ಟೆನ್ಷನ್​​ನ​ಲ್ಲಿ ಆಟೋ ಚಾಲಕನಿಗೆ 156 ರೂ. ಬದಲಿಗೆ 15 ಸಾವಿರ ಹೆಚ್ಚು ಹಣ ಪಾವತಿಸಿದ ಉದ್ಯಮಿ – ಮುಂದೇನಾಯ್ತು?

ಆಟೋ ಬಾಡಿಗೆಯಾಗಿ ಕೇವಲ 150 ರೂಪಾಯಿ ಡಿಜಿಟಲ್ ಪಾವತಿ ಮಾಡಬೇಕಿದ್ದ ಪ್ರಯಾಣಿಕನೊಬ್ಬ, ಆತುರದಲ್ಲಿ ಆಕಸ್ಮಿಕವಾಗಿ ಬರೋಬ್ಬರಿ 15,682 ರೂಪಾಯಿಗಳನ್ನು ಚಾಲಕನ ಖಾತೆಗೆ ವರ್ಗಾಯಿಸಿ ಆತಂಕಕ್ಕೊಳಗಾಗಿದ್ದನು. ಆದರೆ, ಪ್ರಯಾಣಿಕನ ತಪ್ಪು ಅರಿವಾದ ತಕ್ಷಣವೇ ಯಾವುದೇ ಹಿಂಜರಿಕೆಯಿಲ್ಲದೆ ಇಡೀ ಮೊತ್ತವನ್ನು ಪ್ರಾಮಾಣಿಕವಾಗಿ ಮರಳಿ ನೀಡುವ ಮೂಲಕ ಆಟೋ ಚಾಲಕ ಮಾನವೀಯತೆ ಮೆರೆದಿದ್ದಾನೆ.

Sponsored

ಪೋಸ್ಟ್​ನಲ್ಲಿ ಏನಿದೆ?

ಲಿಂಕ್ಡ್‌ಇನ್ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾದ ಪೋಸ್ಟ್ ಮೂಲಕ ಈ ಹೃದಯಸ್ಪರ್ಶಿ ಘಟನೆ ಬೆಳಕಿಗೆ ಬಂದಿದ್ದು, ಪ್ರಸ್ತುತ ಅಂತರ್ಜಾಲದಲ್ಲಿ ಭಾರಿ ಗಮನ ಸೆಳೆಯುತ್ತಿದೆ. ಉದ್ಯಮಿಯೊಬ್ಬರು ಮುಂಜಾನೆ ತರಾತುರಿಯಲ್ಲಿ ಅಂತರರಾಷ್ಟ್ರೀಯ ಗ್ರಾಹಕರನ್ನು ಭೇಟಿಯಾಗಲು ಆಟೋ ರಿಕ್ಷಾದಲ್ಲಿ ತೆರಳಿದ್ದರು. ಆಟೋ ಪ್ರಯಾಣಕ್ಕೆ ಕೇವಲ 156ರೂ. ಆಗಿತ್ತು. ಆದರೆ, , ಗಡಿಬಿಡಿಯಲ್ಲಿ ಸ್ಕ್ರೀನ್ ಕಡೆಗೆ ಗಮನ ಹರಿಸದ ಅವರು 15,682 ಹಣವನ್ನು ನಮೂದಿಸಿ ಪಾವತಿ ಮಾಡಿಬಿಟ್ಟಿದ್ದಾರೆ.

ಸಭೆ ಮುಗಿದ ಬಳಿಕ ತಮಗೆ ವ್ಯವಹಾರದಲ್ಲಿ ನಿರೀಕ್ಷಿತ ಯಶಸ್ಸು ಸಿಗದೇ ಬೇಸರದಿಂದ ಹೊರಬಂದ ಉದ್ಯಮಿಗೆ, ತಾವು ಆಟೋ ಚಾಲಕನಿಗೆ ಇಷ್ಟೊಂದು ದೊಡ್ಡ ಮೊತ್ತವನ್ನು ವರ್ಗಾಯಿಸಿರುವ ವಿಷಯವೇ ತಿಳಿದಿರಲಿಲ್ಲ. ಆದರೆ ಅವರು ರಸ್ತೆಗೆ ಬಂದಾಗ, ತಾವು ಇಳಿದಿದ್ದ ಜಾಗದಲ್ಲೇ ಆಟೋ ಚಾಲಕ ಅಲ್ತಾಫ್ ಕಾಯುತ್ತಿರುವುದನ್ನು ಕಂಡು ಆಶ್ಚರ್ಯವಾಗಿದೆ.

ಆಟೋ ಚಾಲಕ ಅಲ್ತಾಫ್ ಉದ್ಯಮಿಯನ್ನು ಸಮೀಪಿಸಿ, ನೀವು ನನಗೆ ತಪ್ಪು ಮೊತ್ತವನ್ನು ಪಾವತಿಸಿದ್ದೀರಿ ಎಂದು ತಿಳಿಸಿ, ತಮಗೆ ಬಂದಿದ್ದ ಪೂರ್ಣ 15,682 ಹಣವನ್ನು ಮರಳಿ ಅವರ ಖಾತೆಗೆ ವರ್ಗಾಯಿಸಿದರು. ಹೆಚ್ಚುವರಿ ಹಣ ಮಾತ್ರವಲ್ಲದೆ ಇಡೀ ಮೊತ್ತವನ್ನೇ ವಾಪಸ್ ಕಳುಹಿಸಿದ್ದಾರೆ.

ಇದರಿಂದ ಪ್ರಭಾವಿತರಾದ ಉದ್ಯಮಿ, “ನೀವು ನನಗಾಗಿ ಕಾಯುತ್ತಾ ನಿಮ್ಮ ಸಮಯ ಹಾಗೂ ಕೆಲಸ ಮಿಸ್​ ಮಾಡಿಕೊಂಡಿದ್ದೀರಿ, ಕನಿಷ್ಠ ನಿಮ್ಮ ಬಾಡಿಗೆ ಹಣ 156 ಅನ್ನಾದರೂ ಇಟ್ಟುಕೊಳ್ಳಿ ಎಂದೆ. ಆದರೆ ಚಾಲಕ ಅಲ್ತಾಫ್, “ಇದು ನಮ್ಮಿಬ್ಬರಿಗೂ ದಿನದ ಆರಂಭ ಸರ್, ನಿಮ್ಮ ದಿನ ಹಾಳಾಗುವುದು ನನಗೆ ಇಷ್ಟವಿಲ್ಲ” ಎಂದು ಹೇಳಿ ಬಾಡಿಗೆ ಹಣವನ್ನು ಪಡೆಯಲೂ ನಿರಾಕರಿಸಿದ್ದಾರೆ. ತನಗಲ್ಲದ ಹಣ ತನಗೆ ಬೇಡ ಎಂಬ ಚಾಲಕನ ಈ ನಿರ್ಧಾರ ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ:

ತಮಗೆ ಎದುರಾದ ಈ ಅಪರೂಪದ ಅನುಭವವನ್ನು ಲಿಂಕ್ಡ್‌ಇನ್‌ನಲ್ಲಿ ಹಂಚಿಕೊಂಡಿದ್ದಾರೆ. ಆಟೋ ಚಾಲಕನ ಪ್ರಾಮಾಣಿಕತೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿ, ಕೃತಜ್ಞತೆ ಸಲ್ಲಿಸಿದ್ದಾರೆ. “ಇಂತಹ ಘಟನೆಗಳು ಮನುಷ್ಯತ್ವದ ಮೇಲಿನ ನಂಬಿಕೆಯನ್ನು ಮತ್ತೆ ಚಿಗುರಿಸುತ್ತವೆ” ಎಂದು ಸಾವಿರಾರು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ.