ಕೆಲವು ದಿನಗಳ ಹಿಂದಷ್ಟೇ ಕೊಬ್ಬರಿಯ ಬೆಲೆ ದಾಖಲೆ ಮಟ್ಟದಲ್ಲಿ ಏರಿಕೆ ಕಂಡಿತ್ತು. ಇದರ ನಡುವೆ ಇದೀಗ ತೆಂಗಿನ ಚಿಪ್ಪಿಗೆ ಎಲ್ಲಿಲ್ಲದ ಬೆಲೆ ಬಂದಿದ್ದು ಒಂದು ಕೆಜಿ ಚಿಪ್ಪಿನ ಬೆಲೆ 5 ಪಟ್ಟು ಹೆಚ್ಚಾಗಿದೆ.
ಹೌದು, ಒಮ್ಮೆ ಕೇವಲ ಸೌದೆಗಾಗಿ, ಉರುವಲಾಗಿ ಅಥವಾ ತ್ಯಾಜ್ಯವೆಂದು ಎಸೆಯಡಲ್ಪಡುತ್ತಿದ್ದ ತೆಂಗಿನ ಚಿಪ್ಪು ಇಂದು ಕರ್ನಾಟದ ಪಕ್ಕದ ರಾಜ್ಯ ಕೇರಳದಲ್ಲೂ ದಾಖಲೆ ಬೆಲೆಗೆ ಮಾರಟಾವಾಗುತ್ತಿದೆ. ಕೆಲವು ತಿಂಗಳ ಹಿಂದೆಯಷ್ಟೇ ಕೆ.ಜಿ.ಗೆ ಕೇವಲ ₹5 ರಿಂದ 10 ರೂಪಾಯಿನಷ್ಟಿದ್ದ ತೆಂಗಿನ ಚಿಪ್ಪಿನ ಬೆಲೆ ಪ್ರಸ್ತುತ ಪ್ರಮುಖ ಮಾರುಕಟ್ಟೆಗಳಲ್ಲಿ 32ರಿಂದ 35 ರೂಪಾಯಿವರೆಗೆ ಮಾರಾಟವಾಗುತ್ತಿದೆ. ಈ ಹಿಂದೆ ಇಡೀ ತೆಂಗಿನಕಾಯಿಯ ಬೆಲೆಯೇ ಕೆ.ಜಿ.ಗೆ ₹30 ರಿಂದ ₹40 ರಷ್ಟಿತ್ತು. ಆದರೆ ಇಂದು ತೆಂಗಿನಕಾಯಿಯಿಂದ ಬೇರ್ಪಡಿಸಿದ ಕೇವಲ ಚಿಪ್ಪು ಅಷ್ಟೇ ಬೆಲೆ ಬಾಳುತ್ತಿರುವುದು ವ್ಯಾಪಾರಿಗಳು, ರೈತರಿಗೆ ಭಾರಿ ಸಂತಸ ತರಿಸಿದೆ.
ತೆಂಗಿನ ಚಿಪ್ಪಿಗೆ ಬೇಡಿಕೆ ಹೆಚ್ಚಾಗಲು ಪ್ರಮುಖ ಕಾರಣ ಏನು?
ತೆಂಗಿನ ಚಿಪ್ಪನ್ನು ಹೆಚ್ಚಿನ ತಾಪಮಾನದಲ್ಲಿ ಕಾಯಿಸಿ ಉನ್ನತ ದರ್ಜೆಯ “ಆಕ್ಟಿವೇಟೆಡ್ ಕಾರ್ಬನ್” ಅನ್ನು ತಯಾರಿಸಲಾಗುತ್ತದೆ. ಜಾಗತಿಕವಾಗಿ ಈ ವಸ್ತುವಿಗೆ ಭಾರಿ ಡಿಮ್ಯಾಂಡ್ ಇದೆ. ಇನ್ನೂ ಈ ಆಕ್ಟಿವೇಟೆಡ್ ಕಾರ್ಬನ್ ಅನ್ನು ನೀರು ಶುದ್ಧೀಕರಣ, ಸಕ್ಕರೆ ಶುದ್ಧೀಕರಣ, ವಾಯು ಮಾಲಿನ್ಯ ನಿಯಂತ್ರಣ ಉಪಕರಣಗಳು, ಔಷಧೀಯ ಉತ್ಪನ್ನಗಳು, ನವೀಕರಿಸಬಹುದಾದ ಇಂಧನ ಹಾಗೂ ಸೌಂದರ್ಯವರ್ಧಕ ವಸ್ತುಗಳ ತಯಾರಿಕೆಯಲ್ಲಿ ಹೆಚ್ಚಾಗಿ ಬಳಕೆ ಮಾಡಲಾಗುತ್ತದೆ.
