ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ, ಉದ್ಯಮಿ ಇಲಾನ್ ಮಸ್ಕ್ ಈಗ ಜಗತ್ತಿನ ಇತಿಹಾಸದಲ್ಲೇ ಮೊದಲ ‘ಟ್ರಿಲಿಯನೇರ್’ (ಲಕ್ಷ ಕೋಟಿ ಡಾಲರ್ ಒಡೆಯ) ಆಗಿ ಹೊರಹೊಮ್ಮಿದ್ದಾರೆ.
ಮಸ್ಕ್ ಅವರ ಮಾಲೀಕತ್ವದ ಬಾಹ್ಯಾಕಾಶ ಸಂಸ್ಥೆಯಾದ ‘ಸ್ಪೇಸ್ಎಕ್ಸ್’ (SpaceX) ಶೇರು ಮಾರುಕಟ್ಟೆಗೆ ಲಗ್ಗೆ ಇಟ್ಟಿದ್ದು, ಇದರ ಬೆನ್ನಲ್ಲೇ ಮಸ್ಕ್ ಅವರ ಆಸ್ತಿ ಮೌಲ್ಯವು ಈ ಅಭೂತಪೂರ್ವ ಮೈಲಿಗಲ್ಲನ್ನು ದಾಟಿದೆ. ಷೇರು ಮಾರುಕಟ್ಟೆಯ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಐಪಿಒ (IPO – Initial Public Offering) ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದ ಸ್ಪೇಸ್ಎಕ್ಸ್, ನಾಸ್ದಾಕ್ (Nasdaq) ಮಾರುಕಟ್ಟೆಯಲ್ಲಿ ‘SPCX’ ಹೆಸರಿನಲ್ಲಿ ವಹಿವಾಟು ಆರಂಭಿಸಿದೆ.
ಕಂಪನಿಯು ಪ್ರತಿ ಷೇರಿಗೆ $135 ರಂತೆ ಒಟ್ಟು 55.56 ಕೋಟಿ ಷೇರುಗಳನ್ನು ಮಾರಾಟ ಮಾಡಿದ್ದು, ಇದರ ಮೂಲಕ ಸುಮಾರು $75 ಬಿಲಿಯನ್ (ರೂ. 6.2 ಲಕ್ಷ ಕೋಟಿಗೂ ಅಧಿಕ) ಬಂಡವಾಳವನ್ನು ಸಂಗ್ರಹಿಸಿದೆ. ಇದು 2019 ರಲ್ಲಿ ಸೌದಿ ಅರಾಮ್ಕೋ ನಿರ್ಮಿಸಿದ್ದ ಜಗತ್ತಿನ ಅತಿ ದೊಡ್ಡ ಐಪಿಒ ದಾಖಲೆಯನ್ನು ಮುರಿದಿದೆ.
ಷೇರು ಮಾರುಕಟ್ಟೆಯಲ್ಲಿ ಸ್ಪೇಸ್ಎಕ್ಸ್ ವಹಿವಾಟು ಆರಂಭಿಸುತ್ತಿದ್ದಂತೆ ಕಂಪನಿಯ ಷೇರುಗಳು ಶೇ. 11 ಕ್ಕೂ ಹೆಚ್ಚು ಜಿಗಿತ ಕಂಡಿವೆ. ಈ ಐಪಿಒ ಯಶಸ್ಸಿನಿಂದಾಗಿ ಕೇವಲ ಇಲಾನ್ ಮಸ್ಕ್ ಮಾತ್ರವಲ್ಲದೆ, ಸ್ಪೇಸ್ಎಕ್ಸ್ನಲ್ಲಿ ಕೆಲಸ ಮಾಡುವ ಎಂಜಿನಿಯರ್ಗಳು ಸೇರಿದಂತೆ ಸುಮಾರು 4,400 ಕ್ಕೂ ಹೆಚ್ಚು ಉದ್ಯೋಗಿಗಳು ರಾತ್ರೋರಾತ್ರಿ ಕೋಟ್ಯಾಧಿಪತಿಗಳಾಗಿ ಹೊರಹಮ್ಮಿದ್ದಾರೆ.
ಈಗಿನ ಆಸ್ತಿ ಎಷ್ಟು?
ಇತ್ತೀಚಿನ ಅಂದಾಜಿನ ಪ್ರಕಾರ, ಎಲನ್ ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು 707 ಬಿಲಿಯನ್ ಡಾಲರ್ ಆಗಿದೆ. 2026ರಲ್ಲಿ ಮಾತ್ರವೇ ಅವರ ಆಸ್ತಿಯಲ್ಲಿ ಸುಮಾರು 87.5 ಬಿಲಿಯನ್ ಡಾಲರ್ ಹೆಚ್ಚಳವಾಗಿದೆ.