ತೊಕ್ಕೊಟ್ಟು: ಟ್ಯಾಕ್ಸಿ ಮ್ಯಾಕ್ಸಿಕ್ಯಾಬ್ ಚಾಲಕ ಮಾಲಕರ ಸಂಘದ ಬೆಳ್ಳಿಹಬ್ಬ ಸಂಭ್ರಮ, ರಕ್ತದಾನ ಶಿಬಿರ

ಉಳ್ಳಾಲ: ಟ್ಯಾಕ್ಸಿ ಚಾಲಕರು ಮಕ್ಕಳಿಗೆ ಉನ್ನತ ಶಿಕ್ಷಣ ನೀಡಿದರೆ ಅವರು ಅತ್ಯುನ್ನತ ಹುದ್ದೆಗಳನ್ನು ಅಲಂಕರಿಸಿ ಎಲ್ಲಾ ಕಷ್ಟಗಳನ್ನು ಬಗೆಹರಿಸಲು ಸಾಧ್ಯವೆಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ. ಖಾದರ್ ಅಭಿಪ್ರಾಯಪಟ್ಟರು.
ತೊಕ್ಕೊಟ್ಟು ಕೇಂದ್ರ ಬಸ್ಸು ನಿಲ್ದಾಣದ ಬಳಿ ಟ್ಯಾಕ್ಸಿ ಪಾರ್ಕ್‌ನಲ್ಲಿ ಸೋಮವಾರ ನಡೆದ ತೊಕ್ಕೊಟ್ಟು ಟ್ಯಾಕ್ಸಿ ಮ್ಯಾಕ್ಸಿ ಕ್ಯಾಬ್ ಚಾಲಕ ಮಾಲಕರ ಸಂಘದ ಬೆಳ್ಳಿ ಹಬ್ಬ ಸಂಭ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಅವರು ಮಾತನಾಡಿದರು. ಸಂಘದ ಗೌರವಾಧ್ಯಕ್ಷ ದಿನೇಶ್ ಕುಂಪಲ ಮಾತನಾಡಿ, ಬಡಪಾಯಿ ಟ್ಯಾಕ್ಸಿ ಚಾಲಕರು ಬಾಡಿಗೆದಾರರನ್ನು ವಿಮಾನ ನಿಲ್ದಾಣದೊಳಗೆ ಬಿಟ್ಟು ಬಂದರೂ ಪಾರ್ಕಿಂಗ್ ದಂಡವೆಂಬಂತೆ ಐವತ್ತು ರೂ. ಶುಲ್ಕ ಕಟ್ಟಬೇಕಿದೆ. ಅಲ್ಲಿ ಬಾಡಿಗೆ ಪಿಕ್ ಅಪ್ ಮಾಡಿದರಂತೂ ಇನ್ನೂರು ರೂ. ಶುಲ್ಕವನ್ನು ತೆರಬೇಕಾಗಿದೆ.

Sponsored

ಟ್ಯಾಕ್ಸಿಗಳಲ್ಲಿ ಪ್ಯಾನಿಕ್ ಬಟನ್ ಯಾಕೆ ಹಾಕಿದ್ದಾರೆಂದು ಸಂಬಂಧ ಪಟ್ಟ ಪೊಲೀಸ್ ಇಲಾಖೆಗೆ ಗೊತ್ತಿಲ್ಲ. ನೂರು ಸಲ ಬಟನ್ ಅದುಮಿದರೂ ಯಾವ ಪೊಲೀಸರು ಸಹಾಯಕ್ಕೆ ಧಾವಿಸುವುದಿಲ್ಲ. ಹೀಗಿರುವಾಗ ನಾಲ್ಕು ಸಾವಿರ ರೂ. ಬೆಲೆಯ ಪ್ಯಾನಿಕ್ ಬಟನಿಗೆ ಹದಿನಾರು ಸಾವಿರ ರೂ. ಸುಳಿಗೆ ಮಾಡಲಾಗುತ್ತಿದೆ. ನಮ್ಮ ಬೇಡಿಕೆಗಳನ್ನು ಸಚಿವರು ಈಡೇರಿಸಬೇಕೆಂದು ಮನವಿ ಮಾಡಿದರು.

ಪ್ರಗತಿಪರ ಕೃಷಿಕ ಶಾಂತಾರಾಮ ಸರಳಾಯರು ಕಾರ್ಯಕ್ರಮ ಉದ್ಘಾಟಿಸಿದರು. ಸಂಘದ ಅಧ್ಯಕ್ಷ ಕ. ಪ್ರಶಾಂತ್ ಆಳ್ವ ಅಧ್ಯಕ್ಷತೆ ವಹಿಸಿದ್ದರು. ಟ್ಯಾಕ್ಸಿ ಮ ಮ್ಯಾಕ್ಸಿ ಕ್ಯಾಬ್ ಬ್ ಅಸೋಸಿಯೇಷನ್ ಜಿಲ್ಲಾಧ್ಯಕ್ಷ ಆನಂದ್ ಕೆ., ಮಾಜಿ ಕಾರ್ಯದರ್ಶಿ ಪ್ರಮೋದ್ ಉಳ್ಳಾಲ್, ಬಸ್ಸು ಮಾಲಕ ರಾಜೇಂದ್ರ ಶೆಟ್ಟಿ ಉಳ್ಳಾಲ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ರಮೇಶ್ ಶೆಟ್ಟಿ ಬೋಳಿಯಾರು, ನಗರಸಭೆ ಮಾಜಿ ಸದಸ್ಯರಾದ ಸುಹಾಸಿನಿ ಬಬ್ಬುಕಟ್ಟೆ ದಮಯಂತಿ, ಉದ್ಯಮಿ ನಿಸಾರ್ ಉಳ್ಳಾಲ್, ಶ್ರೀರಾಮ್ ಫೈನಾನ್ಸ್ ಮುಖ್ಯಸ್ಥ ಚೇತನ್ ಅರಸ್ ಇದ್ದರು. ಭಗವಾನ್ ತೊಕ್ಕೊಟ್ಟು ಸ್ವಾಗತಿಸಿ, ನಿರೂಪಿಸಿದರು.

“ಸಂಘಟನೆ ಸದೃಢವಾಗಿದೆ*

ಟ್ಯಾಕ್ಸಿ ಚಾಲಕರೇ ಪ್ರವಾಸೋದ್ಯಮದ ರಾಯಭಾರಿಯಾಗಿ ಕೆಲಸ ಮಾಡುತ್ತಿದ್ದಾರೆ. ನಮ್ಮ ಸಲಹೆಗಳನ್ನು ಆಲಿಸುವ ಕಾರ್ಯವನ್ನು ಯಾವುದೇ ಸರ್ಕಾರಗಳು ನಡೆಸಿಲ್ಲ. ನಾವು ಅವಿದ್ಯಾವಂತರು, ಅಸಂಘಟಿತರೆಂಬ ಭಾವನೆ ಅವರದ್ದಾಗಿದ್ದರೆ, ಅದು ಅವರ ತಪ್ಪು ಗ್ರಹಿಕೆಯಾಗಿದೆ. ನಮ್ಮಲ್ಲೂ ಸಾಕಷ್ಟು ವಂತರಿದ್ದಾರೆ, ಸದೃಢವಾದ ಸಂಘಟನೆಯೂ ಇದೆ ಎಂದು ದಿನೇಶ್ ಕುಂಪಲ, ಗೌರಾವಾಧ್ಯಕ್ಷ, ತೊಕ್ಕೊಟ್ಟು ಟ್ಯಾಕ್ಸಿ ಮ್ಯಾಕ್ಸಿಕ್ಯಾಬ್ ಹೇಳಿದ್ದಾರೆ.

ಗೌರವಧನ ವಿತರಣೆ, ಸನ್ಮಾನ

ಶ್ರೀರಾಮ್ ಫೈನಾನ್ಸ್‌ ವತಿಯಿಂದ ಪ್ರತಿಭಾನ್ವಿತ ವಿದ್ಯಾರ್ಥಿಗಳಿಗೆ ಗೌರವಧನ ಹಾಗೂ ವಿದ್ಯಾರ್ಥಿವೇತನ ವಿತರಿಸಲಾಯಿತು. ಸಂಘದ ಸದಸ್ಯರಾದ ಪ್ರಕಾಶ್ ಸರಳಾಯರ ಸುಪುತ್ರಿ ಡಾ. ಪಲ್ಲವಿ ಸರಳಾಯ, ಸಂಘದ ಸದಸ್ಯರು, ಪವ‌ರ್ ಲಿಫ್ಟಿಂಗ್‌ ನಲ್ಲಿ ಸಾಧನೆಗೈದ ಜಗದೀಶ್ ಸುಳಾಯ ಅವರನ್ನ ಸಚಿವ ಖಾದರ್ ಸನ್ಮಾನಿಸಿದರು. ಟ್ಯಾಕ್ಸಿ ಚಾಲಕರಿಗೆ ಮೂಲಭೂತ ಸೌಕರ್ಯಗಳನ್ನ ಒದಗಿಸಿಕೊಟ್ಟ ಸಚಿವ ಯು.ಟಿ ಖಾದರ್ ಅವರನ್ನು ಸಂಘದ ಪರವಾಗಿ ಸನ್ಮಾನಿಸಲಾಯಿತು. ಹೆಲ್ಪ್ ಲೈನ್ ಕರ್ನಾಟಕ, ದೇರಳಕಟ್ಟೆ ಯೆನೆಪೋಯ ಆಸ್ಪತ್ರೆಯ ರಕ್ತ ನಿಧಿ, ಪಂಪಲ್ ಲಯನ್ಸ್ ಕ್ಲಬ್ ಆಶ್ರಯದಲ್ಲಿ ಕಾರ್ಯಕ್ರಮ ನಡೆಯಿತು.