ರಾಷ್ಟ್ರಪತಿ ಮುರ್ಮು ಅವರ ಎಡಿಸಿ ಮೇಜರ್ ರಿಷಭ್ ಸಿಂಗ್ ಭಾರತೀಯ ಸೇನೆಯಿಂದ ಸ್ವಯಂ ನಿವೃತ್ತಿ!!

ಭಾರತದ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರ ಬೆಂಗಾವಲಾಗಿ ನಿಂತು ತಮ್ಮ ಶಿಸ್ತು ಮತ್ತು ಕರ್ತವ್ಯ ಪ್ರಜ್ಞೆಯಿಂದ ಇಡೀ ದೇಶದ ಗಮನ ಸೆಳೆದಿದ್ದ ಮೇಜರ್ ರಿಷಬ್ ಸಿಂಗ್ ಸಂಬ್ಯಾಲ್ ಅವರು ಭಾರತೀಯ ಸೇನೆಯಿಂದ ಅವಧಿಗೂ ಮುನ್ನ ನಿವೃತ್ತಿ ಪಡೆದುಕೊಂಡಿದ್ದಾರೆ.

Sponsored

ಸಂಬ್ಯಾಲ್ ಅವರು 2021ರಲ್ಲಿ ಜಾಟ್ ರೆಜಿಮೆಂಟ್‌ ನ ಕ್ಯಾಪ್ಟನ್ ಆಗಿದ್ದಾಗ ಸಾರ್ವಜನಿಕರ ಗಮನ ಸೆಳೆದಿದ್ದರು. ಆ ವರ್ಷದ ಗಣರಾಜ್ಯೋತ್ಸವದ ಮೆರವಣಿಗೆಯಲ್ಲಿ ರೆಜಿಮೆಂಟ್‌ ನ ತುಕಡಿಯನ್ನು ಮುನ್ನಡೆಸಿದ್ದರು. ಆ ತುಕಡಿಗೆ ಅತ್ಯುತ್ತಮ ಮಾರ್ಚಿಂಗ್ ಕಾಂಟಿಂಜೆಂಟ್ ಟ್ರೋಫಿ ದೊರೆತಿತ್ತು.ನಂತರ ‘ಡ್ಯಾಗರ್ಸ್’ ಎಂದು ಕರೆಯಲಾಗುವ 4 ಪ್ಯಾರಾ ವಿಶೇಷ ಪಡೆಗಳ ಕಠಿಣ ಆಯ್ಕೆ ಪ್ರಕ್ರಿಯೆಯಲ್ಲಿ ಸ್ವಯಂಪ್ರೇರಿತರಾಗಿ ಭಾಗವಹಿಸಿ ಅದನ್ನು ಪೂರ್ಣಗೊಳಿಸಿದ್ದರು. ಬಳಿಕ ಬಲಿದಾನ್ ಬ್ಯಾಡ್ಜ್ ಪಡೆದಿದ್ದರು. ಸ್ವಯಂಪ್ರೇರಿತರಾಗಿ ಈ ಆಯ್ಕೆ ಪ್ರಕ್ರಿಯೆಗೆ ಹಾಜರಾಗುವವರಲ್ಲಿ ಅಲ್ಪ ಸಂಖ್ಯೆಯವರು ಮಾತ್ರ ಈ ಗೌರವ ಪಡೆಯುತ್ತಾರೆ.

ಜಮ್ಮುವಿನ ಡೋಗ್ರಾ ರಜಪೂತ ಕುಟುಂಬದಿಂದ ಬಂದಿರುವ ಸಂಬ್ಯಾಲ್ ಅವರು ರಾಷ್ಟ್ರೀಯ ರಕ್ಷಣಾ ಅಕಾಡೆಮಿ(NDA)ಯಲ್ಲಿ ಮೂರು ವರ್ಷ ಹಾಗೂ ಭಾರತೀಯ ಮಿಲಿಟರಿ ಅಕಾಡೆಮಿಯಲ್ಲಿ ಒಂದು ವರ್ಷ ತರಬೇತಿ ಪಡೆದಿದ್ದರು. ಬಳಿಕ ಸುಮಾರು ಎಂಟು ವರ್ಷಗಳ ಕಾಲ ನಿಯೋಜಿತ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದರು. ಒಟ್ಟಾರೆ 12 ವರ್ಷಗಳ ಕಾಲ ಸೇನೆಯೊಂದಿಗೆ ಸಂಬಂಧ ಹೊಂದಿದ್ದರು.

2024-2025ರ ಅವಧಿಯಲ್ಲಿ ಅವರನ್ನು ರಾಷ್ಟ್ರಪತಿಯ ಎಡಿಸಿಯಾಗಿ ಆಯ್ಕೆ ಮಾಡಲಾಗಿತ್ತು. ಸಶಸ್ತ್ರ ಪಡೆಗಳಲ್ಲಿನ ಅತ್ಯಂತ ಪ್ರತಿಷ್ಠಿತ ಮತ್ತು ಸೂಕ್ಷ್ಮ ಕಾರ್ಯಯೋಜನೆಗಳಲ್ಲಿ ಎಡಿಸಿ ಹುದ್ದೆಯೂ ಒಂದು. ಎಡಿಸಿಯ ಜವಾಬ್ದಾರಿಯಲ್ಲಿ ರಾಷ್ಟ್ರಪತಿಯ ಪ್ರೋಟೋಕಾಲ್ ನಿರ್ವಹಣೆ, ಅಧಿಕೃತ ಕಾರ್ಯಕ್ರಮಗಳು ಮತ್ತು ಪ್ರವಾಸಗಳಲ್ಲಿ ಅವರೊಂದಿಗೆ ತೆರಳುವುದು, ಸೂಕ್ಷ್ಮ ಸಮನ್ವಯ ನಡೆಸುವುದು ಹಾಗೂ ಸದಾ ಎಚ್ಚರಿಕೆಯಿಂದ ಕರ್ತವ್ಯ ನಿರ್ವಹಿಸುವುದು ಸೇರಿದೆ.

ಅನೇಕರು ಅವರನ್ನು ‘ನ್ಯಾಷನಲ್ ಕ್ರಶ್’ ಎಂದೇ ಕರೆಯುತ್ತಿದ್ದರು. ರಾಷ್ಟ್ರಪತಿಯವರು ಶಬರಿಮಲೆಗೆ ಭೇಟಿ ನೀಡಿದ್ದಾಗ ಇರುಮುಡಿ ಹೊತ್ತು ಮೆಟ್ಟಿಲು ಹತ್ತಲು ನೆರವಾದ ರೀತಿ ಸೇರಿದಂತೆ, ಅವರನ್ನು ತಾಯಿಯಂತೆ ಗೌರವದಿಂದ ನೋಡಿಕೊಳ್ಳುತ್ತಿದ್ದ ವಿಡಿಯೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದವು.ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಲೈವ್ ಬಂದಿದ್ದ ರಿಷಬ್, ಸೇನೆಗೆ ರಾಜೀನಾಮೆ ನೀಡಿರುವುದನ್ನು ದೃಢಪಡಿಸಿದ್ದಾರೆ. 

“ಕೆಲವು ಖಾಸಗಿ ಕಾರಣಗಳು ಹಾಗೂ ಕುಟುಂಬಕ್ಕಾಗಿ ಸೇನೆಯನ್ನು ತೊರೆದಿದ್ದೇನೆ. ಆದರೆ ಸೇನೆಯಲ್ಲಿ ಸಾಧಿಸಿದ್ದಕ್ಕಾಗಿ ನನಗೆ ಹೆಮ್ಮೆಯಿದೆ.ಕೆಲವೊಂದು ಘಟನೆಗಳು ಜೀವನವನ್ನು ಶಾಶ್ವತವಾಗಿ ಬದಲಾಯಿಸುತ್ತವೆ,” ಎಂದಿದ್ದಾರೆ. ಸೇನೆ ಬಿಟ್ಟು ವಿದೇಶದಲ್ಲಿ ನೆಲೆಸುತ್ತಾರೆ ಎಂಬ ವದಂತಿಗಳಿಗೆ ತೆರೆ ಎಳೆದ ಅವರು, “ನಾನು ಭಾರತದಲ್ಲೇ ಇದ್ದು ದೇಶ ಸೇವೆ ಮಾಡುತ್ತೇನೆ. ಮುಂದಿನ ಯೋಜನೆಗಳ ಬಗ್ಗೆ ಶೀಘ್ರದಲ್ಲೇ ತಿಳಿಸುತ್ತೇನೆ,” ಎಂದು ಸ್ಪಷ್ಟಪಡಿಸಿದ್ದಾರೆ.