ಬ್ರಿಟಿಷ್ ಹಿಂದೂಗಳು ತಮ್ಮ ಕರ್ಮಭೂಮಿ UK ಗೇ ನಿಷ್ಠರಾಗಿರಬೇಕು – ಲಂಡನ್‌ನಲ್ಲಿ ಮೋಹನ್ ಭಾಗವತ್ ಹೇಳಿಕೆ

ಬ್ರಿಟಿಷ್ ಹಿಂದೂಗಳು ತಮ್ಮ ಕರ್ಮಭೂಮಿ ಯುಕೆಗೇ ನಿಷ್ಠರಾಗಿರಬೇಕು ಎಂದು ಲಂಡನ್‌ನಲ್ಲಿ ಆರ್‌ಎಸ್‌ಎಸ್ ಸರಸಂಘಚಾಲಕ ಮೋಹನ್ ಭಾಗವತ್ ಅವರು ಮಾರ್ಗದರ್ಶನ ಮಾಡಿದ್ದಾರೆ.

Sponsored

ಲಂಡನ್‌ನಲ್ಲಿ ಆಯೋಜಿಸಲಾಗಿದ್ದ ‘ಸೆಲೆಬ್ರೇಷನ್ ಆಫ್ ಒನ್‌ನೆಸ್’ (ಏಕತೆಯ ಆಚರಣೆ) ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅವರು, ‘ಜನ್ಮಭೂಮಿ’ಯು ವ್ಯಕ್ತಿಗೆ ಸಂಸ್ಕಾರ ಮತ್ತು ಮೌಲ್ಯಗಳನ್ನು ನೀಡಿದರೆ, ‘ಕರ್ಮಭೂಮಿ’ಯು ಆತನ ನಿಷ್ಠೆ ಮತ್ತು ಸೇವೆಗೆ ಅರ್ಹವಾದ ಸ್ಥಳವಾಗಿದೆ. ಹೀಗಾಗಿ ಬ್ರಿಟಿಷ್ ಹಿಂದೂಗಳಿಗೆ ಯುಕೆ (ಬ್ರಿಟನ್) ಅವರ ಕರ್ಮಭೂಮಿಯಾಗಿದೆ. ಒಂದು ವೇಳೆ ಸಂಘರ್ಷ ಅಥವಾ ಗೊಂದಲದ ಸನ್ನಿವೇಶ ಎದುರಾದರೆ, ಬ್ರಿಟಿಷ್ ಹಿಂದೂಗಳು ಬ್ರಿಟನ್ ಪರವಾಗಿಯೇ ನಿಲ್ಲಬೇಕು, ಹಿಂದುತ್ವದ ತತ್ವವೂ ಇದನ್ನು ಸ್ಪಷ್ಟವಾಗಿ ಬೆಂಬಲಿಸುತ್ತದೆ ಎಂದು ಭಾಗವತ್ ಸ್ಪಷ್ಟಪಡಿಸಿದರು. 

ಇನ್ನೂ ವೈವಿಧ್ಯತೆಯು ನೈಸರ್ಗಿಕವಾಗಿದ್ದು, ಅದನ್ನು ಗೌರವಿಸುವುದು ಹಾಗೂ ಸ್ವೀಕರಿಸುವುದೇ ಹಿಂದುತ್ವದ ಸಾರಾಂಶವಾಗಿದೆ. ಭಾರತದ ಜನ್ಮಭೂಮಿಯಿಂದ ಪಡೆದ ಸಂಸ್ಕಾರಗಳನ್ನು ತಾವು ವಾಸಿಸುವ ಕರ್ಮಭೂಮಿಯ ಸೇವೆಗೆ ಬಳಸಿಕೊಳ್ಳಬೇಕು ಎಂದು ಅವರು ಬ್ರಿಟನ್‌ನಲ್ಲಿರುವ ಅನಿವಾಸಿ ಭಾರತೀಯರಿಗೆ ಕಿವಿಮಾತು ಹೇಳಿದರು.

ಯುವಜನತೆಯ ಕುರಿತು ಆಶಾವಾದ ವ್ಯಕ್ತಪಡಿಸಿದ ಆರ್‌ಎಸ್‌ಎಸ್ ಮುಖ್ಯಸ್ಥರು, ಜಗತ್ತನ್ನು ಉತ್ತಮ ಸ್ಥಳವನ್ನಾಗಿ ಪರಿವರ್ತಿಸುವ ಆಕಾಂಕ್ಷೆ ಇಂದಿನ ಯುವಪಡೆಯಲ್ಲಿದೆ. ಅವರಿಗೆ ಕಾರ್ಯವಿಧಾನಗಳನ್ನು ಬಲವಂತವಾಗಿ ಹೇರುವ ಬದಲು ಸೂಕ್ತ ಗುರಿಯನ್ನು ತೋರಿದರೆ, ಅವರು ಸಾರ್ವತ್ರಿಕ ನೈತಿಕತೆ ಮತ್ತು ಸಮೃದ್ಧಿಯನ್ನು ಅತ್ಯಂತ ವೇಗವಾಗಿ ಸಾಧಿಸಲಿದ್ದಾರೆ ಎಂದರು.