ಜಾಮೀನು ಪಡೆಯುವ ಸಲುವಾಗಿ ಸ್ಮಶಾನದಲ್ಲಿ ನ್ಯಾಯಾಧೀಶರ ಫೋಟೋ ಇಟ್ಟು ವಾಮಾಚಾರ ನಡೆಸಿರುವಂತಹ ಅಘಾತಕಾರಿ ಘಟನೆ ಒಂದು ಛತ್ತೀಸ್ಗಢದ ಬಿಲಾಸ್ಪುರ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ.
ಜೈಲಿನಲ್ಲಿದ್ದ ತಮ್ಮ ಸಂಬಂಧಿಕನಿಗೆ ಜಾಮೀನು ಸಿಗಲೆಂಬ ಒಂದೇ ಕಾರಣಕ್ಕಾಗಿ, ನಾಲ್ವರು ವ್ಯಕ್ತಿಗಳು ರುದ್ರಭೂಮಿಯಲ್ಲಿ ಛತ್ತೀಸ್ಗಢ ಹೈಕೋರ್ಟ್ ಮುಖ್ಯನ್ಯಾಯಮೂರ್ತಿಗಳು ಹಾಗೂ ಪ್ರಕರಣಕ್ಕೆ ಸಂಬಂಧಿಸಿದ ಇತರರ ಭಾವಚಿತ್ರಗಳನ್ನು ಇಟ್ಟು ತಾಂತ್ರಿಕ ಪೂಜೆ ನಡೆಸಿರುವ ಘಟನೆ ವರದಿಯಾಗಿದೆ.
ಘಟನೆಗೆ ಸಂಬಂಧಿಸಿದಂತೆ ಬಿಲಾಸ್ಪುರದ ಸಿಪತ್ ಪೊಲೀಸ್ ಠಾಣಾ ವ್ಯಾಪ್ತಿಯ ದೇವರಿ ಗ್ರಾಮದ ಮುಕ್ತಿಧಾಮದಲ್ಲಿ ಈ ಪೂಜೆ ನಡೆದಿದೆ. ರಾತ್ರಿ ವೇಳೆಯಲ್ಲಿ ಶ್ಮಶಾನದಲ್ಲಿ ಅನುಮಾನಾಸ್ಪದ ಚಟುವಟಿಕೆಗಳನ್ನು ಗಮನಿಸಿದ ಸ್ಥಳೀಯ ಗ್ರಾಮಸ್ಥರು ನಾಲ್ವರ ತಂಡವನ್ನು ತಡೆದು ವಿಚಾರಿಸಲು ಯತ್ನಿಸಿದ್ದಾರೆ. ಈ ವೇಳೆ ಮೂವರು ಸ್ಥಳದಿಂದ ಕಾಲ್ಕಿತ್ತಿದ್ದು, ಋಷಿಕೇಶ್ ಕುಮಾರ್ ಎಂಬಾತನನ್ನು ಗ್ರಾಮಸ್ಥರು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ.
ಪೂಜೆ ನಡೆದ ಸ್ಥಳವನ್ನು ಪರಿಶೀಲಿಸಿದ ಪೊಲೀಸರಿಗೆ ಹೈಕೋರ್ಟ್ ಮುಖ್ಯನ್ಯಾಯಮೂರ್ತಿ ರಮೇಶ್ ಸಿನ್ಹಾ ಹಾಗೂ ಇಬ್ಬರು ವ್ಯಕ್ತಿಗಳ ಫೋಟೊಗಳು, ಸತ್ತ ಮೀನು, ನಿಂಬೆಹಣ್ಣು, ಕುಂಕುಮ, ತೆಂಗಿನಕಾಯಿ ಸೇರಿದಂತೆ ಹಲವು ಪೂಜಾ ಸಾಮಗ್ರಿಗಳು ಪತ್ತೆಯಾಗಿವೆ. ಪ್ರಾಥಮಿಕ ವಿಚಾರಣೆ ವೇಳೆ, ಆರೋಪಿಯ ಸಂಬಂಧಿ ಪ್ರಿಯಾಂಶು ಬೋಲೆ ಎಂಬಾತ ಚಾಕು ಇರಿತ ಪ್ರಕರಣದಲ್ಲಿ ಬಂಧಿತನಾಗಿದ್ದು, ಕೋರ್ಟ್ನಲ್ಲಿ ಆತನ ಜಾಮೀನು ಅರ್ಜಿ ಬಾಕಿ ಇತ್ತು. ಸೋಶಿಯಲ್ ಮೀಡಿಯಾದಲ್ಲಿ ತಾಂಡವಾಡುತ್ತಿದ್ದ ತಾಂತ್ರಿಕನೊಬ್ಬನ ವಿಡಿಯೋ ನೋಡಿ ಪ್ರಭಾವಿತರಾದ ಈ ಯುವಕರು, ರುದ್ರಭೂಮಿಯಲ್ಲಿ ಈ ರೀತಿ ಪೂಜೆ ಮಾಡಿದರೆ ಬೇಗ ಜಾಮೀನು ಸಿಗುತ್ತದೆ ಎಂದು ನಂಬಿ ಈ ಕೃತ್ಯವೆಸಗಿದ್ದಾರೆ ಎಂದು ವರದಿಯಾಗಿದೆ.
