ಮಂಗಳೂರು: ಚರ್ಚ್‌ನಲ್ಲಿ ಲೈಂಗಿಕ ಕಿರುಕುಳ ಆರೋಪ, ಪ್ರಕರಣ ದಾಖಲು

ಮಂಗಳೂರು: ನಗರದ ಚರ್ಚ್‌ನ ಫಾದರ್‌ ಸಿಪ್ರಿಯನ್‌ ಪಿಂಟೋ ವಿರುದ್ಧ ಅಪ್ರಾಪ್ತ ಬಾಲಕನಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಮಂಗಳೂರು ದಕ್ಷಿಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Sponsored

ಅಪ್ರಾಪ್ತ ಬಾಲಕನಿಗೆ ಚಾಕಲೇಟ್‌ ನೀಡಿ ಪುಸಲಾಯಿಸಿ ಲೈಂಗಿಕ ಕಿರಕುಳ ನೀಡುತ್ತಿದ್ದರೆಂದು ದೂರಿನಲ್ಲಿ ತಿಳಿಸಲಾಗಿದೆ. ಆ.14 ರಂದು ಸಂಜೆ ವೇಳೆ ಬಾಲಕ ಚರ್ಚ್‌ಗೆ ಪ್ರಾರ್ಥನೆಗೆ ತೆರಳಿದ್ದಾಗ, ರಿಸೆಪ್ಷನಿಸ್ಟ್‌ ಕೊಠಡಿಗೆ ಕರೆಸಿದ ಫಾದರ್‌ ಲೈಂಗಿಕ ಕಿರಕುಳ ನೀಡಿದ್ದಾರೆ ಎಂದು ಆರೋಪಿಸಲಾಗಿದೆ. ಇದಕ್ಕೂ ಮೊದಲು ಚರ್ಚ್‌ನ ಸಕ್ರಿಸ್ಟಿ ಕೊಠಡಿಯ ಬಳಿಯಿದ್ದ ಇನ್ನೊಂದು ಕೊಠಡಿಗೆ ಕರೆಸಿ ಅಸಭ್ಯ ವರ್ತನೆ ಮಾಡಿದ್ದಲ್ಲದೆ, ನಂತರದ ದಿನದಲ್ಲಿಯೂ ಈ ರೀತಿಯ ಕಿರುಕುಳ ನೀಡುತ್ತಿದ್ದರು ಎಂದು ದೂರಿನಲ್ಲಿ ಉಲ್ಲೇಖ ಮಾಡಲಾಗಿದೆ.

ತನ್ನ ಸ್ನೇಹಿತರ ಜೊತೆ ಬಾಲಕ ಈ ಕುರಿತು ಹೇಳಿದಾಗ, ಅವರಿಗೂ ಈ ರೀತಿಯ ಕಿರುಕುಳ ನೀಡಿರುವುದಾಗಿ ತಿಳಿದು ಬಂದಿದೆ ಎಂದು ಆರೋಪಿಸಲಾಗಿದೆ. ಬಾಲಕ ಈ ನಿರಂತರ ಕಿರುಕುಳದಿಂದ ಭಯಗೊಂಡು ತನ್ನ ಪೋಷಕರಿಗೆ ತಿಳಿಸಿದ್ದು, ಪೋಷಕರು ಬಿಷಪ್‌ ಅವರನ್ನು ಭೇಟಿಯಾಗಿ ವಿಷಯ ತಿಳಿಸಿದಾಗ, ಪೊಲೀಸರಿಗೆ ದೂರು ನೀಡುವಂತೆ ಸೂಚಿಸಿದ ಕಾರಣ ದೂರು ದಾಖಲು ಮಾಡಲಾಗಿದೆ ಎಂದು ವರದಿಯಾಗಿದೆ.