋಗಿ ವಾಪಸ್ಸು ಮರಳಿ ಬಂದ ಆತಂಕ ಇವತ್ತಿಗೂ ಕಾಣಿಸುತ್ತಿದೆ. ವಿಧಿಯಾಟವೋ? ಒಬ್ಬ ಕರ್ತವ್ಯನಿಷ್ಠ ಕ್ಯಾಪ್ಟನ್, ಮತ್ತೊಬ್ಬ 6 ವರ್ಷದ ಬಾಲಕಿಯ ಕುಟುಂಬದ ಧೈರ್ಯದ ಕಥೆಯೋ? ಇಸ್ರೇಲಿ ನಾಗರಿಕರ ಎಂದೂ ಸೋಲೊಪ್ಪಿಕೊಳ್ಳದ ಮನಸ್ಥಿತಿಯೋ? – ಒಟ್ಟಾರೆ ಘಟನೆ ಇತಿಹಾಸದ ಪುಟಗಳಲ್ಲಿ ಸ್ಫೂರ್ತಿಯಾಗಿ ಉಳಿಯುತ್ತದೆ.
172 ಜನರನ್ನು ಬಲಿ ಹಾಕಲು ಹೊಂಚು ಹಾಕಿದ ವ್ಯಕ್ತಿಗೆ, ಸೌದಿಯ ಕಟ್ಟುನಿಟ್ಟಿನ ಕಾನೂನಿನಲ್ಲಿ ಗಲ್ಲು ಕುಣಿಕೆ ಬಿಗಿಯಾಗುವುದು ಗ್ಯಾರಂಟಿಯಾಗಿದೆ.

ಯಾರು ಈ ಸ್ಮಿತ್ ಮಚ್ಚರ್?

ಸ್ಮಿತ್ ಮಚ್ಚರ್ 45 ವರ್ಷದ ಗುಜರಾತಿ ಮೂಲದ ಪೈಲೆಟ್. ಕಳೆದ 15 ಮಿಕ್ಕಿವರ್ಷಗಳ ವಿಮಾನಯಾನ ಅನುಭವವನ್ನು ಹೊಂದಿರುವ ಅವರು ಕರ್ತವ್ಯನಿಷ್ಠ ಮಾತ್ರವಲ್ಲ, ಒಂದಷ್ಟು ಖುಷಿಯನ್ನು ಹಂಚುವ ಜಾಲಿ ಮನಸ್ಥಿತಿಯವರು. ತಣ್ಣಗೆ ಶಾಂತವಾಗಿ ಕಾಣುತ್ತಿದ್ದ ಸ್ಮಿತ್ ಮಚ್ಚರ್ ತಲೆಗೆ ಏಟು ಬಿದ್ದಾಗಲೂ ಬಡಿದಾಡಿದ್ದು, ಅವರ ಧೈರ್ಯ, ಸಾಹಸ ಮತ್ತು ಸಮಯಪ್ರಜ್ಞೆಗಾಗಿ ಇಡೀ ವಿಶ್ವವೇ ಅವರನ್ನು ಕೊಂಡಾಡುತ್ತಿದೆ. ಜತೆಗೆ 6 ವರ್ಷದ ಪುಟಾಣಿ ನೀನಾ, ಆಕೆಯ ಅಮ್ಮ, ಅಪ್ಪ ಮತ್ತು ವಿಮಾನದಲ್ಲಿ ಸಹಾಯಕ್ಕೆ ಧಾವಿಸಿದ ಇಸ್ರೇಲಿ ನಾಗರಿಕರು ಇವತ್ತು ಪ್ರಪಂಚದ ಹೀರೋಗಳಾಗಿದ್ದಾರೆ.