ಭಾನುವಾರ, 22 ನವೆಂಬರ್ 2026

ಕರಾವಳಿಯಲ್ಲಿ ಮೊಳಗಲಿದೆ ಗೆಜ್ಜೆ ನಾದ; 2026-27ರ ಯಕ್ಷಗಾನ ತಿರುಗಾಟದ ಸಂಪೂರ್ಣ ಚಿತ್ರಣ ಇಲ್ಲಿದೆ!

Advertisement
Advertisement
Sponsored

ಮಂಗಳೂರು: ದೀಪಾವಳಿಯ ಬೆಳಕಿನ ಹಬ್ಬ ಮುಗಿಯುತ್ತಿದ್ದಂತೆಯೇ ಕರಾವಳಿಯಾದ್ಯಂತ ಯಕ್ಷಗಾನದ ಸಂಭ್ರಮ ಗರಿಗೆದರಿದೆ. ಮಳೆಗಾಲದ ವಿಶ್ರಾಂತಿ ಮುಗಿಸಿ, ಪತ್ತನಾಜೆಯಂದು ಟ್ರಂಕ್ ಸೇರಿದ್ದ ವೇಷಭೂಷಣಗಳಿಗೆ ಮತ್ತೆ ಜೀವ ಬಂದಿದೆ. ಚಳಿಗಾಲದ ಆರಂಭದೊಂದಿಗೆ ಕರಾವಳಿಯ ಹಳ್ಳಿಹಳ್ಳಿಗಳಲ್ಲಿ ಚೆಂಡೆ, ಮದ್ದಳೆ, ತಾಳಗಳ ನಿನಾದ ಮೊಳಗಲು ಶುರುವಾಗಿದ್ದು, ಮುಂದಿನ ಆರು ತಿಂಗಳು ಕಲಾರಸಿಕರಿಗೆ ಭರಪೂರ ಮನರಂಜನೆ ಸಿಗಲಿದೆ.

Sponsored

ಈ ಬಾರಿ ಬಡಗುತಿಟ್ಟು ಮತ್ತು ತೆಂಕುತಿಟ್ಟು ಶೈಲಿಯ ಒಟ್ಟು 45 ಯಕ್ಷಗಾನ ಮೇಳಗಳು ವಾರ್ಷಿಕ ತಿರುಗಾಟ ನಡೆಸಲಿವೆ. ಬಹುತೇಕ ಮೇಳಗಳು ಕಾಲಮಿತಿಯ ಪ್ರದರ್ಶನಗಳಿಗೆ ಒತ್ತು ನೀಡುತ್ತಿದ್ದು, ಪ್ರೇಕ್ಷಕರು ಹಾಗೂ ಆಯೋಜಕರ ಬೇಡಿಕೆಗೆ ಅನುಗುಣವಾಗಿ ಪೂರ್ಣರಾತ್ರಿ ಆಟಗಳನ್ನೂ ಪ್ರದರ್ಶಿಸಲಿವೆ.

Advertisement
Advertisement

ಬಡಗುತಿಟ್ಟು ಮೇಳಗಳ ತಿರುಗಾಟದ ವೇಳಾಪಟ್ಟಿ
ಬಡಗುತಿಟ್ಟಿನ ಬಹುತೇಕ ಮೇಳಗಳು ಈಗಾಗಲೇ ರಂಗಸ್ಥಳಕ್ಕೆ ಇಳಿದಿದ್ದು, ಉಳಿದವು ನವೆಂಬರ್ ಅಂತ್ಯದ ವೇಳೆಗೆ ಕಲಾಯಾನ ಆರಂಭಿಸಲಿವೆ.

Advertisement

ಯಕ್ಷಗಾನ ಮೇಳಗಳ ವಿವರ
ನವೆಂಬರ್ 10 ಕಮಲಶಿಲೆ ಮೇಳ
ನವೆಂಬರ್ 11 ಕುಕ್ಕೆಹಳ್ಳಿ ನೂತನ ಮೇಳ
ನವೆಂಬರ್ 12 ಸಾಲಿಗ್ರಾಮ ಮೇಳ
ನವೆಂಬರ್ 13 ಹಟ್ಟಿಯಂಗಡಿ ಮೇಳ
ನವೆಂಬರ್ 15 ಮಡಾಮಕ್ಕಿ ಮೇಳ
ನವೆಂಬರ್ 18 ಮಾರಣಕಟ್ಟೆ (3 ಮೇಳಗಳು), ಮಂದಾರ್ತಿ (5 ಮೇಳಗಳು), ಕೋಟ ಅಮೃತೇಶ್ವರಿ ಮೇಳ
ನವೆಂಬರ್ 20 ಪೆರ್ಡೂರು, ಮೆಕ್ಕೆಕಟ್ಟು, ಸೌಕೂರು ಮೇಳಗಳು
ನವೆಂಬರ್ 22 ಗೋಳಿಗರಡಿ ಮೇಳ
ನವೆಂಬರ್ 26 ಹಾಲಾಡಿ ಮೇಳ
ನವೆಂಬರ್ 29 ಸಿಗಂದೂರು ಮೇಳ
ಬಡಗುತಿಟ್ಟಿನ ಪ್ರಮುಖ ಹೊಸ ಪ್ರಸಂಗಗಳು:

ಸಾಲಿಗ್ರಾಮ ಮೇಳ: ‘ಹರಿ ಓಂ’ (ಕಥೆ: ಕನಿಷ್ಕ್ ಹೆಗ್ಡೆ, ಪದ್ಯ: ಬೇಳೂರು ವಿಷ್ಣುಮೂರ್ತಿ ನಾಯಕ್) ಮತ್ತು ‘ಕೃತ್ತಿಕಾ ನಕ್ಷತ್ರ’ (ರಮೇಶ್ ಬೇಗಾರ್).
ಹಟ್ಟಿಯಂಗಡಿ ಮೇಳ: ‘ಬೆಳದಿಂಗಳ ಚೆಲುವೆ’, ‘ಶಕ್ತಿ ಸ್ವರೂಪಿಣಿ ಶ್ರೀ ವನದುರ್ಗೆ’ ಹಾಗೂ ‘ಕರ್ಣ ರಂಜಿನಿ’.
ಮಡಾಮಕ್ಕಿ ಮೇಳ: ‘ಗುಪ್ತಗಾಮಿನಿ’ (ರಚನೆ: ಅಂಬಿಕಾ ಪೂಜಾರಿ ವಕ್ವಾಡಿ).
ಕೋಟ ಅಮೃತೇಶ್ವರಿ ಮೇಳ: ‘ಅಹಂ ಪ್ರೇಮಾಸ್ಮಿ’ ಸಾಮಾಜಿಕ ಪ್ರಸಂಗ (ಕಥೆ: ರಜತ್ ಪೂಜಾರಿ ತೆಕ್ಕಟ್ಟೆ, ಪದ್ಯ: ಪಿ.ವಿ. ಆನಂದ ಸಾಲಿಗ್ರಾಮ).

ಇತರೆ ಪ್ರಮುಖ ಪ್ರಸಂಗಗಳು: ಪೆರ್ಡೂರು ಮೇಳದಲ್ಲಿ ‘ಲಗ್ನಪತ್ರಿಕೆ’ (ಪ್ರೊ. ಪವನ್ ಕಿರಣಕೆರೆ), ಸೌಕೂರು ಮೇಳದಲ್ಲಿ ‘ಬ್ರಹ್ಮಾಸ್ತ್ರ’, ಗೋಳಿಗರಡಿ ಮೇಳದಲ್ಲಿ ‘ಪ್ರಣಯ ಕಾದಂಬರಿ’, ಹಾಲಾಡಿ ಮೇಳದಲ್ಲಿ ‘ಗೌರಿ ಮನೋಹರಿ’ ಹಾಗೂ ಸಿಗಂದೂರು ಮೇಳದಲ್ಲಿ ‘ಅಗ್ನಿ ಶರಧಿ’ (ನಂದೀಶ್ ಶೆಟ್ಟಿ ಬಿಲ್ಲಾಡಿ).

ತೆಂಕುತಿಟ್ಟು ಮೇಳಗಳ ತಿರುಗಾಟದ ವೇಳಾಪಟ್ಟಿ
ತೆಂಕುತಿಟ್ಟು ಮೇಳಗಳೂ ಹಂತ ಹಂತವಾಗಿ ತಿರುಗಾಟಕ್ಕೆ ಚಾಲನೆ ನೀಡುತ್ತಿವೆ.

ಯಕ್ಷಗಾನ ಮೇಳಗಳ ವಿವರ
ನವೆಂಬರ್ 21 ಪಾವಂಜೆ ಮೇಳ (7ನೇ ವರ್ಷದ ತಿರುಗಾಟ), ಗೆಜ್ಜೆಗಿರಿ ಮೇಳ
ನವೆಂಬರ್ 22 ಬಪ್ಪನಾಡು ಮೇಳ
ನವೆಂಬರ್ 27 ಸುಂಕದಕಟ್ಟೆ ಮೇಳ
ನವೆಂಬರ್ 28 ಹನುಮಗಿರಿ ಮೇಳ
ನವೆಂಬರ್ 29 ಧರ್ಮಸ್ಥಳ ಮೇಳ (ನ. 12ರಿಂದಲೇ ಕ್ಷೇತ್ರದಲ್ಲಿ ಸೇವೆಯಾಟ ಆರಂಭವಾಗಿದೆ)
ಡಿಸೆಂಬರ್ 2 ಕಳವಾರು ಬೆಂಕಿನಾಥೇಶ್ವರ ಮೇಳ
ಡಿಸೆಂಬರ್ 3 ಕಟೀಲು ಶ್ರೀ ದುರ್ಗಾಪರಮೇಶ್ವರಿ ಮೇಳಗಳು (ಎಲ್ಲಾ 7 ಮೇಳಗಳು), ಕುಕ್ಕೆ ಸುಬ್ರಹ್ಮಣ್ಯ ಮೇಳ

ತೆಂಕುತಿಟ್ಟಿನ ಪ್ರಮುಖ ಹೊಸ ಪ್ರಸಂಗಗಳು:

ಹನುಮಗಿರಿ ಮೇಳ: ‘ವಿಧಿ ವಿಲಾಸ’ (ಕಥಾ ಸಂಯೋಜನೆ: ವಾಸುದೇವ ರಂಗಭಟ್, ಪದ್ಯ: ಪ್ರಸಾದ್ ಕುಮಾರ್ ಮೊಗೆಬೆಟ್ಟು).
ಪಾವಂಜೆ ಮೇಳ: ‘ಲಗ್ನಪತ್ರಿಕೆ’ ಮತ್ತು ‘ಮೋಹ ಮಾಧವಿ’ (ಪ್ರೊ. ಪವನ್ ಕಿರಣಕೆರೆ).
ಗೆಜ್ಜೆಗಿರಿ ಮೇಳ: ‘ಸಿಂಧೂರ’, ‘ನಾಗರತಿ’, ‘ಪುಂಚದ ಮಣ್ಣ್’ ಮತ್ತು ‘ಘೋರ ಭೈರವಿ’.
ಬಪ್ಪನಾಡು ಮೇಳ: ‘ಬಪ್ಪನಾಡು ಪಂಚದುರ್ಗಾಪರಮೇಶ್ವರಿ ಮಹಾತ್ಮೆ’ (ಡಾ. ತಾರಾನಾಥ ಬಲ್ಯಾಯ), ‘ಬಾನದ ಭಾಗ್ಯವಂತೆದಿ’ (ಡಿ. ಮನೋಹರ್ ಕುಮಾರ್).
ಕಳವಾರು ಮೇಳ: ‘ಗೆಜ್ಜೆ ಕತ್ತಿ’ (ಶುಭಾಶಯ ಜೈನ್) ಮತ್ತು ‘ಶುಭ ಮುಹೂರ್ತ’ (ವಿಜಿತ್ ಶೆಟ್ಟಿ ಆಕಾಶಭವನ).

ಈ ಬಾರಿಯ ಎರಡು ಹೊಸ ಮೇಳಗಳ ವಿಶೇಷತೆ
2026-27ನೇ ಸಾಲಿನಲ್ಲಿ ಎರಡು ಹೊಸ ಮೇಳಗಳು ರಂಗಪ್ರವೇಶ ಮಾಡುತ್ತಿರುವುದು ವಿಶೇಷ:
ಕುಕ್ಕೆಹಳ್ಳಿ ಮೇಳ (ಬಡಗುತಿಟ್ಟು): ‘ಶ್ರೀ ಆದಿಮಾಯೆ ಮೂಕಾಂಬಿಕಾ ಸ್ವಾಮಿ ಕೊರಗಜ್ಜ ಕೃಪಾಪೋಷಿತ ಯಕ್ಷಗಾನ ಮಂಡಳಿ’ಯು ನವೆಂಬರ್ 11ರಂದೇ ತಿರುಗಾಟ ಆರಂಭಿಸಿದೆ. ತೆಂಕು ಮತ್ತು ಬಡಗುತಿಟ್ಟು ಕಲಾವಿದರ ಸಮ್ಮಿಲನದ (ಸುಮಾರು 32-33 ಕಲಾವಿದರು) ಈ ಮೇಳದಲ್ಲಿ ‘ವೈಭವ ಸೂರ್ಯವಂಶಿ’ (ದೇವದಾಸ್ ಈಶ್ವರಮಂಗಲ) ಹಾಗೂ ‘ಮಾಯೆಯ ಅಜ್ಜ’ (ಸಿ.ಕೆ. ಪ್ರಶಾಂತ್) ಸೇರಿದಂತೆ ಪೌರಾಣಿಕ, ಸಾಮಾಜಿಕ ಪ್ರಸಂಗಗಳು ಪ್ರದರ್ಶನಗೊಳ್ಳಲಿವೆ.
ಬನ್ನೂರು-ಪುತ್ತೂರು ಮೇಳ (ತೆಂಕುತಿಟ್ಟು): ಈ ಹಿಂದೆ ಚಿಕ್ಕಮೇಳವಾಗಿದ್ದ ಪುತ್ತೂರಿನ ‘ಶ್ರೀ ಅನ್ನಪೂರ್ಣೇಶ್ವರಿ ಪ್ರಸಾದಿತ ಯಕ್ಷಗಾನ ಮಂಡಳಿ’ ಡಿಸೆಂಬರ್ 17ರಿಂದ ಪೂರ್ಣಪ್ರಮಾಣದ ತಿರುಗಾಟ ಆರಂಭಿಸಲಿದೆ. ‘ಉಬರ್ ಕಡಪುದ ಬೀರೆಕಲ್ಲುಡೆ’, ‘ಕೋಟಿ ಚೆನ್ನಯ’, ‘ತುಳುನಾಡ ಸಿರಿ’, ‘ದೇವುಪೂಂಜ ಪ್ರತಾಪ’ ಎಂಬ ತುಳು ಪ್ರಸಂಗಗಳ ಜೊತೆಗೆ ‘ಮಾಯಾಮೃಗ’, ‘ಸೀತಾ ಪರಿತ್ಯಾಗ’ದಂತಹ ಪೌರಾಣಿಕ ಪ್ರಸಂಗಗಳನ್ನೂ ಪ್ರದರ್ಶಿಸಲಿದೆ.

ಮಹಿಳಾ ಕಲಾವಿದರು ಮತ್ತು ಪ್ರಸಂಗಕರ್ತರ ಸಾಧನೆ
ಈ ಸಾಲಿನ ತಿರುಗಾಟದಲ್ಲಿ ಮಹಿಳಾ ಪ್ರತಿಭೆಗಳ ಭಾಗವಹಿಸುವಿಕೆ ಗಮನಾರ್ಹವಾಗಿದೆ:

ಪುತ್ತೂರು ಮೇಳದಲ್ಲಿ ಶ್ರೀಶಾವಾಸವಿ ತುಳುನಾಡ್ ಮತ್ತು ಪೂರ್ವಿ ಗೌಡ ಪೋಳ್ಯ ವೇಷಧಾರಿಗಳಾಗಿ ಬಣ್ಣ ಹಚ್ಚಲಿದ್ದಾರೆ. ಕುಕ್ಕೆ ಸುಬ್ರಹ್ಮಣ್ಯ ಮೇಳದಲ್ಲಿ ಹೇಮಸ್ವಾತಿ ಕುರಿಯಾಜೆ ಅವರು ಭಾಗವತರಾಗಿ ರಂಗಸ್ಥಳ ಮುನ್ನಡೆಸಲಿದ್ದಾರೆ.
ಪ್ರಸಂಗ ರಚನಾ ಕ್ಷೇತ್ರದಲ್ಲಿ ಶುಭಾಶಯ ಜೈನ್ ಮತ್ತು ಅಂಬಿಕಾ ಪೂಜಾರಿ ವಕ್ವಾಡಿ ಅವರ ಕೃತಿಗಳು ಈ ಬಾರಿ ರಂಗವೇರಲಿವೆ.

ಒಟ್ಟಾರೆಯಾಗಿ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳ ಹಳ್ಳಿಗಳ ಬಯಲು ರಂಗಸ್ಥಳಗಳಿಂದ ಹಿಡಿದು ನಗರಗಳ ಸಭಾಂಗಣಗಳವರೆಗೆ ಮುಂದಿನ ಆರು ತಿಂಗಳು ಪೌರಾಣಿಕ, ಸಾಮಾಜಿಕ ಹಾಗೂ ತುಳು ಪ್ರಸಂಗಗಳ ರಸದೌತಣ ಯಕ್ಷಪ್ರಿಯರಿಗೆ ಸಿಗಲಿದೆ.

Advertisement
Advertisement