ವ್ಯಕ್ತಿ ಒಬ್ಬರು ಯುವಕನಾಗಿದ್ದಾಗ ಒಂದು ಸಣ್ಣ (ಸೈಕಲ್) ವಿವಾದದಿಂದಾಗಿ ಕೆಲಸ ಕಳೆದುಕೊಂಡು, ಸತತ 27 ವರ್ಷಗಳ ಕಾಲ ಸುದೀರ್ಘ ಕಾನೂನು ಸಮರ ನಡೆಸಿ ಗೆದ್ದು ಇದೀಗ ಅಜ್ಜನಾದ ಬಳಿಕ ಮತ್ತೆ ಯೋಧರಾಗಿ ಸಿಆರ್ಪಿಎಫ್ ಆಗಿ ನಿಯೋಜನೆಗೊಂಡಿರುವ ಅಪರೂಪದ ಘಟನೆಯೊಂದು ನಡೆದಿದೆ.
ಹೌದು, ‘ಗಿರ್ವರ್ ಸಿಂಗ್ ತೋಮರ್’ (54). ಹಲವು ವರ್ಷಗಳ ಕಾಲ ಸನ್ಯಾಸಿಯಾಗಿ ಬದುಕಿದ್ದ ಇವರು, ಸದ್ಯ ಉದ್ದನೆಯ ಗಡ್ಡ-ಜಟೆ ತ್ಯಜಿಸಿ, ಮತ್ತೆ ಸಿಆರ್ಪಿಎಫ್ ಆಗಿ ನಿಯೋಜನೆಗೊಂಡಿದ್ದಾರೆ.
ಏನಿದು ಘಟನೆ?
ಮಧ್ಯಪ್ರದೇಶದ ಗಿರ್ವರ್ ಸಿಂಗ್ ಅವರು 1991 ರಲ್ಲಿ ಸಿಆರ್ಪಿಎಫ್ ಸೇರಿದ್ದರು. ಆದರೆ, 1999 ರಲ್ಲಿ ಹಿರಿಯ ಅಧಿಕಾರಿಯೊಬ್ಬರ ವಾಹನಕ್ಕೆ ಇವರ ಸೈಕಲ್ ತಗುಲಿತು ಎಂಬ ಸಣ್ಣ ವಿವಾದಕ್ಕೆ ಸಂಬಂಧಿಸಿದಂತೆ ಇವರನ್ನು ಸೇವೆಯಿಂದ ವಜಾಗೊಳಿಸಲಾಯಿತು. ಆದರೆ ಈ ಆರೋಪ ಸುಳ್ಳು ಎಂದು ತೋಮರ್ ಪ್ರತಿಪಾದಿಸಿದ್ದರು.
ಕೆಲಸ ಕಳೆದುಕೊಂಡ ನಂತರ ಮಾನಸಿಕವಾಗಿ ನೊಂದ ಅವರು ಆಧ್ಯಾತ್ಮದ ಕಡೆಗೆ ಮುಖ ಮಾಡಿದರು. ಮಧ್ಯಪ್ರದೇಶದ ಮೊರೆನಾದಲ್ಲಿರುವ ಗುಫಾ ಮಂದಿರ ಸೇರಿ, 2001ರಲ್ಲಿ ಅವರು ‘ನಿರ್ಮೋಹಿ ಅಖಾಡ’ ಸೇರಿ ‘ಬಾಬಾ ಗಿರ್ವರ್ ದಾಸ್’ ಆಗಿ ಬದಲಾದರು. ಗುರುಗಳ ಸಲಹೆಯಂತೆ ಧಾರ್ಮಿಕ ಕೇಂದ್ರಗಳಲ್ಲಿ ಸೇವೆ ಸಲ್ಲಿಸಲು ತೊಡಗಿದರು. ನಂತರ 25ಕ್ಕೂ ಹೆಚ್ಚು ವರ್ಷಗಳ ಕಾಲ ಅವರು ಪ್ರಯಾಗ್ರಾಜ್ ಮತ್ತು ಚಿತ್ರಕೂಟದ ಮಠಗಳಲ್ಲಿ ಸಾಧು-ಸಂತರ ಜೊತೆ ಜೀವನ ಕಳೆದರು.
ಒಂದೆಡೆ ಸನ್ಯಾಸಿಯಂತೆ ಜೀವನ ನಡೆಸುತ್ತಿದ್ದರೂ, ಮತ್ತೊಂದೆಡೆ ಕೋರ್ಟ್ನಲ್ಲಿ ತಮ್ಮ ಹಕ್ಕಿಗಾಗಿ ಹೋರಾಟ ಮುಂದುವರಿಸಿದ್ದರು. ಈ 27 ವರ್ಷಗಳಲ್ಲಿ ಅವರ ಮಕ್ಕಳು ದೊಡ್ಡವರಾದರು, ಇಬ್ಬರು ಹೆಣ್ಣುಮಕ್ಕಳ ಮದುವೆಯೂ ಆಯಿತು. ಮಗ ‘ಅಗ್ನಿವೀರ’ ಯೋಜನೆಯಡಿ ಸಶಸ್ತ್ರ ಪಡೆಗೆ ಸೇರಿಕೊಂಡಿದ್ದಾರೆ.
2007ರಲ್ಲಿ ಹೈಕೋರ್ಟ್ ತೋಮರ್ ಅವರ ಪರವಾಗಿ ತೀರ್ಪು ನೀಡಿತಾದರೂ, ಸಿಆರ್ಪಿಎಫ್ ಅದಕ್ಕೆ ತಡೆ (Stay) ತಂದಿತ್ತು. ಕೊನೆಗೂ 2025ರಲ್ಲಿ ಹೈಕೋರ್ಟ್, ತೋಮರ್ ವಜಾ ಆದೇಶವನ್ನು ಅಕ್ರಮ ಎಂದು ಘೋಷಿಸಿ, ತಕ್ಷಣವೇ ಕೆಲಸಕ್ಕೆ ಸೇರಿಸಿಕೊಳ್ಳುವಂತೆ ಆದೇಶಿಸಿತು. ಅದರಂತೆ ಸಿಆರ್ಪಿಎಫ್ ಇತ್ತೀಚೆಗೆ ಅವರನ್ನು ಮತ್ತೆ ಸೇವೆಗೆ ಸೇರಿಸಿಕೊಂಡಿದೆ.
ಕಾವಿ ಬಟ್ಟೆಯನ್ನು ಕಳಚಿ, ಗರಿಗರಿಯಾದ ಖಾಕಿ ಯೂನಿಫಾರ್ಮ್, ತಲೆಯ ಮೇಲೆ ಟೋಪಿ ಮತ್ತು ಹೊಳೆಯುವ ಶೂಗಳನ್ನು ಧರಿಸಿ ಸಲ್ಯೂಟ್ ಹೊಡೆದಾಗ, ಅವರ ಕಣ್ಣುಗಳಲ್ಲಿ ಆನಂದಬಾಷ್ಪ ಹರಿಯಿತು. “ಇದೆಲ್ಲವೂ ಆ ದೇವರ ಕೃಪೆ. ನನಗೆ ಮತ್ತೆ ನನ್ನ ಸ್ವಂತ ಮನೆಗೆ ಹಿಂತಿರುಗಿದ ಅನುಭವವಾಗುತ್ತಿದೆ” ಎಂದು ತೋಮರ್ ಭಾವುಕರಾಗಿ ಹೇಳಿದ್ದಾರೆ.