ಕರ್ನಾಟಕದಲ್ಲಿ ಕನ್ನಡ ಬಳಿಕ ಹೆಚ್ಚು ಬಳಸಲ್ಪಡುವ ಭಾಷೆ ಯಾವುದು ಗೊತ್ತಾ? ಇಲ್ಲಿದೆ ನೋಡಿ ಟಾಪ್ 5 ಭಾಷೆಗಳು

ಕರ್ನಾಟಕದಲ್ಲಿ ಕನ್ನಡವೇ ಸಾರ್ವಭೌಮ. ಸುಮಾರು 2000ಕ್ಕೂ ಹೆಚ್ಚಿನ ವರ್ಷಗಳ ಇತಿಹಾಸವಿರುವ ಕನ್ನಡ ಕರ್ನಾಟಕದಲ್ಲಿ ರಾಜ್ಯ ಭಾಷೆ ಹಾಗೂ ಅಧಿಕೃತ ಭಾಷೆ. ಅತ್ಯಂತ ಶ್ರೀಮಂತವಾದ ಇತಿಹಾಸವನ್ನು ಹೊಂದಿರುವ ಶಾಸ್ತ್ರೀಯ ಭಾಷೆಗಳ ಸ್ಥಾನದಲ್ಲಿ ಸೇರಿರುವ ಕನ್ನಡವನ್ನು ಇಂದು ಅಸಡ್ಡೆ ಮಾಡುವವರೇ ಹೆಚ್ಚು. ಕರ್ನಾಟಕದಲ್ಲಿಯೇ ಕನ್ನಡಿಗರು ಕನ್ನಡವನ್ನು ಮಾತನಾಡದಿರುವುದು ವಿಷಾದದ ಸಂಗತಿ. ಹೀಗಿರುವಾಗ ಇದೀಗ ರಾಜ್ಯದಲ್ಲಿ ಕನ್ನಡವನ್ನು ಬಿಟ್ರೆ ಹೆಚ್ಚು ಬಳಸಲ್ಪಡುವ ಭಾಷೆ ಯಾವುದು ಎಂಬ ವಿಚಾರದ ಕುರಿತು ಅಂಕಿ ಅಂಶಗಳು ಬಯಲಾಗಿವೆ. ಹಾಗಿದ್ರೆ ಕನ್ನಡ ಬಿಟ್ರೆ ಹೆಚ್ಚು ಮಾತಾಡೋ ಭಾಷೆ ಯಾವುದು ನೋಡೋಣ.

Sponsored

ಕರ್ನಾಟಕದಲ್ಲಿ ಕನ್ನಡ ಮಾತನಾಡುವವರ ಸಂಖ್ಯೆ ಜನಗಣತಿ ವರದಿಯ ಪ್ರಕಾರ ಶೇ 65% ಇದೆ. ಅಂದರೆ ಕರ್ನಾಟಕದಲ್ಲಿ ವಾಸಿಸುವ 65% ಕ್ಕೂ ಹೆಚ್ಚು ಜನರು ಕನ್ನಡವನ್ನು ತಮ್ಮ ಪ್ರಾಥಮಿಕ ಭಾಷೆಯಾಗಿಸಿಕೊಂಡಿದ್ದಾರೆ. ಇಂದು ಕರ್ನಾಟಕದಲ್ಲಿ ಮಾತ್ರವಲ್ಲದೆ ನೆರೆಯ ರಾಜ್ಯಗಳಲ್ಲಿಯೂ ಕನ್ನಡ ಮಾತನಾಡುತ್ತಾರೆ, ಸುಮಾರು 45-50 ಮಿಲಿಯನ್ ಜನರು ಮಾತನಾಡುವವರು ಇದ್ದಾರೆ. ಹಾಗಿದ್ದರೆ ಕರ್ನಾಟಕದಲ್ಲಿ ಬಳಸಲ್ಪಡುವ ಟಾಪ್ 5 ಭಾಷೆಗಳು ಯಾವುವು ಎಂದು ನೋಡೋಣ ಬನ್ನಿ.

1. ಕನ್ನಡ

ಕರ್ನಾಟಕದಲ್ಲಿ  ಸುಮಾರು 65% ಜನರು ಕನ್ನಡವನ್ನು ತಮ್ಮ ಮಾತೃಭಾಷೆಯಾಗಿ ಬಳಸುತ್ತಾರೆ. ಸುಮಾರು 2000 ವರ್ಷಗಳಿಗೂ ಹೆಚ್ಚು ಪ್ರಾಚೀನ ಇತಿಹಾಸವನ್ನು ಹೊಂದಿರುವ ಕನ್ನಡ ಭಾಷೆಯು, ದೇಶದಲ್ಲಿಯೇ ಅತ್ಯಂತ ಹಳೆಯ ಭಾಷೆಗಳ ಪೈಕಿ ಸ್ಥಾನವನ್ನು ಪಡೆದುಕೊಂಡಿದೆ. ಕನ್ನಡ ಲಿಪಿಯನ್ನು ವಿನೋಬಾ ಬಾವೇ ಅವರು ಲಿಪಿಗಳ ರಾಣಿ ಎಂದು ಕರೆದಿದ್ದಾರೆ. ಅಲ್ಲದೆ ದೇಶದಲ್ಲಿಯೇ ಅತಿ ಹೆಚ್ಚು ಜ್ಞಾನಪೀಠ ಪ್ರಶಸ್ತಿಗಳನ್ನು ಮುಡುಗೇರಿಸಿಕೊಂಡಿರುವ ಶ್ರೀಮಂತ ಸಾಹಿತ್ಯ ನಮ್ಮದು ಎಂಬುದು ಹಿರಿಮೆಯ ಸಂಗತಿ.

2. ಉರ್ದು

ಕರ್ನಾಟಕದ ಎರಡನೇ ಅತಿ ಹೆಚ್ಚು ಮಾತನಾಡುವ ಭಾಷೆ ಉರ್ದು. ಉರ್ದುವನ್ನು ಪ್ರಧಾನವಾಗಿ ಮುಸ್ಲಿಮರು, ವಿಶೇಷವಾಗಿ ಬೆಂಗಳೂರು, ಕಲಬುರಗಿ ಮತ್ತು ಬೀದರ್ ನಂತಹ ನಗರಗಳಲ್ಲಿ ಮಾತನಾಡುತ್ತಾರೆ. ಉರ್ದು ಭಾಷೆಯು ಹಿಂದಿ ಭಾಷೆಯೊಂದಿಗೆ ಹೋಲಿಕೆಗಳನ್ನು ಹೊಂದಿದೆ. 

3. ತೆಲುಗು

ಕರ್ನಾಟಕದಲ್ಲಿ ತೆಲುಗು ಹೆಚ್ಚಾಗಿ ಬಳಸಲ್ಪಡುವ ಭಾಷೆಗಳಲ್ಲಿ ಮೂರನೇ ಸ್ಥಾನವನ್ನು ಪಡೆದುಕೊಂಡಿದೆ. ಕೋಲಾರ, ತುಮಕೂರು ಮತ್ತು ಬಳ್ಳಾರಿಯ ಗಡಿ ಜಿಲ್ಲೆಗಳಲ್ಲಿ ಹೆಚ್ಚಿನ ಸಂಖ್ಯೆಯ ಜನರು ತೆಲುಗು ಮಾತನಾಡುತ್ತಾರೆ. ಆಂಧ್ರಪ್ರದೇಶ ಗೋ ಕರ್ನಾಟಕದೊಂದಿಗೆ ಕಡಿಯನ್ನು ಹಂಚಿಕೊಂಡಿರುವ ಕಾರಣ ಗಡಿಭಾಗದ ಜನರು ಹೆಚ್ಚಾಗಿ ತೆಲುಗು ಭಾಷೆಯನ್ನು ಬಳಸುತ್ತಾರೆ. ಕರ್ನಾಟಕದಲ್ಲಿ ತಲೆಮಾರುಗಳಿಂದ ವಾಸಿಸುವ ತೆಲುಗು ಮಾತನಾಡುವ ಕುಟುಂಬಗಳ ಸಂಖ್ಯೆಯು ದೊಡ್ಡದಿದೆ.

4. ತಮಿಳು

ದಕ್ಷಿಣ ಕರ್ನಾಟಕದ ಗಡಿ ಪ್ರದೇಶಗಳಲ್ಲಿ ವಾಸಿಸುವ ಗುಂಪುಗಳು ತಮಿಳು ಭಾಷೆಯನ್ನು ಬಳಸುತ್ತವೆ. ಇವುಗಳಲ್ಲಿ ತಮಿಳುನಾಡಿಗೆ ಹತ್ತಿರವಿರುವ ಪ್ರದೇಶಗಳು ಸೇರಿವೆ. ತಮಿಳು ಭಾಷೆ ವಿಶ್ವದ ಪ್ರಾಚೀನ ಶಾಸ್ತ್ರೀಯ ಭಾಷೆಯಾಗಿದೆ.

5. ಮರಾಠಿ

ಬೆಳಗಾವಿ ಮತ್ತು ಬೀದರ್ ಸೇರಿದಂತೆ ಉತ್ತರ ಕರ್ನಾಟಕ ಪ್ರದೇಶಗಳಲ್ಲಿ ಮರಾಠಿ ಭಾಷೆಯನ್ನು ಮಾತನಾಡುತ್ತಾರೆ. ಮರಾಠಿ ಮಾತನಾಡುವ ಗುಂಪುಗಳು ಈ ಪ್ರದೇಶಗಳಲ್ಲಿ ದೀರ್ಘಕಾಲದಿಂದ ವಾಸಿಸುತ್ತಿವೆ. ಇದು ಕರ್ನಾಟಕ ಮತ್ತು ಮಹಾರಾಷ್ಟ್ರದ ಗಾಢವಾದ ಸಂಬಂಧಕ್ಕೆ ಸಾಕ್ಷಿಯಾಗಿದೆ.