ಮಡಿಕೇರಿ: ಆಟಿಕೆಯ ಎಲ್‌ಇಡಿ ಬಲ್ಬ್‌ ನುಂಗಿದ 8 ತಿಂಗಳ ಮಗು

ಆಟಿಕೆಯಲ್ಲಿದ್ದ ಸಣ್ಣ ಎಲ್‌ಇಡಿ ಬಲ್ಬನ್ನು ಆಕಸ್ಮಿಕವಾಗಿ ನುಂಗಿದ್ದ ಎಂಟು ತಿಂಗಳ ಮಗುವೊಂದನ್ನು ವೈದ್ಯರು ಚಿಕಿತ್ಸೆ ನೀಡುವ ಮೂಲಕ ಪಾರು ಮಾಡಿದ ಘಟನೆಯೊಂದು ಮಡಿಕೇರಿಯಲ್ಲಿ ನಡೆದಿದೆ.

Sponsored

ಮಗು ಮನೆಯಲ್ಲಿ ಆಟವಾಡುತ್ತಿದ್ದಾಗ ಆಟಿಕೆಯಲ್ಲಿದ್ದ ಸಣ್ಣ ಎಲ್‌ಇಡಿ ಬಲ್ಬನ್ನು ಬಾಯಿಗೆ ಹಾಕಿ ನುಂಗಿದೆ. ಮಗು ಕೂಡಲೇ ಅಳಲು ಪ್ರಾರಂಭ ಮಾಡಿದೆ. ಪೋಷಕರು ಎಷ್ಟೇ ಸಮಾಧಾನ ಮಾಡಿದರೂ ಮಗುವಿನ ಅಳು ನಿಂತಿರಲಿಲ್ಲ. ಸ್ವಲ್ಪ ಹೊತ್ತಿನಲ್ಲಿ ಮಗುವಿಗೆ ಉಸಿರಾಡಲು ತೊಂದರೆಯಾಗುತ್ತಿರುವುದನ್ನು ಗಮನಿಸಿದ ಪೋಷಕರು ಆತಂಕಗೊಂಡು ಕೂಡಲೇ ಮಡಿಕೇರಿಯ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ.

ಆಸ್ಪತ್ರೆಯ ವೈದ್ಯರು ಕೂಡಲೇ ಮಗುವನ್ನು ತಪಾಸಣೆ ನಡೆಸಿ ಎಕ್ಸ್‌ರೇ ತೆಗೆದಾಗ, ಗಂಟಲಿನಲ್ಲಿ ಸಣ್ಣದೊಂದು ವಸ್ತು ಸಿಲುಕಿರುವುದು ಕಂಡು ಬಂದಿದೆ. ಆಟಿಕೆಯ ಎಲ್‌ಇಡಿ ಬಲ್ಬ್‌ ಎನ್ನುವುದನ್ನು ವೈದ್ಯರು ಖಚಿತಪಡಿಸಿ, ಶಸ್ತ್ರಚಿಕಿತ್ಸೆಯ ಮೂಲಕ ಅದನ್ನು ಯಶಸ್ವಿಯಾಗಿ ಹೊರತೆಗೆದಿದ್ದಾರೆ. ಮಗು ಪ್ರಾಣಾಪಾಯದಿಂದ ಪಾರಾಗಿದೆ.