ತಾವಿರುವ ಜಾಗಗಳಲ್ಲಿಯೇ ಮೋಜು, ಮಸ್ತಿ ಮಾಡುವುದು ಸಾಲದೆಂದು ಇದೀಗ ಜನರ ಗುಂಪೊಂದು ಪೊಲೀಸರ ಕಣ್ಣುತಪ್ಪಿಸಿ ಕಾಡಲ್ಲಿ ಮಜಾ ಮಾಡಲು ತೆರಳಿ, ಡ್ರೋನ್ ಕ್ಯಾಮರಾಗೆ ಸೆರೆ ಸಿಕ್ಕ ಘಟನೆ ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯಲ್ಲಿ ನಡೆದಿದೆ. ಇದೀಗ ಈ ಗ್ಯಾಂಗ್ ನಲ್ಲಿದ್ದ 19 ಮಂದಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಹೌದು, ಭದ್ರಾವತಿ ತಾಲೂಕಿನ ಅರಣ್ಯ ಪ್ರದೇಶಗಳಲ್ಲಿ ನಡೆಯುತ್ತಿದ್ದ ಇಸ್ಪೀಟು, ಒಸಿ ಸೇರಿ ವಿವಿಧ ಅಕ್ರಮ ಚಟುವಟಿಕೆಗಳು ನಡೆಯುತ್ತಿರುವ ಬಗ್ಗೆ ದೂರುಗಳು ಕೇಳಿಬಂದಿದ್ದವು. ಹೀಗಾಗಿ ಈ ದಂಧೆಗೆ ಬ್ರೇಕ್ ಹಾಕಲು ಜಿಲ್ಲಾ ಪೊಲೀಸ್ ಇಲಾಖೆ ವಿನೂತನ ಕಾರ್ಯಾಚರಣೆ ನಡೆಸಿ, ಡ್ರೋನ್ ಬಳಸಿ ಆರೋಪಿಗಳ ಮಾಹಿತಿ ಕಲೆ ಹಾಕಿ 19 ಮಂದಿಯನ್ನು ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಅರಣ್ಯ ಮಧ್ಯಭಾಗದಲ್ಲಿ ಈ ರೀತಿಯಾದಂದೆಗಳು ಯಥೇಚ್ಛವಾಗಿ ನಡೆಯುತ್ತಿದ್ದವು. ದೂರುಗಳು ಬಂದಾಗ ಪೊಲೀಸರು ಸ್ಥಳಗಳಿಗೆ ಎಂಟ್ರಿ ಕೊಡುವ ಮೊದಲೇ ವಿಚಾರ ತಿಳಿದು ಕದೀಮರು ಅಲ್ಲಿಂದ ಕಾಲು ಕೀಳುತ್ತಿದ್ದರು. ಆದರೆ ಹೊಸ ಪ್ಲಾನ್ ಮಾಡಿದ ಪೊಲೀಸರು ಡ್ರೋನ್ ಬಳಸಿ, ಆರೋಪಿಗಳ ಚಲನವಲನವನ್ನು ಪರಿಶೀಲಿಸಿದ್ದರು. ಈ ಮಾಹಿತಿ ಆಧಾರದ ಮೇಲೆ ಭದ್ರಾವತಿ ಗ್ರಾಮೀಣ ಠಾಣೆ ಪೋಲೀಸರು ತಕ್ಷಣ ದಾಳಿ ನಡೆಸಿ 19 ಮಂದಿಯನ್ನು ವಶಕ್ಕೆ ಪಡೆದಿದ್ದಾರೆ.