ಬಡ ಆಟೋ ಡ್ರೈವರ್ ಮಕ್ಕಳು ಆಟೋ ಡ್ರೈವರ್ ಕೆಲಸಾನೇ ಮಾಡೋದು- ಸರಕಾರಿ ಉರ್ದು ಶಾಲೆಯಲ್ಲಿ ಶಿಕ್ಷಕಿಯಿಂದ ಮಕ್ಕಳ ಮೇಲೆ ದೌರ್ಜನ್ಯ
ಶಿವಮೊಗ್ಗ, ನ.15: ಸರಕಾರಿ ಶಾಲೆಯ ಶಿಕ್ಷಕಿಯೊಬ್ಬರು, ಬಡ ಮಕ್ಕಳ ಕುಟುಂಬದ ವೃತ್ತಿಯನ್ನು ಹೀಯಾಳಿಸಿರುವ ಗಂಭೀರ ಆರೋಪ ಶಿವಮೊಗ್ಗದ ಸರಕಾರಿ ಉರ್ದು ಶಾಲೆಯಲ್ಲಿ ನಡೆದಿದೆ.
Sponsoredಟಿಪ್ಪು ನಗರದ 6ನೇ ಕ್ರಾಸ್ನಲ್ಲಿರುವ ಸರಕಾರಿ ಉರ್ದು ಶಾಲೆಯ ಶಿಕ್ಷಕಿ ರಾಫಿಯಾ ಗಜಾಲಿ ವಿರುದ್ಧ ಮಕ್ಕಳು ಮತ್ತು ಪೋಷಕರು ಆಕ್ರೋಶ ವ್ಯಕ್ತಪಡಿಸಿದ್ದು, ಕೂಡಲೇ ಅವರನ್ನು ವರ್ಗಾವಣೆ ಮಾಡುವಂತೆ ಶಿವಮೊಗ್ಗ ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿಗೆ ದೂರನ್ನು ನೀಡಿದ್ದಾರೆ.
ತರಗತಿಯಲ್ಲಿ ಮಕ್ಕಳನ್ನು ಉದ್ದೇಶಿಸಿ, “ಬಡ ಆಟೋ ಡ್ರೈವರ್ ಮಕ್ಕಳು ಮುಂದೆ ಆಟೋ ಡ್ರೈವರ್ ಕೆಲಸಾನೇ ಮಾಡೋದು, ಗುಜರಿ ಮಾರುವವರ ಮಕ್ಕಳು ಗುಜರಿ ಕೆಲಸನೇ ಮಾಡೋದು ಹಾಗೂ ಹೆಣ್ಣು ಮಕ್ಕಳು ಟೈಲ್ಸ್ ಕೆಲಸದವರ ಜೊತೆ ಮದುವೆಯಾಗೋದು” ಎಂದು ಶಿಕ್ಷಕಿ ಲೇವಡಿ ಮಾಡಿ ನಿಂದಿಸಿದ್ದಾರೆ ಎನ್ನಲಾಗಿದೆ.
ಸರಕಾರಿ ಉರ್ದು ಶಾಲೆಯಲ್ಲಿ ಓದುವ ಬಡ ಕುಟುಂಬದ ಮಕ್ಕಳಿಗೆ ಪಾಠ ಮಾಡುವ ಬದಲು ಶಿಕ್ಷಕಿ ರಾಫಿಯಾ ಗಜಾಲಿ ಅವರು ಅಸಭ್ಯ ವಿಚಾರ ಬೋಧಿಸುತ್ತಾ ಮಕ್ಕಳ ಮನಸ್ಸು ಕೆಡಿಸುತ್ತಿದ್ದು, ಇದರಿಂದ ತೀವ್ರ ಬೇಸರಗೊಂಡ ಶಾಲಾ ಮಕ್ಕಳು ಶಾಲೆಗೆ ಹೋಗಲು ಹಿಂದೇಟು ಹಾಕುತ್ತಿದ್ದಾರೆ ಎಂದು ದೂರಿದ್ದಾರೆ.



