ಮಂಗಳೂರು: ಜೈಲಿನಲ್ಲಿ ಬೀಡಿ ಕೊಡದಿದ್ದರೆ ಅಡುಗೆಗೆ ಜಿರಳೆ ಹಾಕುವುದಾಗಿ ಜೈಲು ಅಧೀಕ್ಷಕರಿಗೆ ವಾರ್ನಿಂಗ್‌, ಕೈದಿ ದಾಂಧಲೆ

ಮಂಗಳೂರು, ಸೆ.17: ಮಂಗಳೂರು ಜಿಲ್ಲಾ ಕಾರಾಗೃಹದಲ್ಲಿ ವಿಚಾರಣಾಧೀನ ಕೈದಿಯೋರ್ವ ತನಗೆ ಬೀಡಿ ನೀಡಲು ಒತ್ತಾಯ ಮಾಡಿ ಸಹವರ್ತಿಗಳ ಜೊತೆ ಸೇರಿ ಅಡುಗೆ ತಯಾರಿ ಮಾಡುವಾಗ ದಾಂಧಲೆ ಮಾಡಿದ್ದಲ್ಲದೆ, ಜೈಲು ಅಧೀಕ್ಷಕರಿಗೇ ಬೆದರಿಕೆ ಒಡ್ಡಿದ ಘಟನೆ ನಡೆದಿದೆ. ಈ ಕುರಿತು ಬರ್ಕೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Sponsored

ಜೈಲಿನಲ್ಲಿರುವ ಕೈದಿ ಮೊಹಮ್ಮದ್‌ ಪೈಜಲ್‌ ಕೃತ್ಯ ಎಸಗಿದ ವ್ಯಕ್ತಿ. ಆರೋಪಿ ಫೈಲ್‌ ಗ್ಯಾಸ್‌ ಸಿಲಿಂಡರ್‌ನಿಂದ ಗೇಟ್‌ ಮತ್ತು ಬೀಗದ ಕೀಗೆ ಜೋರಾಗಿ ಹೊಡೆದು ಬೀಗ ತೆರೆಯುವಂತೆ ಕೂಗಾಡಿದ್ದು, ಅಲ್ಲದೇ ಗ್ಯಾಸ್‌ ಸಿಲಿಂಡರ್‌ಗಳನ್ನು ಬ್ಲಾಸ್ಟ್‌ ಮಾಡುವುದಾಗಿ ಬೆದರಿಕೆ ಒಡ್ಡಿದ್ದಾನೆ. ಜೈಲಿನಲ್ಲಿ ಕಿರುಚಾಡುತ್ತಾ ಅಧಿಕಾರಿಗಳ ಕರ್ತವ್ಯಕ್ಕೆ ಅಡ್ಡಿಪಡಿಸಿದ್ದಾನೆ. ಜೈಲಿನ ಒಳಗೆ ಭದ್ರತಾ ಲೋಪ ಉಂಟುಮಾಡಿ, ಸರಕಾರಿ ಕರ್ತವ್ಯಕ್ಕೆ ಅಡ್ಡಿಪಡಿಸಿ ಜೀವ ಬೆದರಿಕೆ ಒಡ್ಡಿದ ವಿಚಾರಣಾ ಬಂಧಿ ವಿರುದ್ಧ ಪ್ರಕರಣ ದಾಖಲಾಗಿದೆ.