ಇಂದು ಸಂಜೆ 75 ಜಿಲ್ಲೆಗಳಲ್ಲಿ ಏಕಕಾಲಕ್ಕೆ ಬ್ಲ್ಯಾಕೌಟ್, ಮೊಳಗಲಿದೆ ವಾಯುದಾಳಿ ಸೈರನ್!
Sponsoredಯುದ್ಧ ಹಾಗೂ ವೈಮಾನಿಕ ದಾಳಿಯಂತಹ ತುರ್ತು ಪರಿಸ್ಥಿತಿಗಳನ್ನು ಎದುರಿಸಲು ಸನ್ನದ್ಧತೆಯನ್ನು ಪರಿಶೀಲಿಸುವ ಸಲುವಾಗಿ ಉತ್ತರ ಪ್ರದೇಶ ಸರ್ಕಾರ ಇಂದು (ನವೆಂಬರ್ 22) ರಾಜ್ಯಾದ್ಯಂತ ಬೃಹತ್ ‘ಬ್ಲ್ಯಾಕೌಟ್ ಅಣಕು ಕವಾಯತು’ ಆಯೋಜಿಸಿದೆ.
Sponsoredಏನಿದು ಕಾರ್ಯಾಚರಣೆ?: ರಾಜ್ಯದ ಎಲ್ಲಾ 75 ಜಿಲ್ಲೆಗಳಲ್ಲಿ ಸಂಜೆ 6 ಗಂಟೆಗೆ ಏಕಕಾಲದಲ್ಲಿ 2 ನಿಮಿಷಗಳ ಕಾಲ ವಾಯುದಾಳಿ ಎಚ್ಚರಿಕೆ ಸೈರನ್ ಮೊಳಗಲಿದೆ. ಈ ವೇಳೆ ತಾತ್ಕಾಲಿಕವಾಗಿ ವಿದ್ಯುತ್ ಸರಬರಾಜು ಸ್ಥಗಿತಗೊಳಿಸಿ ಬ್ಲ್ಯಾಕೌಟ್ ಪರಿಸ್ಥಿತಿ ನಿರ್ಮಿಸಲಾಗುವುದು. ಕವಾಯತು ಮುಗಿದ ಬಳಿಕ ‘ಆಲ್ ಕ್ಲಿಯರ್’ ಸೈರನ್ ಮೊಳಗಲಿದೆ.
ಯಾರು ಭಾಗವಹಿಸಲಿದ್ದಾರೆ?: 1962ರ ಭಾರತ-ಚೀನಾ ಯುದ್ಧದ ಬಳಿಕ ಸ್ಥಾಪನೆಯಾದ ನಾಗರಿಕ ರಕ್ಷಣಾ ಇಲಾಖೆ (Civil Defence) ಇದರ ನೇತೃತ್ವ ವಹಿಸಿದೆ. ಇದರೊಂದಿಗೆ ಪೊಲೀಸ್, ಅಗ್ನಿಶಾಮಕ ದಳ, ಆರೋಗ್ಯ ಇಲಾಖೆ, SDMA, DDMA, NDRF, SDRF ತಂಡಗಳು, ಸುಮಾರು 1 ಲಕ್ಷ ನಾಗರಿಕ ರಕ್ಷಣಾ ಸ್ವಯಂಸೇವಕರು (ಹೊಸದಾಗಿ ನೇಮಕಗೊಂಡ 10 ಸಾವಿರ ಮಂದಿ ಸೇರಿ), ಎನ್ಸಿಸಿ, ಎನ್ಎಸ್ಎಸ್, ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಪಾಲ್ಗೊಳ್ಳಲಿದ್ದಾರೆ.
ಯಾವ ರೀತಿಯ ಅಭ್ಯಾಸ ನಡೆಯಲಿದೆ?: ಸೈರನ್ ಮೊಳಗಿದ ತಕ್ಷಣ ಜನರು ಸುರಕ್ಷಿತ ಸ್ಥಳಗಳಲ್ಲಿ ಆಶ್ರಯ ಪಡೆಯುವುದು, ಬೆಂಕಿ ನಂದಿಸುವ ಕಾರ್ಯಾಚರಣೆ, ಕಟ್ಟಡಗಳಲ್ಲಿ ಸಿಲುಕಿದವರ ರಕ್ಷಣೆ ಹಾಗೂ ಗಾಯಾಳುಗಳಿಗೆ ಪ್ರಥಮ ಚಿಕಿತ್ಸೆ ನೀಡಿ ಆಂಬ್ಯುಲೆನ್ಸ್ ಮೂಲಕ ಆಸ್ಪತ್ರೆಗೆ ಸಾಗಿಸುವ ಅಣಕು ಪ್ರದರ್ಶನ ನಡೆಯಲಿದೆ.
ಸಾರ್ವಜನಿಕರಿಗೆ ಸೂಚನೆ: ಇದೊಂದು ಪೂರ್ವನಿಗದಿತ ಅಣಕು ಅಭ್ಯಾಸ ಮಾತ್ರವಾಗಿದ್ದು, ನೈಜ ವೈಮಾನಿಕ ದಾಳಿಯಲ್ಲ. ಸಾರ್ವಜನಿಕರು ಯಾವುದೇ ಆತಂಕ ಅಥವಾ ಗೊಂದಲಕ್ಕೆ ಒಳಗಾಗಬಾರದು ಎಂದು ನಾಗರಿಕ ರಕ್ಷಣಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಸಂಯುಕ್ತಾ ಸಮದ್ದರ್ ಹಾಗೂ ಅಧಿಕಾರಿಗಳು ಮನವಿ ಮಾಡಿದ್ದಾರೆ.




