ಒಂದೇ ಕುಟುಂಬದ 14 ಗಂಡುಮಕ್ಕಳಿಗೆ ಒಂದೇ ಸಲ ಮದುವೆ- ಟ್ರ್ಯಾಕ್ಟರ್‌ನಲ್ಲಿ ಅದ್ದೂರಿ ಮೆರವಣಿಗೆ

ಮದುವೆ ಅಂದ ತಕ್ಷಣ ಓಡಾಟ, ಸಂಭ್ರಮ, ಸಡಗರ, ಆಡಂಬರ ಎಲ್ಲವೂ ಕಣ್ಣ ಮುಂದೆ ಬಂದುಬಿಡುತ್ತದೆ. ಒಂದು ಮದುವೆಯನ್ನು ಮಾಡಿ ಮುಗಿಸುವ ಹೊತ್ತಿಗೆ ಒಂದು ಕುಟುಂಬಕ್ಕೆ ಸಾಕು ಸಾಕಾಗಿಬಿಡುತ್ತದೆ. ಅದರ ಖರ್ಚು ವೆಚ್ಚಗಳನ್ನು ನೆನೆಸಿಕೊಂಡರಂತೆ ತಲೆ ಸುತ್ತು ಬಂದುಬಿಡುತ್ತದೆ. ಇದೆಲ್ಲ ತಲೆಬಿಸಿಯನ್ನು ಮನ ಗಂಡ ಒಂದು ಕುಟುಂಬ ತನ್ನ 14 ಗಂಡುಮಕ್ಕಳಿಗೆ ಒಂದೇ ಮಂಟಪದಲ್ಲಿ ಒಟ್ಟಿಗೆ ಮದುವೆ ಮಾಡಿರುವ ಅಚ್ಚರಿ ಘಟನೆ ನಡೆದಿದೆ. ಇದರ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ. ಇದರ ಹಿಂದಿರೋ ಪ್ಲ್ಯಾನ್‌ ಕೇಳಿ ಜನ ಶಾಕ್‌ ಕೂಡ ಆಗಿದ್ದಾರೆ.

Sponsored

ಹೌದು, ಮಧ್ಯಪ್ರದೇಶದ ಸತ್ನಾ ಜಿಲ್ಲೆಯ ಜಂಟಿ ರೈತ ಕುಟುಂಬವೊಂದು ಸಮಾಜದ ಈ ಅದ್ದೂರಿತನಕ್ಕೆ ಬ್ರೇಕ್ ಹಾಕುವ ಮೂಲಕ ಸುದ್ದಿಯಲ್ಲಿದೆ. ಮದುವೆ ಖರ್ಚು ಕಡಿಮೆ ಮಾಡಲು ಎದುರಿಸಲು ಈ ಕೃಷಿಕ ಕುಟುಂಬ ಒಂದೇ ಮಂಟಪದಲ್ಲಿ ತಮ್ಮ 14 ಜನ ಗಂಡುಮಕ್ಕಳು ಹಾಗೂ ಸೋದರಸಂಬಂಧಿಗಳಿಗೆ ಭರ್ಜರಿಯಾಗಿ ಮದುವೆ ಮಾಡಿಸಿದೆ. 

ಸಾಮಾನ್ಯವಾಗಿ ವರನ ಮೆರವಣಿಗೆಗೆ ಲಕ್ಷಾಂತರ ರೂಪಾಯಿ ಕೊಟ್ಟು ಐಷಾರಾಮಿ ಕಾರುಗಳನ್ನು ಬಾಡಿಗೆಗೆ ತರಲಾಗುತ್ತದೆ. ಆದರೆ, ಈ ರೈತ ಕುಟುಂಬ ತಮ್ಮ ಜೀವನಾಧಾರವಾಗಿರುವ ಕೃಷಿ ವಾಹನವನ್ನೇ ಮದುವೆಯ ರಥವನ್ನಾಗಿ ಮಾಡಿಕೊಂಡಿದೆ. ಒಂದೇ ಟ್ರ್ಯಾಕ್ಟರ್ ಟ್ರಾಲಿಯನ್ನು ವಿಶೇಷವಾಗಿ ಅಲಂಕರಿಸಿ, ಅದರಲ್ಲಿ ಇಡೀ 14 ಜನ ವರರು-ವಧುಗಳು ಒಟ್ಟಿಗೆ ಕುಳಿತು ಮದುವೆ ಮಂಟಪಕ್ಕೆ ರಾಜಗಾಂಭೀರ್ಯದಿಂದ ಎಂಟ್ರಿ ಕೊಟ್ಟಿದ್ದಾರೆ. ಈ ಅಪರೂಪದ ದೃಶ್ಯವನ್ನು ನೋಡಲು ಇಡೀ ಊರಿನ ಜನ ರಸ್ತೆಯ ಇಕ್ಕೆಲಗಳಲ್ಲಿ ನೆರೆದಿದ್ದರು. ಮದುವೆಯ ಎಲ್ಲ ಶಾಸ್ತ್ರಗಳು ಮುಗಿದ ನಂತರ, ಹೊಸ ಬದುಕಿಗೆ ಹೆಜ್ಜೆ ಇಟ್ಟ 14 ಹೆಣ್ಣುಮಕ್ಕಳು ಮತ್ತೊಂದು ಟ್ರ್ಯಾಕ್ಟರ್ ಟ್ರಾಲಿಯಲ್ಲೇ ಅತ್ಯಂತ ಸರಳವಾಗಿ, ಯಾವುದೇ ಆಡಂಬರವಿಲ್ಲದೆ ಗಂಡನ ಮನೆಗೆ ಮರಳಿದ್ದಾರೆ. 

ಪ್ರತಿ ಮದುವೆಗೆ ಪ್ರತ್ಯೇಕವಾಗಿ ಮಂಟಪ, ಊಟದ ವ್ಯವಸ್ಥೆ, ಬ್ಯಾಂಡ್ ಮತ್ತು ಸಾರಿಗೆಗೆ ಖರ್ಚು ಮಾಡಿದ್ದರೆ ಈ ಕುಟುಂಬ ಸಾಲದ ಸುಳಿಗೆ ಸಿಲುಕುತ್ತಿತ್ತು. ಒಂದೇ ಬಾರಿಗೆ ಎಲ್ಲವನ್ನೂ ಮುಗಿಸಿರುವುದರಿಂದ ಲಕ್ಷಾಂತರ ರೂಪಾಯಿ ಉಳಿತಾಯವಾಗಿದೆ. ಅಲ್ಲದೆ 14 ಪ್ರತ್ಯೇಕ ಮದುವೆಗಳನ್ನು ಆಯೋಜಿಸುವುದು ಸುಲಭದ ಮಾತಲ್ಲ. ಕುಟುಂಬಸ್ಥರು ಪದೇ ಪದೇ ರಜೆ ಹಾಕಿ, ಸಂಬಂಧಿಕರನ್ನು ಆಹ್ವಾನಿಸುವ ದೊಡ್ಡ ಕಸರತ್ತಿನಿಂದ ಪಾರಾಗಿದ್ದಾರೆ.

ಬೇರೆ ಬೇರೆ ದಿನಗಳಲ್ಲಿ ಮದುವೆ ಮಾಡಿದ್ದರೆ ಸಿಗುತ್ತಿದ್ದ ಸಂಭ್ರಮಕ್ಕಿಂತ, ಒಂದೇ ಸೂರಿನಡಿ ಇಡೀ ಕುಟುಂಬದ 14 ಜೋಡಿಗಳು ಹೊಸ ಬದುಕಿಗೆ ಹೆಜ್ಜೆ ಇಟ್ಟಿರುವುದು ಇಡೀ ಜಿಲ್ಲೆಯ ಜನರಲ್ಲಿ ಅಚ್ಚರಿ ಮೂಡಿಸಿದೆ. ಮದುವೆಗೆ ಬಂದಿದ್ದ ಅತಿಥಿಗಳು ಕೂಡ ಕುಟುಂಬದ ಈ ನಿರ್ಧಾರವನ್ನು ಶ್ಲಾಘಿಸಿದ್ದಾರೆ. ಹೆಚ್ಚುತ್ತಿರುವ ಹಣದುಬ್ಬರ ಹಾಗೂ ಅದ್ದೂರಿತನಕ್ಕೆ ಸೆಡ್ಡು ಹೊಡೆದಿರುವ ಈ ಮದುವೆಯು ಸಾರ್ವಜನಿಕವಾಗಿ ಹಣ ಉಳಿತಾಯ ಮಾಡಲು ಮತ್ತು ಸರಳ ವಿವಾಹಕ್ಕೆ ಪ್ರೇರಣೆ ಎನ್ನುತ್ತಿದ್ದಾರೆ.

ಈ ಸುದ್ದಿ ವೈರಲ್ ಆಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ದೊಡ್ಡ ಚರ್ಚೆಯೇ ಶುರುವಾಗಿದೆ. ಕೆಲವರು ಇದೊಂದು “ಅದ್ಭುತ ಐಡಿಯಾ” ಎಂದು ಕೊಂಡಾಡಿದರೆ, ಇನ್ನು ಕೆಲವರು ಇದನ್ನು ನಂಬಲು ಹಿಂಜರಿಯುತ್ತಿದ್ದಾರೆ: “ಒಂದೇ ಕುಟುಂಬದಲ್ಲಿ 14 ಗಂಡು ಮಕ್ಕಳಿರಲು ಹೇಗೆ ಸಾಧ್ಯ? ಇದು ಕೇವಲ ಸೋದರಸಂಬಂಧಿಗಳ (Cousins) ಜಂಟಿ ಮದುವೆಯಾಗಿರಬಹುದು, ಸುದ್ದಿಗಾಗಿ ಹೀಗೆ ಬಿಂಬಿಸಲಾಗಿದೆ,” ಎಂದು ಹಲವರು ಕಮೆಂಟ್ ಮಾಡಿದ್ದಾರೆ.

https://x.com/i/status/2075883304377602249