ಮೊಟ್ಟೆ ಇಡಲಾಗದೆ ನರಳಾಡಿದ ಗಿಳಿ – ₹1.5 ಲಕ್ಷದ ಶಸ್ತ್ರಚಿಕಿತ್ಸೆಗಾಗಿ ದೆಹಲಿಗೆ ಕೊಂಡೊಯ್ದ ಕುಟುಂಬ!!
ಪಶ್ಚಿಮ ಬಂಗಾಳದ ಮನೆ ಒಂದರಲ್ಲಿ ಮನೆಯ ಸದಸ್ಯನಂತೆ ಇದ್ದ 13 ವರ್ಷದ ‘ಮಿಠೂ’ ಹೆಸರಿನ ಹೆಣ್ಣು ಗಿಳಿಯೊಂದು ಅತ್ಯಂತ ದೊಡ್ಡ ಗಾತ್ರದ ಮೊಟ್ಟೆಯೊಂದನ್ನು ಇಡಲಾಗದೆ ಅಪಾಯದ ಅಂಚಿನಲ್ಲಿ ಸಿಲುಕಿದೆ. ಅದನ್ನು ಹೊರತೆಗೆಯಲು ತುರ್ತು ಶಸ್ತ್ರಚಿಕಿತ್ಸೆಯ ಅಗತ್ಯವಿದೆ. ಹೀಗಾಗಿ ಕುಟುಂಬಸ್ಥರೆಲ್ಲರೂ ಸೇರಿ ಆ ಗಿಳಿಯನ್ನು ದೆಹಲಿಯ ಆಸ್ಪತ್ರೆ ಒಂದಕ್ಕೆ ಕೊಂಡೊಯ್ದಿದ್ದಾರೆ.
Sponsoredಕಳೆದ ಎರಡು ವರ್ಷಗಳಿಂದ ರೈಲ್ವೆಯ ನಿವೃತ್ತ ಉದ್ಯೋಗಿ ಶ್ಯಾಮಲಾಲ್ ಕರ್ ಅವರ ಕುಟುಂಬ ಮಿಠೂ ಎಂಬ ಗಿಳಿಯನ್ನು ಮಗುವಿನಂತೆ ಸಾಕಿಸಲಾಗುತ್ತಿದ್ದಾರೆ. ಆದರೆ ಇದೀಗ ಈ ಗಿಳಿಯು ಅತಿಯಾದ ಕ್ಯಾಲ್ಸಿಯಂ ಶೇಖರಣೆಯಾದ ಕಾರಣ ಮೊಟ್ಟೆಯ ಗಾತ್ರವು ಸಾಮಾನ್ಯಕ್ಕಿಂತ ತುಂಬಾ ದೊಡ್ಡದಾದ ಮೊಟ್ಟೆಯನ್ನು ಇಡಲು ಮುಂದಾಗಿದೆ. ಆದರೆ ಅದು ನೈಸರ್ಗಿಕವಾಗಿ ಹೊರಬರಲಾಗದೆ ಒಳಗೇ ಸಿಲುಕಿಕೊಂಡಿದೆ.
ಗಿಳಿಯೊಂದಿಗೆ ಅಪಾರ ಒಡನಾಟ ಹೊಂದಿರುವ ಕರ್ ಅವರ ಮೊಮ್ಮಗಳು ಟಿಯಾ, ತನ್ನ ಮುದ್ದಿನ ಹಕ್ಕಿ ಮಿಠೂ ಮತ್ತೆ ತನ್ನ ಬಳಿ ಬರುತ್ತದೋ ಇಲ್ಲವೋ ಎಂಬ ಕಳವಳದಲ್ಲಿದ್ದು, ಮಿಠೂ ಇದ್ದಕ್ಕಿದ್ದಂತೆ ಮೌನವಾಗಿರುವುದನ್ನು ಮತ್ತು ಆಹಾರ-ನೀರು ಸೇವಿಸುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿರುವುದನ್ನು ಮೊದಲು ಗಮನಿಸಿದ್ದಾಳೆ. ತಕ್ಷಣ ಆಕೆಯ ತಾತ ಶ್ಯಾಮಲಾಲ್ ಅವರು ಕೊಲ್ಕತ್ತಾದ ಖಾಸಗಿ ಕೇಂದ್ರವಾದ ‘ಅನಿಮಲ್ ಹೆಲ್ತ್ ಪ್ಯಾಥಾಲಜಿ ಲ್ಯಾಬ್’ನಲ್ಲಿ ಡಿಜಿಟಲ್ ರೇಡಿಯೋಗ್ರಫಿ (Digital Radiography) ಪರೀಕ್ಷೆ ಮಾಡಿಸಿದ್ದಾರೆ. ಈ ವೇಳೆ ಗಿಳಿಯ ಪೆಲ್ವಿಕ್ ಭಾಗದಲ್ಲಿ ಕ್ಯಾಲ್ಸಿಯಂಯುಕ್ತ ದೊಡ್ಡ ಮೊಟ್ಟೆ ಸಿಲುಕಿರುವುದು ಪತ್ತೆಯಾಗಿದೆ. ವೈದ್ಯರು ಲೂಬ್ರಿಕೆಂಟ್ (Lubricant) ಬಳಸಿ ಮೊಟ್ಟೆಯನ್ನು ಹೊರತೆಗೆಯಲು ಹಲವು ಪ್ರಯತ್ನಗಳನ್ನು ನಡೆಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಕೊನೆಗೆ ಜಟಿಲವಾದ ಸರ್ಜರಿಯೇ ಏಕೈಕ ಮಾರ್ಗವಾಗಿದ್ದು, ಇದಕ್ಕೆ ದೆಹಲಿಗೆ ಕರೆದೊಯ್ಯುವಂತೆ ವೈದ್ಯರು ಕುಟುಂಬಕ್ಕೆ ಸೂಚಿಸಿದ್ದಾರೆ.
ಈ ‘ಎಗ್-ಬೈಂಡಿಂಗ್’ ಸಮಸ್ಯೆಗೆ ಮಾಡುವ ಜಟಿಲ ಶಸ್ತ್ರಚಿಕಿತ್ಸೆಗೆ ಸುಮಾರು ₹1.5 ಲಕ್ಷದವರೆಗೆ ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಇಷ್ಟು ದೊಡ್ಡ ಮೊತ್ತ ಭರಿಸುವುದು ಮಧ್ಯಮ ವರ್ಗದ ಕುಟುಂಬಕ್ಕೆ ಕಷ್ಟವಾಗಿರುವುದರಿಂದ, ದೆಹಲಿಯ ಪಶುವೈದ್ಯರು ಚಿಕಿತ್ಸೆಗೆ ಯಾವುದಾದರೂ ಅಗ್ಗದ ಪರ್ಯಾಯ ಮಾರ್ಗವಿದೆಯೇ ಎಂದು ಪರಿಶೀಲಿಸುತ್ತಿದ್ದಾರೆ. ಗಿಳಿಗೆ ಸಂಬಂಧಿಸಿದ ಇಂತಹ ಸೂಕ್ಷ್ಮ ಸರ್ಜರಿಗಳು ಭಾರತದಲ್ಲಿ ಸದ್ಯ ಮುಂಬೈ, ಚೆನ್ನೈ ಮತ್ತು ದೆಹಲಿಯಲ್ಲಿ ಮಾತ್ರ ಲಭ್ಯವಿವೆ ಅಥವಾ ಅಲ್ಲಿಂದ ಪ್ರಖ್ಯಾತ ಸರ್ಜನ್ಗಳನ್ನು ಕರೆಸಬೇಕಾಗುತ್ತದೆ ಎನ್ನಲಾಗಿದೆ.




