‘ವಂದೇ ಭಾರತ್‌’ ರೈಲಿನಲ್ಲಿ ಸೂರತ್‌ನಿಂದ ಅಹಮದಾಬಾದ್‌ಗೆ ಜೀವಂತ ಹೃದಯ ರವಾನೆ!!

ಭಾರತೀಯ ರೈಲ್ವೆ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಎಂಬಂತೆ ಜೀವಂತ ಮಾನವ ಹೃದಯವೊಂದನ್ನು ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲಿನ ಮೂಲಕ ಸೂರತ್‌ನಿಂದ ಅಹಮದಾಬಾದ್‌ಗೆ ಯಶಸ್ವಿಯಾಗಿ ರವಾನಿಸಲಾಗಿದೆ.

Sponsored

ರೈಲಿನಲ್ಲಿ ತಂದ ಹೃದಯವನ್ನು ಬಳಸಿಕೊಂಡು ಅಹಮದಾಬಾದ್‌ನ ‘ಯು.ಎನ್. ಮೆಹ್ತಾ ಹೃದ್ರೋಗ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆ’ಯ ವೈದ್ಯರು ರೋಗಿಯೊಬ್ಬರಿಗೆ ಯಶಸ್ವಿಯಾಗಿ ಹೃದಯ ಕಸಿ ಶಸ್ತ್ರಚಿಕಿ ನಡೆಸಿದ್ದಾರೆ.  ವೈದ್ಯರು ಹೃದಯವನ್ನು ವಿಶೇಷ ಸಂರಕ್ಷಣಾ ಪೆಟ್ಟಿಗೆಯಲ್ಲಿ ಇರಿಸಿ ಸೂರತ್ ರೈಲು ನಿಲ್ದಾಣದಿಂದ ವಂದೇ ಭಾರತ್ ರೈಲಿನಲ್ಲಿ ಅಹಮದಾಬಾದ್‌ಗೆ ಕೊಂಡೊಯ್ದರು. ರೈಲು ತಲುಪುತ್ತಿದ್ದಂತೆಯೇ ಪೂರ್ವಸಿದ್ಧವಾಗಿದ್ದ ಗ್ರೀನ್ ಕಾರಿಡಾರ್‌ ಮೂಲಕ ಆಂಬುಲೆನ್ಸ್‌ನಲ್ಲಿ ಆಸ್ಪತ್ರೆಗೆ ರವಾನಿಸಲಾಯಿತು. ನಂತರ ರೋಗಿಗೆ ಯಶಸ್ವಿಯಾಗಿ ಹೃದಯ ಕಸಿ ಮಾಡಲಾಯಿತು.

250 ಕಿ.ಮೀ. ದೂರವನ್ನು ಶರವೇಗದಲ್ಲಿ ಕ್ರಮಿಸಿದ ‘ವಂದೇ ಭಾರತ್’

ಮುಂಬೈ ಸೆಂಟ್ರಲ್ ಮತ್ತು ಗಾಂಧಿನಗರ ಕ್ಯಾಪಿಟಲ್ ನಡುವೆ ಸಂಚರಿಸುವ ವಂದೇ ಭಾರತ್ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ 20901) ಮೂಲಕ ಈ ವಿಶೇಷ ಜೀವ ರಕ್ಷಣಾ ಕಾರ್ಯಾಚರಣೆ ನಡೆದಿದೆ. ಸೂರತ್‌ನಿಂದ ಅಹಮದಾಬಾದ್‌ವರೆಗಿನ ಸುಮಾರು 250 ಕಿಲೋಮೀಟರ್ ಅಂತರವನ್ನು ಈ ರೈಲು ಕೇವಲ 217 ನಿಮಿಷಗಳಲ್ಲಿ (ಅಂದಾಜು 3.5 ಗಂಟೆ) ಕ್ರಮಿಸಿತು. ಸಮಯಕ್ಕೆ ಸರಿಯಾಗಿ ಹೃದಯವನ್ನು ತಲುಪಿಸುವಲ್ಲಿ ರೈಲಿನ ವೇಗ ಮತ್ತು ಸಮಯಪಾಲನೆ ಪ್ರಮುಖ ಪಾತ್ರ ವಹಿಸಿತು.

ಒಡಿಶಾ ಮೂಲದ, ಸೂರತ್‌ನಲ್ಲಿ ಜವಳಿ ಕಾರ್ಮಿಕರಾಗಿ ಕೆಲಸ ಮಾಡುತ್ತಿದ್ದ 36 ವರ್ಷದ ಮಿಥುನ್ ಲಕ್ಷ್ಮಣ್ ಸ್ವೈನ್ ಎಂಬುವವರು ಸೂರತ್‌ನ ನ್ಯೂ ಸಿವಿಲ್ ಆಸ್ಪತ್ರೆಯಲ್ಲಿ ‘ಬ್ರೈನ್ ಡೆಡ್’ ಆದಾಗ, ಅವರ ಕುಟುಂಬದವರು ಅಂಗಾಂಗ ದಾನಕ್ಕೆ ಮುಂದೆ ಬಂದರು. ಹೀಗೆ ದಾನವಾಗಿ ಸಿಕ್ಕ ಹೃದಯವನ್ನು ಅಹಮದಾಬಾದ್‌ಗೆ ಸಾಗಿಸಲು ವಂದೇ ಭಾರತ್ ರೈಲನ್ನು ಆಯ್ಕೆ ಮಾಡಿಕೊಳ್ಳಲಾಗಿತ್ತು. 

ರೈಲು ಅಹಮದಾಬಾದ್ ನಿಲ್ದಾಣದ ಒಂದನೇ ಪ್ಲಾಟ್‌ಫಾರ್ಮ್‌ಗೆ ಆಗಮಿಸುತ್ತಿದ್ದಂತೆಯೇ, ರೈಲ್ವೆ ರಕ್ಷಣಾ ಪಡೆ (RPF) ಮತ್ತು ಗುಜರಾತ್ ಪೊಲೀಸರು ನಿಲ್ದಾಣದಿಂದ ಆಸ್ಪತ್ರೆಯವರೆಗೆ ವಿಶೇಷ ‘ಗ್ರೀನ್ ಕಾರಿಡಾರ್’ ನಿರ್ಮಿಸಿದ್ದರು. ಇದರಿಂದಾಗಿ ಆಂಬುಲೆನ್ಸ್ ಯಾವುದೇ ಟ್ರಾಫಿಕ್ ಕಿರಿಕಿರಿಯಿಲ್ಲದೆ ಅತ್ಯಂತ ವೇಗವಾಗಿ ಆಸ್ಪತ್ರೆಯನ್ನು ತಲುಪಲು ಸಾಧ್ಯವಾಯಿತು.

ಈ ಕಾರ್ಯಾಚರಣೆಯಲ್ಲಿ ರೈಲ್ವೆ ಅಧಿಕಾರಿಗಳು, ರೈಲು ಸಿಬ್ಬಂದಿ, ವೈದ್ಯರು, ಪೊಲೀಸರು ಮತ್ತು ಸಂಚಾರ ವಿಭಾಗದ ಅಧಿಕಾರಿಗಳು ಸಮನ್ವಯದಿಂದ ಕಾರ್ಯನಿರ್ವಹಿಸಿದ್ದರು. ಸಮಯದ ಮಹತ್ವವನ್ನು ಗಮನದಲ್ಲಿಟ್ಟುಕೊಂಡು ಎಲ್ಲ ಹಂತಗಳಲ್ಲೂ ವಿಶೇಷ ವ್ಯವಸ್ಥೆ ಮಾಡಲಾಗಿತ್ತು