ಯುಪಿಐ ಪಾವತಿ ಮೇಲಿನ ಶುಲ್ಕ ಸದ್ಯಕ್ಕಿಲ್ಲ : ಎನ್ಪಿಸಿಐ

ನವದೆಹಲಿ: ಯುಪಿಐ ವಹಿವಾಟು ಮೇಲಿನ ಮರ್ಚೆಂಟ್‌ ಡಿಸ್ಕೌಂಟ್‌ ರೇಟ್‌ (ಎಂಡಿಆರ್‌) ಶುಲ್ಕವನ್ನು ಜಾರಿ ಮಾಡುವ ಯೋಜನೆ ಸದ್ಯಕ್ಕಿಲ್ಲ ಎಂದು ಭಾರತ ರಾಷ್ಟ್ರೀಯ ಪಾವತಿಗಳ ನಿಗಮ (ಎನ್‌ಪಿಸಿಐ) ಸ್ಪಷ್ಟಪಡಿಸಿದೆ.

Sponsored

ಸುಮಾರು ಒಂದು ತಿಂಗಳ ಹಿಂದೆ ಪ್ರಸ್ತಾವನೆ ಮಾಡಿದ್ದ, ಹೆಚ್ಚುವರಿ ಶುಲ್ಕವನ್ನು ತಡೆ ಹಿಡಿಯಲಾಗಿದ್ದು, ದೀಪಾವಳಿ ಹಬ್ಬದ ನಂತರ ಶುಲ್ಕವನ್ನು ವಿಧಿಸುವ ಹೊಸ ದಿನಾಂಕವನ್ನು ಪ್ರಕಟ ಮಾಡಲಾಗುವುದು ಎಂದು ಎನ್‌ಪಿಸಿಐ ಹೇಳಿತ್ತು. ಆದರೆ ಇದೀಗ ಯಾವುದೇ ದಿನಾಂಕವನ್ನು ಸೂಚಿಸದೇ, ತಕ್ಷಣ ಜಾರಿ ಮಾಡುವ ಯೋಜನೆ ಇಲ್ಲ ಎಂದು ಹೇಳಿದೆ.

ಯುಪಿಐ ಮೂಲಕ ರೂ.2000 ಗಿಂತ ಅಧಿಕ ಪಾವತಿಗಳ ಮೇಲೆ ಶುಲ್ಕ ವಿಧಿಸಲು ಸರಕಾರ ಮುಂದಾಗಿತ್ತು. ಈ ನಿರ್ಧಾರವನ್ನು ವ್ಯಾಪಾರಿಗಳು ಮತ್ತು ಪೆಟ್ರೋಲ್‌ ಬಂಕ್‌ ಡೀಲರ್‌ಗಳು ವಿರೋಧ ಮಾಡಿದ್ದರು. ಅಲ್ಲದೆ ವ್ಯಾಪಾರಿಗಳು ಹೆಚ್ಚಿನ ಬೆಲೆ ವಿಧಿಸುವ ಮೂಲಕ ಹೆಚ್ಚುವರಿ ಶುಲ್ಕವನ್ನು ತಮ್ಮ ಮೇಲೆ ಹೊರಿಸಬಹುದು ಎನ್ನುವ ಆತಂಕ ಗ್ರಾಹಕರಿಲ್ಲಿತ್ತು. ಆದರೆ ಸರಕಾರ ಇದು ವ್ಯಾಪಾರಿಗಳಿಗೆ ಮಾತ್ರ ಅನ್ವಯ ಎಂದು ಹೇಳಿದ್ದು, ಗ್ರಾಹಕರಿಗೆ ಅನ್ವಯಿಸುವುದಿಲ್ಲ ಎಂದು ಹೇಳಿತ್ತು.