ಮಂಗಳೂರು: ಮಾರ್ಫ್‌ ವಿಡಿಯೋ ಮುಂದಿಟ್ಟು ಸಂಸ್ಥೆಯ ಮಾಲೀಕರಿಗೆ 2 ಕೋಟಿ ಬ್ಲ್ಯಾಕ್‌ಮೇಲ್‌; ಉದ್ಯೋಗಿ ಬಂಧನ

ಮಂಗಳೂರು: ಶಾಲಾ ಮಕ್ಕಳಿಗೆ ಸಂವಹನ ಕೌಶಲ ತರಬೇತಿ ನೀಡುವ ನಗರದ ಪ್ರತಿಷ್ಠಿತ ಸಂಸ್ಥೆಯೊಂದರ ಮಾಲೀಕರಿಗೆ ಅವರದ್ದೇ ಖಾಸಗಿ ಹಾಗೂ ಮಾರ್ಫ್‌ ಮಾಡಿದ ವಿಡಿಯೋಗಳನ್ನು ಮುಂದಿಟ್ಟುಕೊಂಡು ಎರಡು ಕೋಟಿ ರೂ.ಗೆ ಬ್ಲ್ಯಾಕ್‌ಮೇಲ್‌ ಮಾಡುತ್ತಿದ್ದ ಅದೇ ಸಂಸ್ಥೆಯ ಮಾಜಿ ಉದ್ಯೋಗಿಯೊಬ್ಬನನ್ನು ಪೊಲೀಸರು ಬಂಧನ ಮಾಡಿರುವ ಕುರಿತು ವರದಿಯಾಗಿದೆ.

Sponsored

ಉಡುಪಿ ಜಿಲ್ಲೆಯ ಕಾಪು ಮೂಲದ ಅಭಿಷೇಕ್‌ ಸುರೇಂದ್ರ ಪೂಜಾರಿ ಬಂಧಿತ ಆರೋಪಿ.

ಸಂಸ್ಥೆಯ ಮಾಲೀಕರ ಪುತ್ರಿ ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲು ಮಾಡಿದ ಉರ್ವಾ ಪೊಲೀಸರು ಆರೋಪಿಯನ್ನು ಬಂಧನ ಮಾಡಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.

ಆರೋಪಿ ಅಭಿಷೇಕ್‌ ತಾನು ಕೆಲಸ ಮಾಡುತ್ತಿದ್ದ ಸಂಸ್ಥೆಯ ಮಾಲೀಕರಿಗೆ ನಮ್ಮ ತರಬೇತಿಗೆ ದುಬೈನಲ್ಲಿ ಹೆಚ್ಚಿನ ಬೇಡಿಕೆಯಿದೆ ಎಂದು ಹೇಳಿ, ನಂಬಿಸಿ ಕಳೆದ ವರ್ಷ ದುಬೈಗೆ ಕರೆದುಕೊಂಡು ಹೋಗಿದ್ದ. ಆದರೆ ಅಲ್ಲಿ ಆ ರೀತಿಯ ಬೇಡಿಕೆ ಇಲ್ಲದೇ ಇರುವುದನ್ನು ಕಂಡು ಆರೋಪಿಯ ಅನುಮಾನಾಸ್ಪದ ಚಲನವಲನಗಳನ್ನು ಗಮನಿಸಿ ಮಾಲೀಕರು ವಾಪಾಸಲು ಸಿದ್ಧರಾಗಿದ್ದರು. ಈ ವೇಳೆ ಆರೋಪಿ ಅಭಿಷೇಕ್‌ ಮಾಲೀಕರಿಗೆ ಸಂಬಂಧಪಟ್ಟ ಖಾಸಗಿ ವಿಡಿಯೋವನ್ನು ತೋರಿಸಿದ್ದು, ನಿಮ್ಮ ಪುತ್ರಿಯ ಖಾಸಗಿ ವಿಡಿಯೋ ಕೂಡಾ ನನ್ನ ಬಳಿ ಇದೆ ಎಂದು ಬೆದರಿಸಿದ್ದ. ಇದನ್ನು ಡಿಲೀಟ್‌ ಮಾಡಲು ಎರಡು ಕೋಟಿ. ಡಿಮ್ಯಾಂಡ್‌ ಮಾಡಿದ್ದು, ತನ್ನ ಪತ್ನಿ ಖಾತೆಗೆ ವರ್ಗಾಯಿಸಲು ಹೇಳಿದ್ದ.

ಆದರೆ ಎರಡು ಕೋಟಿ ಹಣ ಕಳೆದ ಡಿಸೆಂಬರ್‌ನಲ್ಲಿ ಸಿಗದ ಕಾರಣ, ಮಾಲೀಕರ ಪುತ್ರಿಯನ್ನು ಸಂಪರ್ಕ ಮಾಡಿದ ಆರೋಪಿ ವಿಡಿಯೋ ವೈರಲ್‌ ಮಾಡುವುದಾಗಿ ಪ್ರಾಣ ಬೆದರಿಕೆ ಹಾಕಿದ್ದನು. ಅಲ್ಲದೆ ಮಾಲೀಕರ ಖಾಸಗಿ ವಿಡಿಯೋಗಳನ್ನು ಮಂಗಳೂರು ಮತ್ತು ಉಡುಪಿಯ ಕೆಲವು ಶಾಲಾ ಪ್ರಾಂಶುಪಾಲರಿಗೆ ವಾಟ್ಸಪ್‌ನಲ್ಲಿ view once ಆಯ್ಕೆಯಲ್ಲಿ ಕಳುಹಿಸಿದ್ದ.

ಅನಂತರ ಬೆದರಿಕೆಯ ಕರೆ ಹೆಚ್ಚಿದ್ದರಿಂದ ಮಾಲೀಕರ ಪುತ್ರಿ ಉರ್ವಾ ಪೊಲೀಸ್‌ ಠಾಣೆಗೆ ದೂರನ್ನು ನೀಡಿದ್ದರು. ಪೊಲೀಸರು ತನಿಖೆ ಮಾಡಿ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಆರೋಪಿಯ ಪತ್ನಿಯ ವಿರುದ್ಧವೂ ದೂರು ದಾಖಲಾಗಿದ್ದು, ಇದರಲ್ಲಿ ಆಕೆಯ ಪಾತ್ರದ ಕುರಿತು ತನಿಖೆ ಮುಂದುವರಿದಿದೆ ಎಂದು ಪೊಲೀಸರು ಹೇಳಿರುವ ಕುರಿತು ವರದಿಯಾಗಿದೆ.