ಭಾರತದ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರವು (ಎಫ್‌ಎಸ್‌ಎಸ್‌ಎಐ) ಪಾನ್ ಮಸಾಲಾಕ್ಕಾಗಿ ಹೊಸ ಪ್ಯಾಕೇಜಿಂಗ್ ನಿಯಮಗಳನ್ನು ಜಾರಿಗೆ ತಂದಿದೆ. ಈ ನಿಯಮಗಳು ಉತ್ಪನ್ನದ ಪ್ಯಾಕೇಜಿಂಗ್‌ಗೆ ಬಳಸಬಹುದಾದ ಪ್ಲಾಸ್ಟಿಕ್-ರಹಿತ ವಸ್ತುಗಳನ್ನು ನಿರ್ದಿಷ್ಟಪಡಿಸಿದ್ದು, ಪ್ಲಾಸ್ಟಿಕ್, ಅಲ್ಯೂಮಿನಿಯಂ ಫಾಯಿಲ್ ಮತ್ತು ಲೋಹದ ಲೇಪಿತ ಪದರಗಳನ್ನು (ಮೆಟಲೈಸ್ಡ್ ಲೇಯರ್ಸ್) ಅನುಮೋದಿತ ಪ್ಯಾಕೇಜಿಂಗ್ ಆಯ್ಕೆಗಳಿಂದ ಹೊರಗಿಟ್ಟಿವೆ.
ಈ ಬದಲಾವಣೆಗಳನ್ನು ಸೋಮವಾರ (ಆಗಸ್ಟ್ 10) ಭಾರತದ ಗೆಜೆಟ್‌ನಲ್ಲಿ ಪ್ರಕಟವಾದ ‘ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ (ಪ್ಯಾಕೇಜಿಂಗ್) ತಿದ್ದುಪಡಿ ನಿಯಮಾವಳಿಗಳು, 2026’ರ ಮೂಲಕ ಅಧಿಸೂಚಿಸಲಾಗಿದೆ.
ಕೇಂದ್ರ ಆರೋಗ್ಯ ಮತ್ತು ಕಲ್ಯಾಣ ಸಚಿವಾಲಯದ ವ್ಯಾಪ್ತಿಗೆ ಬರುವ FSSAI (ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ)ದ ಹೊಸ ನಿಬಂಧನೆಗಳ ಪ್ರಕಾರ, ಪಾನ್ ಮಸಾಲಾವನ್ನು ಕಾಗದ, ಪೇಪರ್‌ಬೋರ್ಡ್, ಸೆಲ್ಯುಲೋಸ್ ಅಥವಾ ನೈಸರ್ಗಿಕ ಮೂಲದ ಇತರ ವಸ್ತುಗಳಲ್ಲಿ ಪ್ಯಾಕ್ ಮಾಡಬಹುದು. ಆದರೆ ಈ ವಸ್ತುಗಳು ಸಂಪೂರ್ಣವಾಗಿ ಪ್ಲಾಸ್ಟಿಕ್ ಮುಕ್ತವಾಗಿರಬೇಕು. ಪ್ಯಾಕೇಜಿಂಗ್‌ನಲ್ಲಿ ಪಾಲಿಥಿಲೀನ್, ಪಾಲಿಪ್ರೊಪಿಲೀನ್, ಪಾಲಿಯೆಸ್ಟರ್, ಪಾಲಿವಿನೈಲ್ ಕ್ಲೋರೈಡ್ ಅಥವಾ ಯಾವುದೇ ಇತರ ಸಂಶ್ಲೇಷಿತ ಪಾಲಿಮರ್‌ಗಳು, ಕೋ-ಪಾಲಿಮರ್‌ಗಳು ಅಥವಾ ಲ್ಯಾಮಿನೇಟ್‌ಗಳು ಇರಬಾರದು ಎಂದು ಅಧಿಸೂಚನೆಯು ನಿರ್ದಿಷ್ಟವಾಗಿ ತಿಳಿಸುತ್ತದೆ.
ಪಾನ್ ಮಸಾಲಾಕ್ಕಾಗಿ ಟಿನ್ ಅಥವಾ ಗಾಜಿನ ಪಾತ್ರೆಗಳನ್ನು ಬಳಸಲು ತಯಾರಕರಿಗೆ FSSAI ಅನುಮತಿ ನೀಡಿದೆ. ಹೊಸ ನಿಯಮದ ಅಡಿಯಲ್ಲಿ ಇವುಗಳನ್ನು ಪ್ರತ್ಯೇಕವಾಗಿ ಅನುಮತಿಸಲಾದ ಪ್ಯಾಕೇಜಿಂಗ್ ಆಯ್ಕೆಗಳೆಂದು ಪಟ್ಟಿ ಮಾಡಲಾಗಿದೆ. ಸಾರ್ವಜನಿಕರಿಂದ ಸ್ವೀಕರಿಸಲಾದ ಆಕ್ಷೇಪಣೆಗಳು ಮತ್ತು ಸಲಹೆಗಳನ್ನು ಪರಿಗಣಿಸಿದ ನಂತರವೇ ಅಂತಿಮ ತಿದ್ದುಪಡಿಯನ್ನು ಹೊರಡಿಸಲಾಗಿದೆ ಎಂದು FSSAI ತಿಳಿಸಿದೆ. ‘ಪಾನ್ ಮಸಾಲಾ’ದ ಮೇಲೆ ನಿಷೇಧವನ್ನು ಹೇರುವುದಿಲ್ಲ. ಬದಲಾಗಿ, ಇದು ಪ್ಯಾಕೇಜಿಂಗ್‌ಗೆ ಸಂಬಂಧಿಸಿದ ಪಟ್ಟಿಗೆ ಪಾನ್ ಮಸಾಲಾವನ್ನು ಸೇರಿಸುತ್ತದೆ ಮತ್ತು ಪ್ಯಾಕೇಜಿಂಗ್‌ಗೆ ಬಳಸಬಹುದಾದ ಸಾಮಗ್ರಿಗಳನ್ನು ನಿರ್ದಿಷ್ಟಪಡಿಸುತ್ತದೆ.
