‘ಸುತ್ತಲೂ ಬರೀ ಗಂಡಸರೇ ಇದ್ದಾರೆ’ ಎಂದು ಅಮ್ಮನಿಗೆ ಫೋನ್ ಮಾಡಿದ ಯುವತಿ ಶವ ರೈಲ್ವೆ ಹಳಿಯ ಬಳಿ ಪತ್ತೆ

ರೈಲಿನಲ್ಲಿ ಪ್ರಯಾಣಿಸುವಾಗ ‘ನನ್ನ ಸುತ್ತಲೂ ಬರೀ ಪುರುಷರೇ ಇದ್ದಾರೆ’ ಎಂದು ಕುಟುಂಬದವರಿಗೆ ಹಾಗೂ ಸ್ನೇಹಿತರಿಗೆ ಆತಂಕದಿಂದ ಕೊನೆಯ ಮೆಸೇಜ್ ಕಳುಹಿಸಿದ್ದ ಅಸ್ಸಾಂ ಮೂಲದ 20 ವರ್ಷದ ಡ್ಯಾನ್ಸರ್ ಆಂಧ್ರಪ್ರದೇಶದ‌ ಶ್ರೀಕಾಕುಳಂನಲ್ಲಿ ಶವವಾಗಿ ಪತ್ತೆಯಾಗಿರುವ ಆಘಾತಕಾರಿ ಘಟನೆ ನಡೆದಿದೆ.

Sponsored

ಮೃತ ಯುವತಿ ಅಸ್ಸಾಂನ ಕಾಮರೂಪ್ ಜಿಲ್ಲೆಯವಳಾಗಿದ್ದು, ಗುವಾಹಟಿಯ ಬಿ. ಬೊರುವಾ ಕಾಲೇಜಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದಳು. ವಿಶಾಖಪಟ್ಟಣದಲ್ಲಿ ಆಯೋಜಿಸಲಾಗಿದ್ದ ನೃತ್ಯ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಈಕೆ, ಅಕ್ಟೋಬರ್ 10 ರಂದು ನಡೆಯಬೇಕಿದ್ದ ಬ್ಯಾಂಕ್ ಪರೀಕ್ಷೆಗೆ ಹಾಜರಾಗಲು ಗುವಾಹಟಿಗೆ ಮರಳಲು ನಿರ್ಧರಿಸಿದ್ದಳು. ಅಕ್ಟೋಬರ್ 5 ರ ರಾತ್ರಿ ವಿಶಾಖಪಟ್ಟಣ ರೈಲು ನಿಲ್ದಾಣಕ್ಕೆ ತೆರಳಿ, ಗುವಾಹಟಿಗೆ ತೆರಳುವ ‘ದಿಬ್ರುಗಢ್ ವಿವೇಕ್ ಎಕ್ಸ್‌ಪ್ರೆಸ್’ (ರೈಲು ಸಂಖ್ಯೆ 22503) ಹತ್ತಿದ್ದಳು.

ಪ್ರಯಾಣದ ಸಮಯದಲ್ಲಿ ಆಕೆ ಇದ್ದ ‘S2’ ಬೋಗಿಯಲ್ಲಿ ವಿಪರೀತ ಜನಸಂದಣಿಯಿತ್ತು. ಬೋಗಿಯಲ್ಲಿ ತನ್ನ ಸುತ್ತಲೂ ಹೆಚ್ಚಾಗಿ ಪುರುಷ ಪ್ರಯಾಣಿಕರೇ ತುಂಬಿದ್ದರಿಂದ ಭಯವಾಗುತ್ತಿದೆ ಎಂದು ಸ್ನೇಹಿತರಿಗೆ ಮತ್ತು ಕುಟುಂಬಸ್ಥರಿಗೆ ಸಂದೇಶ ಕಳುಹಿಸಿದ್ದಳು. ಅಕ್ಟೋಬರ್ 6 ರಂದು ನಸುಕಿನ ಜಾವ 2:39 ಕ್ಕೆ ಕೊನೆಯ ಬಾರಿಗೆ ಸಂಭಾಷಣೆ ನಡೆಸಿದ್ದ ಆಕೆಯ ಫೋನ್, ತದನಂತರ ಸಂಪೂರ್ಣವಾಗಿ ಸ್ವಿಚ್ ಆಫ್ ಆಗಿತ್ತು.

ಮಗಳ ಸುಳಿವು ಸಿಗದಿದ್ದಾಗ ಆತಂಕಗೊಂಡ ತಾಯಿ ಗುವಾಹಟಿಯ ರೈಲ್ವೆ ಪೊಲೀಸ್ (GRP) ಮತ್ತು ರೈಲ್ವೆ ಸಹಾಯವಾಣಿ 139ಕ್ಕೆ ದೂರು ನೀಡಿದ್ದರು. ರೈಲಿನ S2 ಕೋಚ್‌ನಲ್ಲಿ ಯುವತಿಯ ಬ್ಯಾಗ್ ಹಾಗೂ ವೈಯಕ್ತಿಕ ವಸ್ತುಗಳು ಪತ್ತೆಯಾಗಿದ್ದವು. ಆದರೆ ಯುವತಿ ಪತ್ತೆಯಾಗಿರಲಿಲ್ಲ. ತೀವ್ರ ಹುಡುಕಾಟದ ಬಳಿಕ, ಆಂಧ್ರಪ್ರದೇಶದ ಶ್ರೀಕಾಕುಲಂ ಜಿಲ್ಲೆಯ ಮಲಯಪುರಂ ಅರಣ್ಯ ಪ್ರದೇಶದ ಬಳಿಯ ರೈಲ್ವೆ ಹಳಿಯ ಪಕ್ಕದಲ್ಲಿ ಆಕೆಯ ಶವ ಪತ್ತೆಯಾಗಿದೆ.

ಯುವತಿ ಚಲಿಸುವ ರೈಲಿನಿಂದ ಆಕಸ್ಮಿಕವಾಗಿ ಬಿದ್ದು ಮೃತಪಟ್ಟಿದ್ದಾಳೆಯೇ ಅಥವಾ ಆಕೆಯ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿ ತಳ್ಳಿ ಕೊಲೆ ಮಾಡಲಾಗಿದೆಯೇ ಎಂಬುದನ್ನು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಮರಣೋತ್ತರ ಪರೀಕ್ಷೆ (Post-Mortem) ಹಾಗೂ ಫೋರೆನ್ಸಿಕ್ ವರದಿ ಬಂದ ಬಳಿಕ ಸಾವಿನ ನೈಜ ಕಾರಣ ಬೆಳಕಿಗೆ ಬರಬೇಕಿದೆ. ಇದಲ್ಲದೆ, ವಿಶಾಖಪಟ್ಟಣಂ ರೈಲ್ವೆ ಪ್ಲಾಟ್‌ಫಾರ್ಮ್‌ನಲ್ಲಿ ಆಕೆಯೊಂದಿಗೆ ಕಾಣಿಸಿಕೊಂಡಿದ್ದ ಅಪರಿಚಿತ ವ್ಯಕ್ತಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದು, ಪ್ರಕರಣದಲ್ಲಿ ಆತನ ಪಾತ್ರವೇನಾದರೂ ಇದೆಯೇ ಎಂಬುದನ್ನು ಪತ್ತೆಹಚ್ಚಲು ರೈಲ್ವೆ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.