ಸಚಿವ ಸತೀಶ ಮನೆಯಲ್ಲಿ 2 ಟ್ರಂಕ್ ಹಣ- ಚಿನ್ನಾಭರಣ ಪತ್ತೆ
ಬೆಳಗಾವಿ: ವಿದೇಶಿ ವ್ಯವಹಾರದಲ್ಲಿ ಹಣ ಹೂಡಿಕೆ ಸಂಬಂಧ ಸಚಿವ ಸತೀಶ ಜಾರಕಿಹೊಳಿ ನಿವಾಸದ ಮೇಲೆ ನಡೆದ ಜಾರಿ ನಿರ್ದೇಶನಾಲಯ (ಇ.ಡಿ.) ಅಧಿಕಾರಿಗಳ ದಾಳಿ ಗುರುವಾರವೂ ಮುಂದುವರಿದಿದ್ದು ಅವರ ಗೋಕಾಕ್ ಹಿಲ್ ಗಾರ್ಡನ್ ಬಂಗಲೆಯಲ್ಲಿ ಸತತ ಒಂದೂವರೆ ದಿನಗಳ ಪರಿಶೀಲನೆ ಕಳೆದ ಗುರುವಾರ ಸಂಜೆ 7 ಗಂಟೆಗೆ ಅಂತ್ಯಗೊಂಡಿತು. ಅವರ ನಾಲ್ವರು ಆಪ್ತರ ಮೇಲಿನ ದಾಳಿ ಕೂಡಾ ಸುಮಾರು ಅಷ್ಟೇ ಸಮಯ ಬಳಿಕ ಮುಗಿದಿತ್ತು.
Sponsoredಜಾರಕಿಹೊಳಿ ಅವರ ಗಾರ್ಡನ್ ಬಂಗಲೆಯಲ್ಲಿ ಚಿಕ್ಕೋಡಿ ಸಂಸದೆ ಪ್ರಿಯಾಂಕಾ ಜಾರಕಿಹೊಳಿಯವರ ವಿಚಾರಣೆ ಮಾಡುವುದರ ಜತೆಗೆ ಹಲವು ಮಹತ್ವದ ದಾಖಲೆಗಳನ್ನು ಇ.ಡಿ. ಅಧಿಕಾರಿಗಳು ಪತ್ತೆ ಮಾಡಿದ್ದಾರೆ.
ಚಿನ್ನ ಬೆಳ್ಳಿ ನಗದು ಹಣ ಪತ್ತೆ ಆಗಿರುವ ಹಿನ್ನೆಲೆ, ಶೇಖರಿಸಿಡಲು ಇಂಡಿಯನ್ ಬ್ಯಾಂಕ್ನಿಂದ 2 ಟ್ರಂಕ್ಗಳನ್ನು ಅಧಿಕಾರಿಗಳು ತರಿಸಿಕೊಂಡಿದ್ದಾರೆ. ಜತೆಗೆ ಹಣ ಎಣಿಸಲು ಪ್ರಿಂಟರ್ಗಳನ್ನು ತರಿಸಿಕೊಂಡಿದ್ದಾರೆ. ಹಾಗೆಯೇ ಜಾರಕಿಹೊಳಿಯವರ ಲೆಕ್ಕ ಪರಿಶೋಧಕರನ್ನು ಕರೆಯಿಸಿ ಮಾಹಿತಿ ಕಲೆ ಹಾಕುತ್ತಿದ್ದಾರೆ. ಅಪಾರ ಪ್ರಮಾಣದಲ್ಲಿ ನಗದು ಪತ್ತೆ ಆಗಿರುವ ಸಾಧ್ಯತೆ ಇದೆ. ಆಫ್ರಿಕಾದ ರವಾಂಡಾ, ಜಾಂಬಿಯಾ ಹಾಗೂ ಕಾಂಗೋ ದೇಶಗಳಲ್ಲಿ ಹೂಡಿಕೆ ಮಾಡಿರುವ ಬಗ್ಗೆ ದಾಖಲೆಗ ವಶಕ್ಕೆ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ.
ಇದೇವೇಳೆ ಜಾರಕಿಹೊಳಿ ಆಪ್ತರಾದ ವಿಠಲ ಪರಸನ್ನವರ, ರಾಜು ಧರಗಶೆಟ್ಟಿ ,ಡಾ| ಗಿರೀಶ ಸೋನವಾಲಕರ, ಮಲ್ಲನಗೌಡ ಪಾಟೀಲ ಅವರ ಮೇಲೆ ವಿಚಾರಣೆ ಆಗಿದೆ. ಗಿರೀಶ ಸೋನವಾಲಕರರಿಗೆ ವಿಚಾರಣೆಗೆ ಕರೆದರೆ ಬರುವಂತೆ ಸೂಚನೆ ನೀಡಿದ್ದಾರೆ.
ಆಯುಕ್ತ, ಸತೀಶ ಮೈದುನ ಮಂಜುನಾಥರ ದೂರದರ್ಶನ ನಗರದಲ್ಲಿರುವ ನಿವಾಸ ಹಾಗೂ ಮಂಜುನಾಥರವರ ಖಾಸಗಿ ಆಪ್ತ ಸಹಾಯಕಿ ಪ್ರೀತಿ ಕಾಕತ್ಕರ್ ಮನೆಗಳ ಮೇಲೆಯೂ ಗುರುವಾರ ಬೆಳಗ್ಗೆ ಅಧಿಕಾರಿಗಳು ದಾಳಿ ನಡೆಸಿ ಪರಿಶೀಲಿಸಿದರು. ಮಂಜುನಾಥರ ಹೆಸರಿನಲ್ಲಿರುವ ದಾಖಲೆಗಳನ್ನು ಜಾಲಾಡಿದರು.
ಸತೀಶ ಜಾರಕಿಹೊಳಿ ಅವರು ವಿದೇಶಿ ವಿನಿಮಯ ನಿರ್ವಹಣ ಕಾಯ್ದೆ (ಫೆಮಾ) ಉಲ್ಲಂಘಿಸಿ ಆಫ್ರಿಕಾದ ವಿವಿಧ ದೇಶಗಳಲ್ಲಿ ಹಣದ ವಹಿವಾಟು ಮಾಡಿದ್ದಾರೆ ಎನ್ನುವುದು ಪ್ರಮುಖ ಆರೋಪ. ವಿದೇಶಗಳಲ್ಲಿ ಹಣ ಹೂಡಿಕೆ ಮಾಡಿರುವ ದಾಖಲೆಗಳು ಪತ್ತೆ ಆಗಿವೆ ಎನ್ನಲಾಗಿದ್ದು, ಗಣಿಗಾರಿಕೆ ಕಂಪೆನಿಯಲ್ಲಿ ಹಣ ಹೂಡಿಕೆ ಮಾಡಿರುವ ಸಾಧ್ಯತೆ ಕೂಡಾ ದಟ್ಟವಾಗಿವೆ ಎನ್ನುವ ಪ್ರಾಥಮಿಕ ಮಾಹಿತಿಗಳಿವೆ.




