ಹಿಜಾಬ್ ಧರಿಸದೆ ಹಾಡು ಹಾಡಿದ್ದಕ್ಕಾಗಿ ಇರಾನ್ನಲ್ಲಿ ಪ್ರಸಿದ್ಧ ಗಾಯಕಿ ಪರಸ್ತೂ ಅಹ್ಮದಿ ಅವರಿಗೆ ನ್ಯಾಯಾಲಯವು ಬರೋಬ್ಬರಿ 74 ಚಾವಟಿ ಏಟುಗಳ ಶಿಕ್ಷೆ ವಿಧಿಸಿದೆ.
ಗಾಯಕಿಯ ಜೊತೆಗೆ ಅವರ ಸಂಗೀತ ತಂಡದ ಎಂಟು ಸದಸ್ಯರಿಗೂ ಇದೇ ರೀತಿಯ ಶಿಕ್ಷೆಯನ್ನು ಪ್ರಕಟಿಸಲಾಗಿದೆ. ಇರಾನ್ನ ಕೋಮ್(Qom) ಪ್ರಾಂತ್ಯದ ನ್ಯಾಯಾಲಯ ಈ ಕಠಿಣ ತೀರ್ಪು ನೀಡಿದ್ದು, ಈ ಘಟನೆ ಈಗ ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಏನಿದು ಘಟನೆ?
29 ವರ್ಷದ ಯುವ ಗಾಯಕಿ ಪರಸ್ತೂ ಅಹ್ಮದಿ, 2024ರ ಕೊನೆಯಲ್ಲಿ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ನೇರ ಪ್ರಸಾರದ (ಲೈವ್ ಸ್ಟ್ರೀಮ್) ಮೂಲಕ ಕನ್ಸರ್ಟ್ ಒಂದನ್ನು ನಡೆಸಿಕೊಟ್ಟಿದ್ದರು. ಈ ಕಾರ್ಯಕ್ರಮದಲ್ಲಿ ಅವರು ಹಿಜಾಬ್ ಧರಿಸದೆ ಇರಾನ್ನ ದೇಶಭಕ್ತಿ ಗೀತೆಯಾದ ‘ಅಜ್ ಖೂನೆ ಜವಾನಾನೆ ವತನ್’ ಎಂಬ ಹಾಡನ್ನು ಹಾಡಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಅತಿ ವೇಗವಾಗಿ ಹರಡಿ, ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದುಕೊಂಡಿತ್ತು. ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಪೊಲೀಸರು ಗಾಯಕಿ ಮತ್ತು ಅವರ ತಂಡವನ್ನು ವಶಕ್ಕೆ ಪಡೆದು, ನಂತರ ಬಿಡುಗಡೆ ಮಾಡಿದ್ದರು. ಆದರೆ, ಇಸ್ಲಾಮಿಕ್ ನಿಯಮಗಳನ್ನು ಉಲ್ಲಂಘಿಸಿದ ಆರೋಪದ ಮೇಲೆ ಅವರ ವಿರುದ್ಧ ಕಾನೂನು ಪ್ರಕ್ರಿಯೆ ಮುಂದುವರಿದಿತ್ತು.
ಇರಾನ್ನ ಇಸ್ಲಾಮಿಕ್ ದಂಡ ಸಂಹಿತೆಯ ಅಡಿಯಲ್ಲಿ ಸಾರ್ವಜನಿಕವಾಗಿ ಹಿಜಾಬ್ ಧರಿಸದೆ ಇರುವುದು ಧಾರ್ಮಿಕ ನಿಯಮಗಳ ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ. ಹಾಗೆಯೇ ಡಿಜಿಟಲ್ ಮಾಧ್ಯಮಗಳ ಮೂಲಕ ಇಂತಹ ವಿಷಯಗಳನ್ನು ಹರಡುವುದನ್ನು ‘ನೈತಿಕವಾಗಿ ಆಕ್ಷೇಪಾರ್ಹ’ ಎಂದು ಅಲ್ಲಿನ ಕಾನೂನು ವ್ಯಾಖ್ಯಾನಿಸುತ್ತದೆ. ಈ ಹಿನ್ನೆಲೆಯಲ್ಲಿ ಪೊಲೀಸರು ಇವರ ವಿರುದ್ಧ ಕಠಿಣ ಕ್ರಮ ಕೈಗೊಂಡಿದ್ದಾರೆ.
ಇದೀಗ ನ್ಯಾಯಾಲಯವು ಗಾಯಕಿಗೆ ಚಳಿಯ ದಿನ ಶಿಕ್ಷೆಯನ್ನು ನೀಡಿದೆ. ಗಾಯಕಿ ಪರಸ್ತೂ ಮತ್ತು ಅವರ ತಂಡದ ಸದಸ್ಯರಿಗೆ ಮುಂದಿನ ಎರಡು ವರ್ಷಗಳ ಕಾಲ ಯಾವುದೇ ದೇಶಕ್ಕೆ ಪ್ರಯಾಣ ಮಾಡದಂತೆ ನಿಷೇಧ ಹೇರಲಾಗಿದೆ. ಜೊತೆಗೆ ಮುಂದಿನ ಎರಡು ವರ್ಷಗಳ ಕಾಲ ಅವರು ಯಾವುದೇ ರೀತಿಯ ಕಲಾತ್ಮಕ ಚಟುವಟಿಕೆಗಳು ಅಥವಾ ಸಂಗೀತ ಕಾರ್ಯಕ್ರಮಗಳನ್ನು ನಡೆಸುವಂತಿಲ್ಲ ಎಂದು ಕೋರ್ಟ್ ಕಠಿಣ ಆದೇಶ ಹೊರಡಿಸಿದೆ. ಮಾನವ ಹಕ್ಕುಗಳ ಸಂಘಟನೆಗಳ ಆಕ್ರೋಶ ಈ ತೀರ್ಪಿಗೆ ಇರಾನ್ ಒಳಗಡೆ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ವಿರೋಧ ವ್ಯಕ್ತವಾಗುತ್ತಿದೆ.