‘ಅದಕ್ಕೆ ಜಸ್ಟ್ 2 ನಿಮಿಷ ಸಾಕು ಅಷ್ಟೇ’ – ಕಾರಲ್ಲಿ ಪರಿಚಿತನಿಂದಲೇ ಯುವತಿಗೆ ಲೈಂಗಿಕ ಕಿರುಕುಳ

ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಚಲಿಸುತ್ತಿರುವ ಕಾರಿನಲ್ಲಿ 24 ವರ್ಷದ ಯುವತಿಯೊಬ್ಬಳಿಗೆ ಪರಿಚಿತ ವ್ಯಕ್ತಿಯೊಬ್ಬ ಲೈಂಗಿಕ ಕಿರುಕುಳ ನೀಡಿದ ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಈ ಇಡೀ ಘಟನೆಯನ್ನು ಯುವತಿ ತನ್ನ ಮೊಬೈಲ್ ಫೋನ್‌ನಲ್ಲಿ ಚಿತ್ರೀಕರಿಸಿ, ಆರೋಪಿಯ ಮಾನ ಹರಾಜಾಕಿದ್ದಾಳೆ.

Sponsored

ಸಂತ್ರಸ್ತೆ ದೆಹಲಿಯ ಮಂಡಾವಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಳಿಸಿದ್ದಾಳೆ. ದೂರಿನ ಪ್ರಕಾರ, ಆರೋಪಿ ಯುವತಿಗೆ ಮೊದಲೇ ಪರಿಚಿತನಾಗಿದ್ದ ಎನ್ನಲಾಗಿದೆ. ಮೊಮೊಸ್ ತಿನ್ನಲು ಹೋಗೋಣ ಎಂದು ನಂಬಿಸಿ ಆಕೆಯನ್ನು ಕಾರಿನಲ್ಲಿ ಕರೆದೊಯ್ದಿದ್ದ ಆತ, ಆ ಬಳಿಕ ಕಾರಿಗೆ ಸಿಎನ್‌ಜಿ ಗ್ಯಾಸ್ ತುಂಬಿಸಬೇಕೆಂದು ನೆಪ ಹೇಳಿ ವಾಹನವನ್ನು ಜನರಿಲ್ಲದ ನಿರ್ಜನ ಪ್ರದೇಶದ ಕಡೆಗೆ ತಿರುಗಿಸಿದ್ದಾನೆ. ಆ ನಿರ್ಜನ ರಸ್ತೆಯಲ್ಲಿ ಕಾರು ಚಲಿಸುತ್ತಿರುವಾಗಲೇ ಯುವತಿಯ ಜೊತೆ ಅತ್ಯಂತ ಅಸಭ್ಯವಾಗಿ ವರ್ತಿಸಲು ಆರಂಭಿಸಿದ್ದಾನೆ. ಆಕೆಗೆ ಅಶ್ಲೀಲ ಮಾತುಗಳಿಂದ ಚುಡಾಯಿಸಿ, ಲೈಂಗಿಕ ಸುಖ ನೀಡುವಂತೆ ಬೇಡಿಕೆ ಇಟ್ಟಿದ್ದಲ್ಲದೆ, ಆಕೆಯ ಅನುಮತಿಯಿಲ್ಲದೆ ಅಸಭ್ಯವಾಗಿ ಸ್ಪರ್ಶಿಸಿದ್ದಾನೆ. ಇದರಿಂದ ಗಾಬರಿಗೊಂಡ ಯುವತಿ ಕಾರಿನಿಂದ ಕೆಳಗೆ ಇಳಿಯಲು ಯತ್ನಿಸಿದಾಗ, ಆಕೆಯನ್ನು ಬಲವಂತವಾಗಿ ತಡೆದು ಕಾರಿನೊಳಗೆ ಬಂಧಿಸಿಟ್ಟಿದ್ದಾನೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಈ ಭೀಕರ ಕಿರುಕುಳದ ನಡುವೆಯೂ ಯುವತಿ ಧೈರ್ಯ ಕಳೆದುಕೊಳ್ಳದೆ, ತನ್ನ ಮೊಬೈಲ್ ಆನ್ ಮಾಡಿ ವಿಡಿಯೋ ರೆಕಾರ್ಡ್ ಮಾಡಿಕೊಂಡಿದ್ದಾಳೆ. ವಿಡಿಯೋದಲ್ಲಿ ಯುವತಿ ತನ್ನನ್ನು ಬಿಟ್ಟುಬಿಡುವಂತೆ ಆರೋಪಿಯಲ್ಲಿ ಕಣ್ಣೀರಿಡುತ್ತಾ ಬೇಡಿಕೊಳ್ಳುತ್ತಿರುವುದು ಕೇಳಿಬಂದಿದೆ. ಅಲ್ಲದೆ “ನೀನು ನನ್ನನ್ನು ಮುಟ್ಟಿದರೆ, ನಾನು ಚಲಿಸುತ್ತಿರುವ ವಾಹನದ ಮುಂದೆ ಬಿದ್ದು ಪ್ರಾಣ ಕಳೆದುಕೊಳ್ಳುತ್ತೇನೆ, ನನ್ನ ದೇಹವನ್ನು ಮುಟ್ಟಲು ನಾನು ಖಂಡಿತಾ ಬಿಡುವುದಿಲ್ಲ” ಎಂದು ಯುವತಿ ಕಿರುಚಾಡುತ್ತಾ ತನಗಾದ ಅನ್ಯಾಯವನ್ನು ವಿಡಿಯೋದಲ್ಲಿ ದಾಖಲಿಸಿದ್ದಾಳೆ. ಆದರೆ ಆರೋಪಿ ಮಾತ್ರ ಅತ್ಯಂತ ದರ್ಪದಿಂದ, “ಇದಕ್ಕೆ ಕೇವಲ ಎರಡು ನಿಮಿಷ ಸಮಯ ಬೇಕಾಗುತ್ತೆ ಅಷ್ಟೇ” ಎಂದು ಹೇಳುತ್ತಾ ಆಕೆಗೆ ನಿರಂತರವಾಗಿ ಪೀಡಿಸಿದ್ದಾನೆ. ಅಷ್ಟೇ ಅಲ್ಲದೆ, ಈ ವಿಷಯವನ್ನು ಯಾರಿಗಾದರೂ ಹೇಳಿದರೆ ನಿನ್ನ ಮಾನ ಕಳೆಯುತ್ತೇನೆ ಎಂದು ಯುವತಿಯ ಚಾರಿತ್ರ್ಯ ವಧೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನೆ. ಕೊನೆಗೆ ಯುವತಿ ಹೇಗೋ ಪಾರಾಗಿ ದೂರು ದಾಖಲಿಸಿದ್ದಾಳೆ.