ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆಗೆ ಕಡಿವಾಣ ಹಾಕಲು ಸಾಂಸ್ಕೃತಿಕ ನಗರಿ ಮೈಸೂರಿನ (Mysuru) ಉಪನಗರ ಬಸ್ ನಿಲ್ದಾಣದ ಸಮೀಪದ ರಸ್ತೆಯ ಗೋಡೆಯ ಮೇಲೆ ಕನ್ನಡಿಗಳನ್ನು (Mirror) ಅಳವಡಿಸಲಾಗಿದೆ. ಸದ್ಯ ಈ ಕನ್ನಡಿಗ ಕಾಂಪೌಂಡ್ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲಾಗುತ್ತಿದ್ದು, ಜನರ ಮೆಚ್ಚುಗೆಗೆ ಪಾತ್ರವಾಗಿದೆ.
ಉಪನಗರ ಬಸ್ ನಿಲ್ದಾಣದ ಬಳಿಯ ರಸ್ತೆ ಸಂಚಾರದ ಪ್ರಮುಖ ಸ್ಥಳವಾಗಿದ್ದರೂ, ಇಲ್ಲಿ ಪುರುಷರು ಸಾರ್ವಜನಿಕವಾಗಿ ಮೂತ್ರ ವಿಸರ್ಜನೆ ಮಾಡುವುದು ದೊಡ್ಡ ಸಮಸ್ಯೆಯಾಗಿತ್ತು. ಇಲ್ಲಿನ ಗೋಡೆಗಳಿಗೆ ಪ್ರತಿಫಲಿತ ಸ್ಟೀಲ್ ಶೀಟ್ ಅಥವಾ ಕನ್ನಡಿಗಳನ್ನು ಅಳವಡಿಸಲಾಗಿದೆ. ಇದರಿಂದಾಗಿ ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ಮಾಡಲು ತೆರಳಿದಾಗ ಅವರ ಪ್ರತಿಬಿಂಬ ಅವರಿಗೆ ಮಾತ್ರ ಕಾಣುವುದಲ್ಲದೆ ಹಾದಿ ಬೀದಿಯಲ್ಲಿ ಹೋಗುವ ಎಲ್ಲರಿಗೂ ಕಾಣುವ ರೀತಿ ಮಾಡಲಾಗಿದೆ. ಇದು ಮೂತ್ರ ವಿಸರ್ಜನೆ ಮಾಡುವವರಿಗೆ ಮುಜುಗರ ಉಂಟುಮಾಡುತ್ತದೆ ಮತ್ತು ಈ ಕೆಟ್ಟ ಅಭ್ಯಾಸದಿಂದ ಅವರು ದೂರ ಸರಿಯುತ್ತಾರೆ ಎಂಬುದು ಪಾಲಿಕೆಯ ಲೆಕ್ಕಾಚಾರ.
ಗ್ರಾಮಾಂತರ ಬಸ್ ನಿಲ್ದಾಣದ ಎದುರಿನ ಮೋರಿ ಬಳಿ, ಸರ್ಕಾರಿ ಅತಿಥಿಗೃಹದ ಕಾಂಪೌಂಡ್ ಗೋಡೆಗೆ, ಇಲ್ಲಿ ಸಾಮಾನ್ಯವಾಗಿ ಬಸ್ ಪ್ರಯಾಣಿಕರು ಮತ್ತು ದಾರಿಹೋಕರು ಹೆಚ್ಚಿನ ಸಂಖ್ಯೆಯಲ್ಲಿ ಓಡಾಡುತ್ತಿದ್ದು, ಸಾರ್ವಜನಿಕ ಸ್ಥಳವನ್ನು ಅಶುಚಿಗೊಳಿಸುತ್ತಿದ್ದರು. ಈಗ ಕನ್ನಡಿ ಅಳವಡಿಸಿರುವುದರಿಂದ ಅಲ್ಲಿನ ಚಿತ್ರಣವೇ ಬದಲಾಗಿದೆ. ಕೇವಲ ಹಗಲಷ್ಟೇ ಅಲ್ಲದೆ, ರಾತ್ರಿ ವೇಳೆಯೂ ಕೃತ್ಯ ನಡೆಯಬಾರದು ಎಂಬ ಕಾರಣಕ್ಕೆ ಕನ್ನಡಿಯ ಕೆಳಭಾಗದಲ್ಲಿ ಎಲ್ಇಡಿ ಬಲ್ಬ್ಗಳನ್ನು ಅಳವಡಿಸಲಾಗಿದೆ. ಇದರಿಂದ ರಾತ್ರಿ ಹೊತ್ತು ಯಾರಾದರೂ ಅಲ್ಲಿಗೆ ಬಂದರೆ ಬೆಳಕಿನ ಕಾರಣದಿಂದ ಎಲ್ಲರಿಗೂ ಕಾಣಿಸುತ್ತಾರೆ.ಪಾಲಿಕೆಯ ಈ ವಿಶೇಷ ಐಡಿಯಾಗೆ ಮೈಸೂರು ಜನರಿಂದ ಭಾರಿ ಪ್ರಶಂಸೆ ವ್ಯಕ್ತವಾಗುತ್ತಿದೆ.
ಮೈಸೂರಿನ ಈ ನೂತನ ಪ್ರಯೋಗದ ಫೋಟೋ ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿವೆ. ಅನೇಕರು ಈ ಐಡಿಯಾವನ್ನು ಪ್ರಾಯೋಗಿಕ ಮತ್ತು ಸೃಜನಶೀಲ ಎಂದು ಹೊಗಳಿದ್ದಾರೆ. ಬರೀ ಎಚ್ಚರಿಕೆ ಫಲಕಗಳನ್ನು ಹಾಕುವ ಬದಲು ಜನರ ವರ್ತನೆಯನ್ನೇ ಬದಲಿಸುವ ಈ ಕ್ರಮವು ಅಲ್ಪಾವಧಿಗಾದರೂ ಪರಿಣಾಮ ಬೀರಬಹುದು ಎಂದು ಹಲವರು ನಂಬಿದ್ದಾರೆ.
