ಗೆಳೆಯನ ಲವ್ ನಿರಾಕರಿಸಿದ ಯುವತಿ ಮೇಲೆ ನಾಲ್ಕು ಹುಡುಗಿಯರಿಂದ ಹಲ್ಲೆ

ಹುಡುಗ, ಹುಡುಗಿಯರ ಪ್ರೇಮ ಪ್ರಸಂಗಗಳಿಗೆ ಅವರ ಗೆಳಯ, ಗೆಳತಿಯರು ಸಹಕಾರ ನೀಡುವುದು ಸಾಮಾನ್ಯ. ಕೆಲವೊಮ್ಮೆ ಹುಡುಗ ಪ್ರಪೋಸ್ ಮಾಡಿದಾಗ ಹುಡುಗಿ ಒಪ್ಪಿಕೊಳ್ಳದಿದ್ದರೆ ಆಕೆಯನ್ನು ಕನ್ವಿನ್ಸ್ ಮಾಡಲು ಆಕೆಯ ಸ್ನೇಹಿತೆಯರ ಸಹಾಯ ಪಡೆಯುವಂತಹ ಅನೇಕ ಸಂದರ್ಭಗಳು ಕೂಡ ಎದುರಾಗಿರುವುದುಂಟು. ಆದರೆ ಇಲ್ಲೊಂದೆಡೆ ಕಾಲೇಜು ಯುವಕನೊಬ್ಬನ ಪ್ರೇಮ ನಿವೇದನೆಯನ್ನು ಯುವತಿ ನಿರಾಕರಿಸಿದಳು ಎಂಬ ಕಾರಣಕ್ಕಾಗಿ ನಾಲ್ಕು ಹುಡುಗಿಯರು ಆಕೆಯ ಮೇಲೆ ಹಲ್ಲೆ ಮಾಡಿರುವ ಆಘಾತಕಾರಿ ಘಟನೆ ಎಂದು ಬೆಳಕಿಗೆ ಬಂದಿದೆ.

Sponsored

ಮಧ್ಯ ಪ್ರದೇಶದ ಸಾತ್ನ ಜಿಲ್ಲೆಯ ಖಾಸಗಿ ಕಾಲೇಜ್ ಒಂದರಲ್ಲಿ ತಮ್ಮ ಸ್ನೇಹಿತನ ಜೊತೆ ಫ್ರೆಂಡ್ಶಿಪ್ ಬೆಳೆಸಿ ಬಳಿಕ ಅವನ ಪ್ರೀತಿಯನ್ನು ಒಪ್ಪಿಕೊಂಡು ಅವನೊಂದಿಗೆ ಇರಲು ಒಪ್ಪಿಕೊಳ್ಳಲಿಲ್ಲವೆಂದು ಯುವತಿಯ ಮೇಲೆ ಯುವಕನ ನಾಲ್ಕು ಜನ ಸ್ನೇಹಿತೆಯರು ಹಿಗ್ಗಾಮುಗ್ಗ ಹಲ್ಲೆ ನಡೆಸಿದ್ದಾರೆ. ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.

ಆಗಸ್ಟ್ 5 ರಂದು ಮಧ್ಯಾಹ್ನ ಸುಮಾರು 2:30ಕ್ಕೆ ಸಂತ್ರಸ್ತೆಯ ಆಪ್ತ ಸ್ನೇಹಿತೆ ಸಂಬಂಧಿಕರ ಮನೆಗೆ ಹೋಗೋಣವೆಂದು ನಂಬಿಸಿ ಆಕೆಯನ್ನು ಸ್ಕೂಟರ್‌ನಲ್ಲಿ ಸೆಮಾರಿಯಾ ಕ್ರಾಸಿಂಗ್ ಬಳಿಯಿಂದ ನಗರ ವನದ (ಸಿಟಿ ಫಾರೆಸ್ಟ್) ನಿರ್ಜನ ಪ್ರದೇಶಕ್ಕೆ ಕರೆದೊಯ್ದಿದ್ದಾಳೆ. ಅಲ್ಲಿ ಈಗಾಗಲೇ ಮುಖಕ್ಕೆ ಸ್ಕಾರ್ಫ್ ಕಟ್ಟಿಕೊಂಡು ಕಾಯುತ್ತಿದ್ದ ಇತರ ಮೂವರು ಯುವತಿಯರು ಸೇರಿ ಸಂತ್ರಸ್ತೆಯ ಮೇಲೆ ಏಕಾಏಕಿ ಹಲ್ಲೆ ನಡೆಸಿದ್ದಾರೆ.

ಯುವಕನೊಬ್ಬ ವಾಟ್ಸಾಪ್ ಮೂಲಕ ಸಂತ್ರಸ್ತೆಗೆ ನಿರಂತರವಾಗಿ ಕಿರುಕುಳ ನೀಡುತ್ತಿದ್ದ ಎನ್ನಲಾಗಿದೆ. ಆತನೊಂದಿಗೆ ಪ್ರೇಮ ಸಂಬಂಧ ಬೆಳೆಸಿದರೆ ಹಣ ನೀಡುವುದಾಗಿ ಈ ಯುವತಿಯರು ಆಕೆಗೆ ಆಮಿಷವೊಡ್ಡಿ ಒತ್ತಾಯಿಸಿದ್ದರು. ಇದಕ್ಕೆ ಸಂತ್ರಸ್ತೆ ಒಪ್ಪದಿದ್ದಾಗ, ಆಕೆಯ ಮೇಲೆ ಮರದ ಕೋಲು, ಕೈ-ಕಾಲುಗಳಿಂದ ಮನಬಂದಂತೆ ಹಲ್ಲೆ ನಡೆಸಿದ್ದಾರೆ. 

ಇನ್ನೂ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ವಿಡಿಯೋದಲ್ಲಿ ಯುವತಿಯರು ಅವಾಚ್ಯ ಶಬ್ದಗಳಿಂದ ನಿಂದಿಸುತ್ತಾ, ಆಕೆಯ ಕತ್ತು ಹಿಸುಕಿ ಕೊಲ್ಲಲು ಯತ್ನಿಸಿರುವುದು ಕಂಡುಬಂದಿದೆ. ಅಷ್ಟೇ ಅಲ್ಲದೆ, “ಹೆಚ್ಚು ಲೀಡರ್‌ ಆಗಲು ನೋಡಿದರೆ ಇಲ್ಲಿಯೇ ಹೂತುಹಾಕುತ್ತೇವೆ” ಎಂದು ಬೆದರಿಕೆ ಹಾಕಿದ್ದಾರೆ. ಕೊನೆಗೆ ಆ ಯುವಕನಿಗೆ ವಿಡಿಯೋ ಕಾಲ್ ಮಾಡಿ ಸಂತ್ರಸ್ತೆಯಿಂದ ಕ್ಷಮೆ ಕೇಳಿಸಿದ ನಂತರವೇ ಆಕೆಯನ್ನು ಬಿಟ್ಟು ಕಳುಹಿಸಿದ್ದಾರೆ. ಘಟನೆಯಿಂದ ವಿದ್ಯಾರ್ಥಿನಿಯ ಕಿವಿ, ಬೆನ್ನು ಸೇರಿದಂತೆ ದೇಹದ ಹಲವೆಡೆ ಗಂಭೀರ ಗಾಯಗಳಾಗಿವೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಎಫ್‌ಐಆರ್ ದಾಖಲಿಸಿಕೊಂಡಿದ್ದಾರೆ