ಈಗಾಗಲೇ ನಾವು ಕುಟುಂಬಗಳಲ್ಲಿ ಸುಮಾರು 20, 50 80 ವರ್ಷಗಳ ಬಳಿಕ ಹೆಣ್ಣು ಮಗು ಹುಟ್ಟಿರುವ ಕಾರಣ ಅತಿ ದೊಡ್ಡ ಸಂಭ್ರಮವನ್ನು ಆಚರಿಸಿ ಆ ಮಗುವನ್ನು ಸ್ವಾಗತಿಸಿದ ಕೆಲವೊಂದು ವರದಿಗಳನ್ನು ಗಮನಿಸಿದ್ದೇವೆ. ಆದರೆ ಇದೀಗ ಇನ್ನೂ ಅಚ್ಚರಿ ಎಂಬಂತೆ ಇನ್ನೊಂದು ಕುಟುಂಬದಲ್ಲಿ ಬರೋಬ್ಬರಿ 200 ವರ್ಷಗಳ ಬಳಿಕ ಹೆಣ್ಣು ಮಗು ಜನನ ಆಗಿದ್ದು, ಈ ಒಂದು ಸಂಭ್ರಮವನ್ನು ಕುಟುಂಬವು ದೊಡ್ಡ ಜಾತ್ರೆಯಂತೆ ಸಂಭ್ರಮಿಸಿದೆ.
ಹೌದು, ಮಹಾರಾಷ್ಟ್ರದ ಬೀಡ್ನಲ್ಲಿ ಸುಮಾರು 200 ವರ್ಷಗಳ ಅಂದರೆ ನಾಲ್ಕು ತಲೆಮಾರುಗಳ ಬಳಿಕ ಹೆಣ್ಣು ಮಗು ಜನಿಸಿದೆ. ಹೆರಿಗೆಯಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆದ ಬಳಿಕ ಕುಟುಂಬಸ್ಥರು ಮಗು ಹಾಗೂ ತಾಯಿಯನ್ನು ರಥದಲ್ಲಿ ಕೂರಿಸಿ, ತಾಳ-ವಾದ್ಯಗಳು ಹಾಗೂ ನೃತ್ಯದೊಂದಿಗೆ ಅದ್ದೂರಿಯಾಗಿ ಮೆರವಣಿಗೆಯಾಗುವ ಮೂಲಕ ಮನೆಗೆ ಸ್ವಾಗತಿಸಿದ್ದಾರೆ.
ಹೆಣ್ಣು ಮಗುವಿಗೆ ಗಾರ್ಗಿ ಎಂದು ಹೆಸರಿಡಲಾಗಿದೆ. ಮಗುವಿನ ತಾತ ಲಿಂಬಾಜಿ ದಹೀಫಾಲೆ ಅವರು ಗಾರ್ಗಿ ಕುರಿತು ಮಾತನಾಡುವಾಗ ಭಾವುಕರಾದರು. ಕುಟುಂಬದಲ್ಲಿ ಹೆಣ್ಣು ಮಗು ಇರುವುದು ದೊಡ್ಡ ಭಾಗ್ಯ. ಇಷ್ಟು ವರ್ಷಗಳ ಕಾಲ ನಮ್ಮಲ್ಲಿ ಹೆಣ್ಣು ಮಗು ಇಲ್ಲದಿರುವ ಕೊರಗಿತ್ತು, ಇಂದು ಅದು ಈಡೇರಿದೆ. ಅಲ್ಲದೇ ನನ್ನಿಬ್ಬರೂ ಸೊಸೆಯಂದಿರನ್ನು ನನ್ನ ಸ್ವಂತ ಹೆಣ್ಣುಮಕ್ಕಳಂತೆ ನೋಡಿಕೊಂಡಿದ್ದೇನೆ. ಸಂಗೀತ ಹಾಗೂ ನೃತ್ಯದೊಂದಿಗೆ ತಮ್ಮ ಮೊಮ್ಮಗಳನ್ನು ರಥದಲ್ಲಿ ಮನೆಗೆ ಕರೆತಂದಿರುವುದಕ್ಕೆ ಅತೀವ ಆನಂದ ವ್ಯಕ್ತಪಡಿಸಿದ್ದಾರೆ.
ಮಗುವಿನ ಅಜ್ಜಿ ಸುಖಾ ದಹೀಫಾಲೆ ಮಾತನಾಡಿ, ಮಗುವನ್ನು ಬಹಳ ವಿಜೃಂಭಣೆಯಿಂದ ಸ್ವಾಗತಿಸಲು ಆಸ್ಪತ್ರೆಯಲ್ಲಿಯೇ ಕುಟುಂಬದವರು ನಿರ್ಧರಿಸಿದ್ವಿ. ಇಂದು ನಮ್ಮ ಮನೆಗೆ ಲಕ್ಷ್ಮಿ ಬಂದಿರುವುದಕ್ಕೆ ನಮಗೆ ತುಂಬಾ ಖುಷಿಯಾಗಿದೆ ಎಂದು ಹೇಳಿದ್ದಾರೆ. ಗಾರ್ಗಿಯ ತಂದೆ ಕೂಡ ಸಂತೋಷವನ್ನು ವ್ಯಕ್ತಪಡಿಸಿ, ಜನಸಾಮಾನ್ಯರು ಸಾಮಾನ್ಯವಾಗಿ ಗಂಡು ಮಗುವನ್ನು ಬಯಸುತ್ತಾರೆ, ಆದರೆ ಹೆಣ್ಣು ಮಗುವನ್ನು ಹೊಂದುವ ಅನುಭವ ಮತ್ತು ಸಂತೋಷವೇ ಬೇರೆ. ಹೆಣ್ಣುಮಕ್ಕಳು ತಂದೆಯೊಂದಿಗೆ ಹೆಚ್ಚು ಆಪ್ತರಾಗಿರುತ್ತಾರೆ. ನಾವು ನಮ್ಮ ಮಗಳನ್ನು ಹೂವಿನಂತೆ ಬೆಳೆಸುತ್ತೇವೆ ಎಂದಿದ್ದಾರೆ.
