Bharat Taxi : ‘ಭಾರತ್ ಟ್ಯಾಕ್ಸಿ’ ಲಾಂಚ್ ಮಾಡಿದ ಅಮಿತ್ ಶಾ- ಇನ್ಮುಂದೆ ಚಾಲಕನೇ ಮಾಲೀಕ

Bharat Taxi : ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಕೇಂದ್ರ ಸರ್ಕಾರ ಪ್ರಾರಂಭಿಸಿರುವ “ಭಾರತ್ ಟ್ಯಾಕ್ಸಿ” ಸಹಕಾರಿ ಟ್ಯಾಕ್ಸಿ ಸೇವೆಗೆ ಕೇಂದ್ರ ಗೃಹ ಹಾಗೂ ಸಹಕಾರಿ ಸಚಿವ ಅಮಿತ್​ ಶಾ ಚಾಲನೆ ನೀಡಿದ್ದಾರೆ. ಈ ಮೂಲಕ ಇನ್ನು ಚಾಲಕನೇ ಮಾಲೀಕನಾಗಲಿದ್ದಾನೆ ಎಂದು ಅವರು ಘೋಷಣೆ ಮಾಡಿದ್ದಾರೆ.

Sponsored

ಹೌದು, ದೇಶದಲ್ಲಿ ಟ್ಯಾಕ್ಸಿ (Taxi) ಸೇವೆಯನ್ನ ಸುಲಭಗೊಳಿಸುವುದರೊಂದಿಗೆ ಪ್ರಯಾಣಿಕನಿಗೂ ಹಾಗೂ ಟ್ಯಾಕ್ಸಿ ಚಾಲಕನಿಗೂ ಅನುವುಮಾಡಿಕೊಡಲು ಕೇಂದ್ರ ಸರ್ಕಾರ ಪ್ರಾರಂಭಿಸಿರುವ “ಭಾರತ್ ಟ್ಯಾಕ್ಸಿ” (Bharat Taxi) ಸಹಕಾರಿ ಟ್ಯಾಕ್ಸಿ ಸೇವೆಗೆ ಕೇಂದ್ರ ಗೃಹ ಹಾಗೂ ಸಹಕಾರಿ ಸಚಿವ ಅಮಿತ್​ ಶಾ ಉದ್ಘಾಟಿಸಿದ್ದಾರೆ. ಬಳಿಕ ಮಾತನಾಡಿದ ಅವರು ಇಲ್ಲಿ ಚಾಲಕರನ್ನು ಸಾರಥಿಗಳು ಎಂದು ಕರೆಯಲಾಗುತ್ತಿದ್ದು, ಅವರಿಗೆ ಮಾಲೀಕತ್ವ, ಕಾರ್ಯಾಚರಣೆ ಹಾಗೂ ಆದಾಯ ಸೃಷ್ಟಿಗೆ ಪ್ರಮುಖ ಸ್ಥಾನ ನೀಡಲಾಗಿದೆ ಎಂದು ತಿಳಿಸಿದರು.

ಏನಿದು ಭಾರತ್​ ಟ್ಯಾಕ್ಸಿ?

ಭಾರತ್ ಟ್ಯಾಕ್ಸಿ ಅಂದರೆ ಕೇಂದ್ರ ಸರ್ಕಾರವು ಸಹಕಾರ ಮಾದರಿಯಲ್ಲಿ ಆರಂಭಿಸಿರುವ ಹೊಸ ಕ್ಯಾಬ್ ಸೇವೆಯಾಗಿದೆ. ಇದು ಉಬರ್, ಓಲಾ ರೀತಿಯ ಖಾಸಗಿ ಕಂಪನಿಗಳಂತೆ ಕಾರ್ಯನಿರ್ವಹಿಸಿದರೂ, ಮೂಲಭೂತವಾಗಿ ವಿಭಿನ್ನವಾದ ಮಾದರಿಯನ್ನು ಹೊಂದಿದೆ. ಯಾಕಂದರೆ, ಇಲ್ಲಿ ಚಾಲಕರೇ ಮಾಲೀಕರಾಗಿದ್ದು, ಕಂಪನಿ ಮಧ್ಯವರ್ತಿಯಾಗಿ ದೊಡ್ಡ ಕಮಿಷನ್ ವಸೂಲಿ ಮಾಡುವ ವ್ಯವಸ್ಥೆ ಇಲ್ಲ.

ಈಗಾಗಲೇ ದೇಶದಲ್ಲಿ ಉಬರ್, ಓಲಾ ಮತ್ತು ರ್ಯಾಪಿಡೋ ಪ್ರಮುಖ ಕ್ಯಾಬ್ ಸೇವೆಗಳಾಗಿದ್ದು, ಇವು ಚಾಲಕರಿಂದ ಕಮಿಷನ್ ವಸೂಲಿ ಮಾಡುತ್ತಿವೆ. ಚಾಲಕರ ಪರಿಶ್ರಮವನ್ನು ಕಂಪನಿಗಳು ದುರುಪಯೋಗಪಡಿಸಿಕೊಳ್ಳುತ್ತಿವೆ ಎಂಬ ಆರೋಪಗಳು ಮರುಮರು ಕೇಳಿಬಂದ ಹಿನ್ನೆಲೆ, ಕೇಂದ್ರ ಸರ್ಕಾರ ಕಳೆದ ವರ್ಷದ ಜೂನ್ 5ರಂದು ಬಹುರಾಜ್ಯ ಸಹಕಾರ ಸಂಘಗಳ ಕಾಯ್ದೆಯಡಿ ‘ಭಾರತ್ ಟ್ಯಾಕ್ಸಿ’ ಯೋಜನೆಯನ್ನು ರೂಪಿಸಿದೆ.

ಇನ್ನೂ ಭಾರತ್ ಟ್ಯಾಕ್ಸಿ, ತನ್ನ ಪ್ಲಾಟ್‌ಫಾರ್ಮ್‌ಯಲ್ಲಿನ ದರಗಳು ಮಾರುಕಟ್ಟೆ ದರಕ್ಕಿಂತಲೂ 30% ವರೆಗೆ ಕಡಿಮೆ ಇರಲಿದೆ ಎನ್ನಲಾಗಿದ್ದು, ಈ ಅಪ್ಲಿಕೇಶನ್ ಯಾವುದೇ ಸರ್ಜ್ ಬೆಲೆ ನಿಗದಿಯನ್ನು ಹೊಂದಿಲ್ಲ. ಭಾರತ್ ಟ್ಯಾಕ್ಸಿಯಲ್ಲಿ, ಪ್ರಯಾಣಿಕರು ಪೂರ್ವನಿರ್ಧರಿತ, ಪಾರದರ್ಶಕ ದರವನ್ನು ಮಾತ್ರವೇ ಪಾವತಿಸುತ್ತಾರೆ. ಜೊತೆಗೆ ಪ್ರಯಾಣಿಕರು ಇಲ್ಲಿಯೂ ಸಹ ಬೈಕ್, ಆಟೋ ಮತ್ತು ಕಾರಿನ ಆಯ್ಕೆಯಿಂದ ತಮ್ಮ ಆದ್ಯತೆಯ ಪ್ರಯಾಣ ವಿಧಾನವನ್ನು ಆಯ್ಕೆ ಮಾಡಬಹುದಾಗಿದೆ.

ಇದುವರೆಗೆ ಮೂರು ಲಕ್ಷಕ್ಕೂ ಹೆಚ್ಚು ಚಾಲಕರು ಭಾರತ್ ಟ್ಯಾಕ್ಸಿ ವೇದಿಕೆಗೆ ಸೇರಿದ್ದಾರೆ. ಸುಮಾರು ಒಂದು ಲಕ್ಷ ಬಳಕೆದಾರರು ಈಗಾಗಲೇ ನೋಂದಾಯಿಸಿದ್ದು, ದಿನಕ್ಕೆ ಸರಾಸರಿ 10 ಸಾವಿರಕ್ಕೂ ಹೆಚ್ಚು ಸವಾರಿಗಳು ನಡೆಯುತ್ತಿವೆ. ಚಾಲಕರು ಇದುವರೆಗೆ ಸುಮಾರು 10 ಕೋಟಿ ರೂಪಾಯಿ ಲಾಭ ಪಡೆದಿದ್ದಾರೆ ಎಂದು ಕೇಂದ್ರ ಸಹಕಾರಿ ಸಚಿವಾಲಯ ಮಾಹಿತಿ ನೀಡಿದೆ.

ಭಾರತ್‌ ಟ್ಯಾಕ್ಸಿ ಅಡಿಯಲ್ಲಿ ಮಹಿಳೆಯರ ಸಬಲೀಕರಣಕ್ಕೆ ಒತ್ತು ನೀಡಲು ‘ಬೈಕ್‌ ದೀದೀ’ ಎಂಬ ಯೋಜನೆ ಜಾರಿಗೆ ತರಲಾಗಿದ್ದು, 150 ಮಹಿಳಾ ಚಾಲಕಿಯರು ಇದನ್ನು ಸೇರಿಕೊಂಡಿದ್ದಾರೆ.