ಲವರ್ ವಿರುದ್ಧ ರೇಪ್‌ ಕೇಸ್‌ ಹಾಕಿದ್ರೆ ಶಿಕ್ಷೆ ತಡೆಯಲು ಬರುತ್ತಿದೆ ‘ರೋಮಿಯೋ-ಜೂಲಿಯೆಟ್ ನಿಯಮ’ – ಏನಿದು ಹೊಸ ಕಾನೂನು?

ಇಂದು ಅಪ್ರಾಪ್ತ ವಯಸ್ಕರ ರಕ್ಷಣೆಗೆ ಇರುವ ಕಠಿಣ ಕಾನೂನುಗಳು ಕೆಲವೊಮ್ಮೆ ಹದಿಹರೆಯದವರ ಪ್ರೇಮ ಸಂಬಂಧಗಳನ್ನೇ ಅಪರಾಧವನ್ನಾಗಿಸಿ, ಅವರ ಭವಿಷ್ಯವನ್ನು ಸಂಕಷ್ಟಕ್ಕೆ ದೂಡುತ್ತಿರುವ ಅನೇಕ ಘಟನೆಗಳು ಬೆಳಕಿಗೆ ಬರುತ್ತಿದ್ದು, ದೊಡ್ಡ ಮಟ್ಟದಲ್ಲಿ ಚರ್ಚೆ ಹುಟ್ಟುಹಾಕಿದೆ. ಇದೀಗ ಇಂತಹ ಪ್ರಕರಣಗಳಿವೆ ಬ್ರೇಕ್ ಹಾಕಲು ನೇಪಾಳ ಸರ್ಕಾರ ಮುಂದಾಗಿದೆ. ಅದುವೆ ರೋಮಿಯೋ- ಜೂಲಿಯಟ್ ನಿಯಮವೆಂಬ ಹೊಸಕಾನೂನು. ಏನಿದು ಹೊಸ ನಿಯಮ? ಇಲ್ಲಿದೆ ನೋಡಿ ಡಿಟೇಲ್ಸ್.

Sponsored

ಹೌದು, ನೇಪಾಳ ಸರ್ಕಾರವು ಹದಿಹರೆಯದವರ ನಿಜವಾದ ಪ್ರೇಮ ಸಂಬಂಧಗಳನ್ನ ಉಳಿಸಲು ಒಂದು ಮಹತ್ವದ ಕಾನೂನು ತಿದ್ದುಪಡಿಗೆ ಮುಂದಾಗಿದೆ. ಅದೇನೆಂದರೆ ಪರಸ್ಪರ ಒಪ್ಪಿಗೆಯಿಂದ ಸಂಬಂಧ ಹೊಂದುವ 16 ರಿಂದ 18 ವರ್ಷದೊಳಗಿನ ಹದಿಹರೆಯದವರನ್ನು ಅತ್ಯಾಚಾರದಂತಹ ಗಂಭೀರ ಕ್ರಿಮಿನಲ್ ಮೊಕದ್ದಮೆಗಳಿಂದ ರಕ್ಷಿಸಲು  ತನ್ನ ಕಾನೂನಿನಲ್ಲಿ ‘ರೋಮಿಯೋ ಮತ್ತು ಜೂಲಿಯೆಟ್’ ನಿಯಮವನ್ನು (Romeo and Juliet Clause) ಸೇರಿಸಲು ಯೋಜಿಸುತ್ತಿದೆ. 

ನೇಪಾಳದ ಪ್ರಸ್ತುತ ಕಾನೂನಿನ ಪ್ರಕಾರ, 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ವ್ಯಕ್ತಿಗಳೊಂದಿಗೆ ನಡೆಸುವ ಯಾವುದೇ ಲೈಂಗಿಕ ಸಂಪರ್ಕವನ್ನು (ಅದು ಇಬ್ಬರ ಒಪ್ಪಿಗೆಯಿಂದ ನಡೆದಿದ್ದರೂ ಸಹ) ಕಾನೂನುಬಾಹಿರ ಅಥವಾ ‘ಶಾಸನಬದ್ಧ ಅತ್ಯಾಚಾರ’ (Statutory Rape) ಎಂದು ಪರಿಗಣಿಸಲಾಗುತ್ತದೆ. ಇದರಿಂದಾಗಿ, ಹದಿಹರೆಯದ (Teenagers) ಪ್ರೇಮಿಗಳು ತಮ್ಮ ಒಪ್ಪಿಗೆಯಿಂದ ಸಂಬಂಧ ಹೊಂದಿದ್ದರೂ, ಹುಡುಗನ ವಿರುದ್ಧ ಅತ್ಯಾಚಾರದಂತಹ ಗಂಭೀರ ಕ್ರಿಮಿನಲ್ ಪ್ರಕರಣಗಳು ದಾಖಲಿಸುತ್ತಿದ್ದಾರೆ. ಇದು ಒಬ್ಬ ಹುಡುಗನ ಭವಿಷ್ಯವನ್ನೇ ನಾಶ ಮಾಡಿಬಿಡುತ್ತಿದೆ. ಆದ್ರೆ ರೋಮಿಯೋ-ಜೂಲಿಯೆಟ್ ನಿಯಮ ಇದನ್ನು ತಡೆಯುತ್ತದೆ.

ಏನಿದು ಕಾನೂನು?

16 ರಿಂದ 18 ವರ್ಷದೊಳಗಿನ ಹದಿಹರೆಯದವರು ಪರಸ್ಪರ ಒಪ್ಪಿಗೆಯಿಂದ ಸಂಬಂಧ ಹೊಂದಿದ್ದರೆ ಮತ್ತು ಅವರ ನಡುವಿನ ವಯಸ್ಸಿನ ವ್ಯತ್ಯಾಸವು ತುಂಬಾ ಕಡಿಮೆ ಇದ್ದರೆ (ಉದಾಹರಣೆಗೆ 3 ವರ್ಷಗಳಿಗಿಂತ ಕಡಿಮೆ), ಅದನ್ನು ಅತ್ಯಾಚಾರ ಎಂದು ಪರಿಗಣಿಸಬಾರದು ಎಂಬುದು ಈ ನಿಯಮದ ಆಶಯ. ಈ ನಿಯಮವು, ಸಹಜ ಪ್ರೇಮ ಸಂಬಂಧಗಳನ್ನು ಕ್ರಿಮಿನಲ್ ಪ್ರಕರಣಗಳಿಂದ ರಕ್ಷಿಸುತ್ತದೆ.

ಅನೇಕ ದೇಶಗಳಲ್ಲಿ ಮಕ್ಕಳನ್ನು ಶೋಷಣೆಯಿಂದ ರಕ್ಷಿಸಲು ಅಪ್ರಾಪ್ತರು ಎನ್ನಲು ಒಂದು ವಯಸ್ಸನ್ನು ನಿಗದಿಪಡಿಸಲಾಗಿದೆ.(ಉದಾಹರಣೆಗೆ ಭಾರತದಲ್ಲಿ 18 ವರ್ಷ). ಈ ವಯಸ್ಸಿಗಿಂತ ಕೆಳಗಿನವರೊಂದಿಗೆ ಲೈಂಗಿಕ ಸಂಪರ್ಕ ಹೊಂದುವುದು ಕಾನೂನಿನ ಪ್ರಕಾರ ಅತ್ಯಾಚಾರ. ಆದರೆ, 16 ವರ್ಷದ ಹುಡುಗಿ ಮತ್ತು 17 ವರ್ಷದ ಹುಡುಗ ಪರಸ್ಪರ ಪ್ರೀತಿಸಿ, ಒಪ್ಪಿಗೆಯಿಂದ ಸಂಬಂಧ ಹೊಂದಿದಾಗಲೂ ಕಠಿಣ ಕಾನೂನಿನಿಂದಾಗಿ ಹುಡುಗನನ್ನು ಅತ್ಯಾಚಾರಿ ಎಂದು ಜೈಲಿಗೆ ಕಳುಹಿಸಲಾಗುತ್ತದೆ. ಇಂತಹ ಪ್ರಕರಣಗಳನ್ನು ತಪ್ಪಿಸಲು ರೋಮಿಯೋ-ಜೂಲಿಯೆಟ್ ನಿಯಮವನ್ನು ತರಲಾಯಿತು. ಇದು ವಯಸ್ಕನಿಂದ ನಡೆಯುವ ಅತ್ಯಾಚಾರ ಮತ್ತು ಹದಿಹರೆಯದ ಪ್ರೇಮದ ನಡುವಿನ ವ್ಯತ್ಯಾಸವನ್ನು ಗುರುತಿಸುತ್ತದೆ. 

ಇನ್ನೂ ರೋಮಿಯೋ-ಜೂಲಿಯೆಟ್ ನಿಯಮದ ವಿನಾಯಿತಿ ಸಿಗಬೇಕಾದರೆ ಕೇವಲ ಒಪ್ಪಿಗೆ ಇದ್ದರೆ ಸಾಲದು, ಪ್ರಮುಖವಾಗಿ 3 ನಿಯಮಗಳು ಅನ್ವಯಿಸುತ್ತವೆ. ಅವುಗಳು ಹೀಗಿವೆ.

ಕಡಿಮೆ ವಯಸ್ಸಿನ ವ್ಯತ್ಯಾಸ: 

ಪ್ರೇಮಿಗಳ ನಡುವಿನ ವಯಸ್ಸಿನ ವ್ಯತ್ಯಾಸ ತುಂಬಾ ಕಡಿಮೆ ಇರಬೇಕು. ಉದಾಹರಣೆಗೆ, ವ್ಯತ್ಯಾಸ 3 ವರ್ಷ ಇರಬೇಕೆಂದಿದ್ದರೆ, 16 ವರ್ಷದ ಅಪ್ರಾಪ್ತನ ಜೊತೆ 19 ವರ್ಷದ ವ್ಯಕ್ತಿ ಸಂಬಂಧ ಹೊಂದಿದ್ದರೆ ವಿನಾಯಿತಿ ಸಿಗಬಹುದು, ಆದರೆ 25 ವರ್ಷದ ವ್ಯಕ್ತಿ ಹೊಂದಿದ್ದರೆ ಅದು ಗಂಭೀರ ಅಪರಾಧವಾಗುತ್ತದೆ.

ಯಾವುದೇ ಬಲವಂತ ಇರಬಾರದು: 

ಸಂಬಂಧದಲ್ಲಿ ಯಾವುದೇ ರೀತಿಯ ಬ್ಲ್ಯಾಕ್‌ಮೇಲ್, ಬೆದರಿಕೆ, ಅಧಿಕಾರದ ದುರುಪಯೋಗ ಅಥವಾ ಆಮಿಷ ಇರಬಾರದು. ಅದು ಸಂಪೂರ್ಣ ಸ್ವಯಂಪ್ರೇರಿತವಾಗಿರಬೇಕು.

ಕನಿಷ್ಠ ವಯಸ್ಸಿನ ಮಿತಿ: 

ವಿನಾಯಿತಿ ನೀಡಲು ಒಂದು ಕನಿಷ್ಠ ವಯಸ್ಸನ್ನು ನಿಗದಿಪಡಿಸಲಾಗುತ್ತದೆ (ಉದಾಹರಣೆಗೆ ಕನಿಷ್ಠ 14 ಅಥವಾ 16 ವರ್ಷ ತುಂಬಿರಬೇಕು). ಅದಕ್ಕಿಂತ ಚಿಕ್ಕ ಮಕ್ಕಳಾಗಿದ್ದರೆ ಈ ನಿಯಮ ಅನ್ವಯಿಸುವುದಿಲ್ಲ.

ಸದ್ಯ ನೇಪಾಳ ಸರ್ಕಾರ ಈ ಹೊಸ ಕಾನೂನನ್ನು ಅಳವಡಿಸಿಕೊಳ್ಳಲು ಮುಂದಾಗಿದೆ. ಆದರೆ ಭಾರತ ಇಷ್ಟೊಂದು ಮುಂದುವರೆದಿದ್ದರೂ ಕೂಡ ಇಂದಿಗೂ ಪೋಕ್ಸೋ ಕಾನೂನನ್ನು ಹೊಂದಿದೆ. ಭಾರತದಲ್ಲಿ ಪೋಕ್ಸೊ (POCSO) ಕಾಯ್ದೆ-2012ರ ಪ್ರಕಾರ 18 ವರ್ಷದೊಳಗಿನವರೊಂದಿಗೆ ನಡೆಸುವ ಎಲ್ಲಾ ಲೈಂಗಿಕ ಕ್ರಿಯೆಗಳನ್ನು ಅತ್ಯಾಚಾರ ಎಂದೇ ಪರಿಗಣಿಸಲಾಗುತ್ತದೆ. ಒಪ್ಪಿಗೆಯಿದ್ದರೂ ಕನಿಷ್ಠ 10 ವರ್ಷ ಜೈಲು ಶಿಕ್ಷೆ ಕಡ್ಡಾಯವಾಗಿದೆ. ಇದು ಅನೇಕ ಹುಡುಗರ ಜೀವನವನ್ನು ಹಾಳುಮಾಡುತ್ತಿರುವುದು ದುರಂತ.