ಬೆಂಗಳೂರು: ಬಾಲಕಿಯರ ನಾಪತ್ತೆ ಪ್ರಕರಣ – ಮತ್ತೊಬ್ಬಳು ಬಾಲಕಿಯೂ ಪತ್ತೆ!!

ಪಿಯುಸಿ ಓದುತ್ತಿದ್ದ ಇಬ್ಬರು ಯುವತಿಯರು ಬೆಂಗಳೂರಿನ ವಿದ್ಯಾರಣ್ಯಪುರದಮನೆಯಿಂದ ಕಾಲೇಜಿಗೆ ಅಂತಾ ಹೊರಟ್ಟಿದ್ದರು. ಹಾಗೇ ಹೋದವರು ಸಣ್ಣದೊಂದು ಸುಳಿವನ್ನೂ ಕೊಡದಂತೆ ನಾಪತ್ತೆಯಾಗಿದ್ದರು. ಎಲ್ಲೋದರು, ಏನಾದರು ಅನ್ನೋದೊಂದೂ ಗೊತ್ತಾಗಿರಲಿಲ್ಲ. ಆದರೆ ಎಂಟು ತಿಂಗಳ ಬಳಿಕ ಕೆಲ ದಿನಗಳ ಹಿಂದಷ್ಟೇ ಓರ್ವ ಬಾಲಕಿ ಗರ್ಭಿಣಿಯಾಗಿ ಪತ್ತೆಯಾಗಿದ್ದಳು. ಇದೀಗ ಮತ್ತೊಬ್ಬಳು ಬಾಲಕಿಯು ಕೂಡ ಪತ್ತೆಯಾಗಿದ್ದಾಳೆ ಎಂದು ಮೂಲಗಳು ತಿಳಿಸಿವೆ.

Sponsored

ಕಳೆದ ಎರಡು ದಿನಗಳ ಹಿಂದೆ ಸಿಐಡಿ ಅಧಿಕಾರಿಗಳು ನಾಪತ್ತೆಯಾಗಿದ್ದ ಓರ್ವ ಯುವತಿಯನ್ನು ಪತ್ತೆ ಹಚ್ಚಿ ಕೋರ್ಟ್​ ಮುಂದೆ ಹಾಜರುಪಡಿಸಿದ್ದರು. ಆದರೆ, ಈ ವೇಳೆ ಮತ್ತೋರ್ವ ಯುವತಿ ಸಿಕ್ಕಿರಲಿಲ್ಲ. ಇದೀಗ ಸಿಐಡಿ ಅಧಿಕಾರಿಗಳು ಕೊನೆಗೂ ಯುವತಿಯನ್ನ ಪತ್ತೆಹಚ್ಚಿದ್ದಾರೆ. ಈ ಮೂಲಕ ಸಿಐಡಿ ಅಧಿಕಾರಿಗಳು ಬರೋಬ್ಬರಿ ಎಂಟು ತಿಂಗಳ ಬಳಿಕ ಇಬ್ಬರು ಯುವತಿಯರನ್ನು ಪತ್ತೆ ಹಚ್ಚಿದ್ದಾರೆ.

ಆನೇಕಲ್ ಬಳಿಕ ಸೂರ್ಯಸಿಟಿ ಬಳಿ ಸಣ್ಣ ಶೆಡ್​ವೊಂದರಲ್ಲಿ ಯುವಕನ ಜೊತೆ ವಾಸವಿದ್ದ ಯುವತಿಯನ್ನು ಪತ್ತೆ ಹಚ್ಚಲಾಗಿದೆ. ಮನೆ ಬಿಟ್ಟು ಬಂದಿದ್ದ ಯುವತಿ 26 ವರ್ಷದ ವಿಜಯ್ ಎಂಬಾತನ ಜೊತೆ ವಿವಾಹವಾಗಿದ್ದಾಳೆ ಅನ್ನೋ ಮಾಹಿತಿ ಸಿಕ್ಕಿದೆ. ಸದ್ಯ, ಆಕೆಯನ್ನು ಸಿಐಡಿ ವಶಕ್ಕೆ ಪಡೆದಿದ್ದು, ಅಪ್ರಾಪ್ತೆಯನ್ನು ರಿಮ್ಯಾಂಡ್ ರೂಂಗೆ ಬಿಡಲಾಗಿದೆ.

ವಯಸ್ಸು 18 ಆಗಿದೆ ಅಂತ ಯುವತಿಯನ್ನ ಮದುವೆಯಾಗಿದ್ದಾಗಿ ಯುವಕ ವಿಜಯ್​ ಸಿಐಡಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದು, ಯಲಹಂಕ ನ್ಯೂ ಟೌನ್​ನಲ್ಲಿ ಪೋಕ್ಸೋ ಕೇಸ್ ದಾಖಲು ಮಾಡಿದ ಪೊಲೀಸರು ಯುವಕನನ್ನ ವಶಕ್ಕೆ ಪಡೆದಿದ್ದಾರೆ. ಸದ್ಯ ಸಿಐಡಿ ಅಧಿಕಾರಿಗಳು ಕುಟುಂಬಸ್ಥರನ್ನ ಕರೆಸಿ ಅವರ ಸುಪರ್ದಿಗೆ ನೀಡಲು ಸಿದ್ಧತೆ ನಡೆಸಿದ್ದಾರೆ. ಒಟ್ಟಾರೆ, ಬರೋಬ್ಬರಿ ಎಂಟು ತಿಂಗಳುಗಳ ಕಾಲ ನಾಪತ್ತೆಯಾಗಿದ್ದ ಇಬ್ಬರು ಪತ್ತೆಯಾಗಿದ್ದಾರೆ.