ಮೀನುಗಾರರ ಬದುಕಲ್ಲಿ ಪವಾಡ – ಧರ್ಮಸ್ಥಳ ಮಂಜುನಾಥ ಸ್ವಾಮಿಗೆ 770 ಗ್ರಾಂ ಬೆಳ್ಳಿಯ ರಾಣಿ ಮೀನು ಅರ್ಪಣೆ

ಧರ್ಮಸ್ಥಳದ ಅಧಿದೈವ ಶ್ರೀ ಮಂಜುನಾಥ ಸ್ವಾಮಿಗೆ ಮಾತು ಬಿಡ ಮಂಜುನಾಥ ಎಂದು ಕರೆಯುವುದು ವಾಡಿಕೆ. ಅಂದರೆ ಯಾವುದೇ ಕಷ್ಟ, ಕಾರ್ಪಣ್ಯಗಳು ಎದುರಾದಾಗ ಸ್ವಾಮಿಯ ಸನ್ನಿಧಿಗೆ ಮೊರೆ ಹೋದಾಗ ಆತ ಅವರನ್ನು ಕೈ ಬಿಡದೆ ಎಲ್ಲವನ್ನು ನಿವಾರಿಸಿ ಸಂತೈಸುತ್ತಾನೆ ಎಂಬುದು ಅದರ ಅರ್ಥ. ಸ್ವಾಮಿ ತಮ್ಮ ಕಷ್ಟಗಳನ್ನು ಪರಿಹರಿಸಿ ಕೊಟ್ಟಾಗ ಭಕ್ತಾದಿಗಳು ತಾವು ಅಂದುಕೊಂಡಂತೆ ದೇವರಿಗೆ ಹರಕೆ ಒಪ್ಪಿಸುತ್ತಾರೆ. ಅಂತೆಯೇ ಇದೀಗ ತಮ್ಮ ಜೀವನದಲ್ಲಿ ಸ್ವಾಮಿಯ ಕೃಪೆಯಿಂದ ಪವಾಡವೇ ನಡೆದಿದೆ ಎಂದು ಮೀನುಗಾರರು ಶ್ರೀ ಮಂಜುನಾಥ ಸ್ವಾಮಿಗೆ ಬೆಳ್ಳಿಯ ರಾಣಿ ಮೀನಿನ ಹಾರವನ್ನು ಕಾಣಿಕೆಯಾಗಿ ಅರ್ಪಿಸಿದ್ದಾರೆ.

Sponsored

ಹೌದು, ಮತ್ಸ್ಯ ಸಂಪತ್ತು ಹೆಚ್ಚಾಗಲಿ ಎಂದು ಹರಕೆ ಹೊತ್ತಿದ್ದ ಉಡುಪಿಯ ಆಳಸಮುದ್ರ ಟ್ರಾಲ್ ಬೋಟ್ ಮೀನುಗಾರರು, ಹರಕೆ ಈಡೇರಿದ ಬಳಿಕ ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕೆ ಸುಮಾರು ₹2.45 ಲಕ್ಷ ಮೌಲ್ಯದ 770 ಗ್ರಾಂ ಬೆಳ್ಳಿಯ ರಾಣಿ ಮೀನು ಹಾರವನ್ನು ಸಮರ್ಪಿಸಿದ್ದಾರೆ. ಉಳಿದ ಹಣವನ್ನು ಅನ್ನದಾನಕ್ಕೆ ದೇಣಿಗೆಯಾಗಿ ನೀಡಿದ್ದಾರೆ.

ಯಾಕಾಗಿ ಈ ಹರಕೆ?

2025ರಲ್ಲಿ ಉಡುಪಿ ಕರಾವಳಿಯಲ್ಲಿ ತೀವ್ರ ಮತ್ಸ್ಯ ಕ್ಷಾಮ ಎದುರಾಗಿತ್ತು. ಇದರಿಂದ ಮಲ್ಪೆ ಬಂದರನ್ನು ಅವಲಂಬಿಸಿರುವ ಆಳಸಮುದ್ರ ಟ್ರಾಲ್ ಬೋಟ್ ಮೀನುಗಾರರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದರು. ಈ ಹಿನ್ನೆಲೆಯಲ್ಲಿ ಮೀನುಗಾರರು ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕೆ ತೆರಳಿ, “ಸಮುದ್ರದಲ್ಲಿ ಮತ್ಸ್ಯ ಸಂಪತ್ತು ಹೆಚ್ಚಾಗಲಿ, ಉತ್ತಮ ಮೀನುಗಾರಿಕೆ ದೊರೆಯಲಿ” ಎಂದು ಶ್ರೀ ಮಂಜುನಾಥ ಸ್ವಾಮಿಗೆ ಪ್ರಾರ್ಥನೆ ಸಲ್ಲಿಸಿದ್ದರು. ಅದೇ ವೇಳೆ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆ ಅವರನ್ನು ಭೇಟಿ ಮಾಡಿ ತಮ್ಮ ಸಂಕಷ್ಟವನ್ನು ವಿವರಿಸಿದ್ದರು. ಆ ಸಂದರ್ಭದಲ್ಲಿ ಡಾ. ಹೆಗ್ಗಡೆ ಅವರು ಶ್ರೀ ಮಂಜುನಾಥ ಸ್ವಾಮಿಯ ಬಳಿ ಪ್ರಾರ್ಥಿಸಿ, “ಈ ಬಾರಿ ಉತ್ತಮ ಮೀನುಗಾರಿಕೆ ಆಗಲಿ. ಒಳಿತಾದರೆ ಕ್ಷೇತ್ರಕ್ಕೆ ನಿಮ್ಮ ಕೈಲಾದಷ್ಟು ಸಣ್ಣ ಬೆಳ್ಳಿಯ ಕಾಣಿಕೆ ನೀಡಿ” ಎಂದು ಸಲಹೆ ನೀಡಿದ್ದರು.

 ದೈವ ಇಚ್ಛೆಯೋ, ಪವಾಡವೋ ಎಂಬಂತೆ 2026ರ ಮೀನುಗಾರಿಕೆ ಋತುವಿನಲ್ಲಿ ಉಡುಪಿ ಕರಾವಳಿಯಲ್ಲಿ ಉತ್ತಮ ಪ್ರಮಾಣದ ಮೀನು ಸಿಕ್ಕಿದ್ದು, ಅನೇಕ ಮೀನುಗಾರರ ಆರ್ಥಿಕ ಸ್ಥಿತಿ ಸುಧಾರಿಸಿದೆ. ಈ ಯಶಸ್ಸನ್ನು ಶ್ರೀ ಮಂಜುನಾಥ ಸ್ವಾಮಿಯ ಆಶೀರ್ವಾದವೆಂದು ನಂಬಿದ ಮೀನುಗಾರರು, ನೀಡಿದ್ದ ಮಾತಿನಂತೆ ಕಾಣಿಕೆ ಸಲ್ಲಿಸಲು ಮುಂದಾಗಿದ್ದು, ಬೆಳ್ಳಿಯ ಮೀನನ್ನು ಕಾಣಿಕೆ ನೀಡಿದ್ದಾರೆ.

ಈ ಕಾಣಿಕೆಗಾಗಿ ಸುಮಾರು 200 ಮೀನುಗಾರರು ಮತ್ತು ಬೋಟ್ ಮಾಲೀಕರು ತಮ್ಮ ಶಕ್ತಿಗೆ ಅನುಗುಣವಾಗಿ ಸ್ವಯಂಪ್ರೇರಿತವಾಗಿ ಹಣ ನೀಡಿದ್ದಾರೆ. ಈ ಕಾಣಿಕೆಗಾಗಿ ಒಟ್ಟು ₹5,29,125 ಹಣವನ್ನು ಸಂಗ್ರಹಿಸಲಾಗಿತ್ತು. ಈ ಮೊತ್ತದಲ್ಲಿ ₹2,45,000 ವೆಚ್ಚದಲ್ಲಿ 770 ಗ್ರಾಂ ತೂಕದ ಬೆಳ್ಳಿಯ ‘ರಾಣಿ ಮೀನು’ ಹಾರವನ್ನು ತಯಾರಿಸಲಾಯಿತು. ಬಳಿಕ, ಉಳಿದ ₹2,84,125 ಮೊತ್ತವನ್ನು ಶ್ರೀ ಕ್ಷೇತ್ರ ಧರ್ಮಸ್ಥಳದ ಅನ್ನದಾನ ಸೇವೆಗೆ ಭಕ್ತಿಯಿಂದ ದೇಣಿಗೆಯಾಗಿ ನೀಡಲಾಗಿದೆ.

ಮಲ್ಪೆ ಆಳಸಮುದ್ರ ಟ್ರಾಲ್ ಬೋಟ್ ಸಂಘದ ಪ್ರತಿನಿಧಿ ಸುಭಾಷ್ ಮೆಂಡನ್ ಅವರು ಈ ಬಗ್ಗೆ ಮಾತನಾಡಿ ಇದು ಕೇವಲ ಧಾರ್ಮಿಕ ಆಚರಣೆಯಲ್ಲ ಅಥವಾ ದೇವರಿಗೆ ಸಲ್ಲಿಸುತ್ತಿರುವ ಹರಕೆ ಎಷ್ಟೇ ಅಲ್ಲ. ಇದು ನೂರಾರು ಮೀನುಗಾರರ ಬದುಕನ್ನು ಶ್ರೀ ಮಂಜುನಾಥ ಸ್ವಾಮಿ ಸುಂದರಗೊಳಿಸಿದ ಪ್ರತೀಕವಾಗಿದೆ. ಬಡವರು-ಶ್ರೀಮಂತರು ಎನ್ನದೆ ಎಲ್ಲರೂ ತಮ್ಮ ಕೈಲಾದಷ್ಟು ಕಾಣಿಕೆ ನೀಡಿರುವುದು ಮೀನುಗಾರರ ಒಗ್ಗಟ್ಟು ಮತ್ತು ಭಕ್ತಿಗೆ ಸಾಕ್ಷಿಯಾಗಿದೆ ಎಂದು ಅವರು ತಿಳಿಸಿದ್ದಾರೆ ಎಂದು ತಿಳಿಸಿದ್ದಾರೆ.

ಏಕೆ ‘ರಾಣಿ ಮೀನು’ ಹಾರ?

ರಾಣಿ ಮೀನು ಕರಾವಳಿ ಭಾಗದ ಮೀನುಗಾರ ಸಮುದಾಯದಲ್ಲಿ ವಿಶೇಷ ಮಹತ್ವ ಹೊಂದಿರುವ ಮೀನುಗಳಲ್ಲಿ ಒಂದಾಗಿದೆ. ಅದೇ ರೂಪದಲ್ಲಿ ಬೆಳ್ಳಿಯ ಹಾರವನ್ನು ತಯಾರಿಸಿ ಸಮರ್ಪಿಸಿರುವುದು, ಸಮುದ್ರದ ಮೇಲಿನ ನಂಬಿಕೆ, ಮೀನುಗಾರಿಕೆಯ ಮೇಲಿನ ಗೌರವ ಮತ್ತು ದೇವರ ಕೃಪೆಗೆ ಸಲ್ಲಿಸಿದ ಕೃತಜ್ಞತೆಯ ಸಂಕೇತವಾಗಿದೆ.