ಆಶ್ರಮ ಶಾಲೆಯಲ್ಲಿ ಶಿಕ್ಷೆಗೆಂದು 82 ಮಕ್ಕಳ ಅರ್ಧ ತಲೆ ಬೋಳಿಸಿದ ಶಿಕ್ಷಕರು

ಶನಿವಾರ ನಿಗದಿತ ಕ್ಷೌರ ಅವಧಿಯ ವೇಳೆ ಆಟವಾಡುತ್ತಿದ್ದರು ಎಂಬ ಕಾರಣಕ್ಕೆ ಸುಮಾರ 82 ವಿದ್ಯಾರ್ಥಿಗಳಿಗೆ ಅರ್ಧ ಕ್ಷೌರ ಹಾಗೂ ಅಲ್ಲಲ್ಲಿ ಬೋಳಿಸಿದ ತಲೆಯಂತೆ ವಿಕೃತವಾಗಿ ಕೂದಲು ಕತ್ತರಿಸಿ ಶಿಕ್ಷೆ ನೀಡಿರುವ ಘಟನೆ ಮಹಾರಾಷ್ಟ್ರದಲ್ಲಿ ಬೆಳಕಿಗೆ ಬಂದಿದೆ. 

Sponsored

ಶನಿವಾರವು ವಿದ್ಯಾರ್ಥಿಗಳಿಗೆ ದಿನನಿತ್ಯದ ಸ್ವಚ್ಛತೆ ಮತ್ತು ಶಿಸ್ತಿನ ದಿನವಾಗಿದ್ದು, ಶಾಲೆ ವತಿಯಿಂದಲೇ ವಿದ್ಯಾರ್ಥಿಗಳಿಗೆ ಕ್ಷೌರ ಮಾಡಿಸಲು ವ್ಯವಸ್ಥೆ ಮಾಡಲಾಗಿತ್ತು. ಆದರೆ ಕ್ಷೌರ ಮಾಡುವಾಗ ವಿದ್ಯಾರ್ಥಿಗಳ ಕೂದಲನ್ನು ಅರ್ಧ ಮಾತ್ರ ಕತ್ತರಿಸಲಾಗಿದ್ದು, ಅವರಿಗೆ ಅಸಮ ಹಾಗೂ ಅರ್ಧ ಬೋಳಿಸಿದ ವಿಚಿತ್ರ ನೋಟವನ್ನು ನೀಡಲಾಗಿದೆ. ಮಕ್ಕಳ ಈ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆ ಪೋಷಕರಲ್ಲಿ ತೀವ್ರ ಅಸಮಾಧಾನ ಮತ್ತು ಆಕ್ರೋಶ ಭುಗಿಲೆದ್ದಿದೆ.

ಫೋಟೋಗಳು ವೈರಲ್ ಆದ ನಂತರ ಉನ್ನತ ಕಚೇರಿಯ ಅಧಿಕಾರಿಗಳು ಶಾಲೆಯನ್ನು ಸಂಪರ್ಕಿಸಿ ಕೂಡಲೇ ವಿದ್ಯಾರ್ಥಿಗಳ ಕೂದಲನ್ನು ಸಮವಾಗಿ ಕತ್ತರಿಸುವಂತೆ ಸೂಚನೆ ನೀಡಿದ್ದಾರೆ. ಅದರಂತೆ ಅಂದೇ ಆ ಸೂಚನೆಯನ್ನು ಪಾಲಿಸಲಾಗಿದೆ. ಅಲ್ಲದೆ ಶಾಲೆಯ ಮುಖ್ಯೋಪಾಧ್ಯಾಯರು ಅಧೀಕ್ಷಕರಿಗೆ ಶೋಕಾಸ್ ನೋಟು ಜಾರಿ ಮಾಡಿದ್ದಾರೆ.

ಮತ್ತೊಂದೆಡೆ ಶಾಲೆಯ ಕಡೆಯಿಂದ ವಿಭಿನ್ನ ಸಮರ್ಥನೆಗಳು ಕೇಳಿಬಂದಿವೆ. ಮಕ್ಕಳ ಸ್ವಚ್ಛತೆಯ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿತ್ತು ಎಂದೂ, ಮಳೆಯ ಕಾರಣದಿಂದ ಕ್ಷೌರ ಕಾರ್ಯವು ವಿಳಂಬವಾಯಿತು ಎಂದೂ ಅಧೀಕ್ಷಕರು ತಿಳಿಸಿದ್ದಾರೆ. ಟ್ರಿಮ್ಮರ್‌ನಲ್ಲಿ ಚಾರ್ಜ್ ಖಾಲಿಯಾದ ಕಾರಣ ಕ್ಷೌರ ಅರ್ಧಕ್ಕೆ ನಿಂತುಹೋಯಿತು ಎಂದು ಶಾಲಾ ಅಧಿಕಾರಿಗಳು ಮತ್ತೊಂದು ಸ್ಪಷ್ಟನೆ ನೀಡಿದ್ದಾರೆ. ವಿದ್ಯಾರ್ಥಿಗಳ ತುಂಟಾಟ ಹಾಗೂ ಆಟಾಟೋಪಗಳಿಂದ ಸಿಟ್ಟಿಗೆದ್ದ ಅಧೀಕ್ಷಕರು ಈ ರೀತಿಯ ಶಿಕ್ಷೆ ನೀಡಿದ್ದಾರೆ ಎನ್ನಲಾಗಿದೆ