ಕಿರುತೆರೆ ಲೋಕದ ಅತ್ಯಂತ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್ ಬಾಸ್’ ವೀಕ್ಷಕರಿಗೆ ಜಿಯೋಸ್ಟಾರ್ ಸಂಸ್ಥೆಯು ಬೃಹತ್ ಸುದ್ದಿಯೊಂದನ್ನು ನೀಡಿದ್ದು, ಆರು ಭಾಷೆಗಳ (ಕನ್ನಡ, ಹಿಂದಿ, ತಮಿಳು, ತೆಲುಗು, ಮಲಯಾಳಂ ಮತ್ತು ಬಾಂಗ್ಲಾ) ಆವೃತ್ತಿಗಳು ಒಂದೇ ಅವಧಿಯಲ್ಲಿ ಒಟ್ಟಿಗೆ ಶುರುವಾಗುತ್ತಿದೆ. ಅದರಲ್ಲೂ ಈ ಬಾರಿಯ ಸೀಸನ್ನ ಮತ್ತೊಂದು ಪ್ರಮುಖ ಆಕರ್ಷಣೆಯೆಂದರೆ, ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಬಿಗ್ ಬಾಸ್ ಅಖಾಡಕ್ಕೆ ಕಾಲಿಡುತ್ತಿರುವುದು.
ಹೌದು, ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಬಿಗ್ ಬಾಸ್ ಅಖಾಡಕ್ಕೆ ಕಾಲಿಡುತ್ತಿದ್ದು, ಅವರು ಮುಂಬರುವ ಬಾಂಗ್ಲಾ ಆವೃತ್ತಿಯ ನಿರೂಪಕರಾಗಿ ಕಾಣಿಸಿಕೊಳ್ಳಲಿದ್ದಾರೆ. ಅವರು ಕಿರುತೆರೆಯಲ್ಲಿ ಶೋವೊಂದನ್ನು ನಡೆಸಿಕೊಡುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ.
ಈ ಮಹತ್ವದ ಘೋಷಣೆಯ ಜತೆಗೆ, ಜಿಯೋಸ್ಟಾರ್ ಸಂಸ್ಥೆಯು ‘ಇಂಡಿಯಾಸ್ ಬಿಗ್ ರಿಯಾಲಿಟಿ’ ಎಂಬ ಶೀರ್ಷಿಕೆಯ ಕಾಫಿ ಟೇಬಲ್ ಪುಸ್ತಕವನ್ನು ಅನಾವರಣಗೊಳಿಸಿದೆ. ಈ ಪುಸ್ತಕವು ಕಳೆದ ಎರಡು ದಶಕಗಳಲ್ಲಿ ಬಿಗ್ ಬಾಸ್ ಬೆಳೆದುಬಂದ ಹಾದಿ, ಬ್ರ್ಯಾಂಡ್ ಪಾಲುದಾರಿಕೆ ಹಾಗೂ ಪ್ರೇಕ್ಷಕರ ಬೆಂಬಲದ ಸಂಪೂರ್ಣ ಪಯಣವನ್ನು ದಾಖಲಿಸಿದೆ.