ಆಡಂಬರದ ಬೀಗರೂಟಕ್ಕೆ ಬ್ರೇಕ್ ಹಾಕಿದ ಶಿವಮೊಗ್ಗದ ಗ್ರಾಮ – ನಿಯಮ ಮಿರಿದ್ರೆ 1 ಲಕ್ಷ ದಂಡ

ವಿವಾಹ ಸಮಾರಂಭಗಳಲ್ಲಿ ಹೆಚ್ಚುತ್ತಿರುವ ಅನಗತ್ಯ ಆಡಂಬರ ಹಾಗೂ ಲಕ್ಷಾಂತರ ರೂಪಾಯಿ ದುಂದುವೆಚ್ಚಕ್ಕೆ ಕಡಿವಾಣ ಹಾಕಲು ಶಿವಮೊಗ್ಗ ಜಿಲ್ಲೆ ಶಿಕಾರಿಪುರ ತಾಲೂಕಿನ ಹರಗಿ ಗ್ರಾಮಸ್ಥರು ಮಹತ್ವದ  ತೀರ್ಮಾನ ಕೈಗೊಂಡು, ನಾಡಿನ ಜನತೆಗೆ ಮಾದರಿಯಾಗಿದ್ದಾರೆ.

Sponsored

ಗ್ರಾಮದ ಹಿರಿಯರು ಹಾಗೂ ಸಾರ್ವಜನಿಕರು ಒಟ್ಟಾಗಿ ಸಭೆ ನಡೆಸಿ, ಇನ್ಮುಂದೆ ಗ್ರಾಮದಲ್ಲಿ ಯಾರೂ ಬೀಗರೂಟ ಆಯೋಜಿಸಬಾರದು ಎಂದು ನಿರ್ಬಂಧ ವಿಧಿಸಿದ್ದಾರೆ. ಒಂದು ವೇಳೆ ಈ ನಿಯಮವನ್ನು ಉಲ್ಲಂಘಿಸಿ ಬೀಗರೂಟ ಏರ್ಪಡಿಸಿದರೆ ಅವರಿಗೆ ₹1 ಲಕ್ಷ ದಂಡ ವಿಧಿಸಲು ನಿರ್ಧರಿಸಲಾಗಿದೆ. ಅಷ್ಟೇ ಅಲ್ಲದೆ, ಹತ್ತಿರದ ರಕ್ತಸಂಬಂಧಿಗಳನ್ನು ಹೊರತುಪಡಿಸಿ, ಅಕ್ಕಪಕ್ಕದವರ ಜತೆ ಬೇರೆ ಊರುಗಳಿಗೆ ಗುಂಪುಗುಂಪಾಗಿ ಬೀಗರೂಟಕ್ಕೆ ತೆರಳುವವರಿಗೂ ಬರೋಬ್ಬರಿ ₹50,000 ದಂಡ ವಿಧಿಸುವ ಕಠಿಣ ಕಟ್ಟಳೆ ವಿಧಿಸಲಾಗಿದೆ.

ದುಂದುವೆಚ್ಚದಿಂದ ಕುಟುಂಬಗಳು ಸಾಲದ ಬಲೆಗೆ ಬೀಳುವುದನ್ನು ತಡೆಗಟ್ಟುವ ಉದ್ದೇಶದಿಂದ ಇಡೀ ಗ್ರಾಮಸ್ಥರು ಒಗ್ಗಟ್ಟಾಗಿ ಈ ಸಾಮಾಜಿಕ ಸುಧಾರಣೆಗೆ ಮುಂದಾಗಿದ್ದು, ಹರಗಿ ಗ್ರಾಮದ ಈ ದಿಟ್ಟ ನಡೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.