ಮಹಿಳೆಯರು ಈ ಅಂಗಡಿಗೆ ಬರಬೇಡಿ-ಅಂಗಡಿ ಮಾಲೀಕನ ಹೊಸ ಬೋರ್ಡ್‌

ಈ ಮನವಿಗೆ ಕಾರಣವೇನು?

Sponsored

​ಉತ್ತರ ಪ್ರದೇಶದ ಪ್ರಯಾಗರಾಜ್ ನಗರದ ರಾಜಾಪುರ ಪ್ರದೇಶದಲ್ಲಿ ಕಿರಾಣಿ ಅಂಗಡಿಯೊಂದರ ಹೊರಗೆ ಹಾಕಲಾಗಿರುವ ವಿವಾದಾತ್ಮಕ ಮತ್ತು ಅಸಾಮಾನ್ಯ ಬೋರ್ಡ್‌ ಒಂದು ಪ್ರಸ್ತುತ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಅಂಗಡಿ ಮಾಲೀಕರು ಮಹಿಳೆಯರ ಪ್ರವೇಶವನ್ನು ನಿರ್ಬಂಧಿಸಿ ಹೊರಗೆ ಫಲಕ ಹಾಕಿದ್ದಾರೆ. ರಾಜಾಪುರ ಪ್ರದೇಶದಲ್ಲಿ ಕಿರಾಣಿ ಅಂಗಡಿ ನಡೆಸುತ್ತಿರುವ ಘನಶ್ಯಾಮ್ ಬಾಬಾ ಎಂಬುವವರು ತಮ್ಮ ಅಂಗಡಿಯ ಮುಂಭಾಗದಲ್ಲಿ ಒಂದು ಬೋರ್ಡ್ ಹಾಕಿದ್ದಾರೆ. ಅದರ ಮೇಲೆ ಹೀಗೆ ಬರೆಯಲಾಗಿದೆ: “ಈ ಅಂಗಡಿಗೆ ಮತ್ತು ಮಳಿಗೆಗೆ ಮಹಿಳೆಯರ ಪ್ರವೇಶ ನಿಷೇಧಿಸಲಾಗಿದೆ. ದಯವಿಟ್ಟು ಈ ಅಂಗಡಿಗೆ ಕಡಿಮೆ ಗ್ರಾಹಕರನ್ನು ಕಳುಹಿಸು”.

​ಸಾಮಾನ್ಯವಾಗಿ ಯಾವುದೇ ವ್ಯಾಪಾರಿಯೂ ತನ್ನ ಅಂಗಡಿಗೆ ಗ್ರಾಹಕರು ಬರಲಿ ಎಂದು ಬಯಸುತ್ತಾನೆಯೇ ಹೊರತು ಯಾರೂ ಬರದಂತೆ ಶಾಪ ಹಾಕುವುದಿಲ್ಲ. ಆದರೆ ಈ ಕಿರಾಣಿ ಅಂಗಡಿಯ ಮಾಲೀಕರು ದೇವರು ತನ್ನ ಅಂಗಡಿಗೆ ಯಾರೂ ಗ್ರಾಹಕರೇ ಬೇಡ ಎಂದು ಪ್ರಾರ್ಥಿಸುವಂತೆ ಬರೆಸಿರುವುದು ಎಲ್ಲರಿಗೂ ಅಚ್ಚರಿ ಮೂಡಿಸಿದೆ.

​ಮಹಿಳೆಯರ ಪ್ರವೇಶ ನಿಷೇಧಿಸಲು ಮತ್ತು ಇಂತಹ ಬೋರ್ಡ್ ಹಾಕಲು ಅಸಲಿ ಕಾರಣವೇನು?
​ಈ ವಿಚಿತ್ರ ನಿರ್ಧಾರದ ಹಿಂದೆ ಘನಶ್ಯಾಮ್ ಬಾಬಾ ಅವರ ಅಳಲು ಮತ್ತು ಸ್ಥಳೀಯ ಗಂಭೀರ ಸಮಸ್ಯೆಯೊಂದಿದೆ: ಅಂಗಡಿಯ ಸುತ್ತಮುತ್ತ ಕೆಲವರು ಮದ್ಯಪಾನ ಮಾಡಿ ನಿತ್ಯವೂ ಗಲಾಟೆ ಮತ್ತು ಅಕ್ರಮ ಚಟುವಟಿಕೆಗಳಲ್ಲಿ ತೊಡಗುತ್ತಿದ್ದರು. ಅಂಗಡಿಯ ಹತ್ತಿರವೇ ಕೆಲವು ಕಿಡಿಗೇಡಿಗಳು ಬಂದು ಹೋಗುವ ಮಹಿಳೆಯರೊಂದಿಗೆ ಅಸಭ್ಯವಾಗಿ ವರ್ತಿಸುವುದು ಮತ್ತು ದಾರಿಹೋಕರಿಗೆ ಕಿರಿಕಿರಿ ಉಂಟುಮಾಡುವುದು ನಿತ್ಯದ ಕತೆಯಾಗಿತ್ತು.

​ವ್ಯಾಪಾರಕ್ಕೆ ಹೊಡೆತ ಮತ್ತು ಮಾನಸಿಕ ನೆಮ್ಮದಿ ಕೊರತೆ: ಈ ನಿರಂತರ ಗದ್ದಲ ಹಾಗೂ ಗೂಂಡಾಗಿರಿಯಿಂದ ರೋಸಿಹೋಗಿದ್ದ ಅಂಗಡಿ ಮಾಲೀಕ ಘನಶ್ಯಾಮ್ ಬಾಬಾ, ಮಹಿಳೆಯರು ತಮ್ಮ ದೈನಂದಿನ ಸಾಮಗ್ರಿಗಳನ್ನು ಖರೀದಿಸಲು ಬರುವಾಗ ಇಲ್ಲಿಗೆ ಬಂದು ತೊಂದರೆಗೆ ಸಿಲುಕಬಾರದು ಹಾಗೂ ಅನಗತ್ಯ ಗಲಾಟೆಗಳಿಂದ ದೂರವಿರಬೇಕು ಎಂಬ ಉದ್ದೇಶದಿಂದ ಈ ಕಠಿಣ ನಿರ್ಧಾರ ಕೈಗೊಂಡಿದ್ದಾರೆ.

​ಈ ವಿಚಿತ್ರ ಬೋರ್ಡ್‌ನ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಸಾರ್ವಜನಿಕ ವಲಯದಲ್ಲಿ ಪರ-ವಿರೋಧ ಚರ್ಚೆಗಳು ಆರಂಭವಾಗಿವೆ: ಳೀಯ ಪರಿಸ್ಥಿತಿಯನ್ನು ಅರಿತಿರುವ ಕೆಲವರು, ಅಂಗಡಿ ಮಾಲೀಕರ ಅಸಹಾಯಕತೆಯನ್ನು ಅರ್ಥೈಸಿಕೊಳ್ಳುತ್ತಿದ್ದಾರೆ. ಮಹಿಳೆಯರ ಸುರಕ್ಷತೆಯ ಬಗ್ಗೆ ಕಾಳಜಿ ವಹಿಸಿ ಮತ್ತು ಪ್ರತಿದಿನದ ಗಲಾಟೆಯಿಂದ ಬೇಸತ್ತು ಅವರು ಈ ಕ್ರಮ ಕೈಗೊಂಡಿದ್ದಾರೆ ಎಂದು ಸಮರ್ಥಿಸಿಕೊಳ್ಳುತ್ತಿದ್ದಾರೆ.
​
ಮತ್ತೊಂದು ಕಡೆ, ಬಹುತೇಕರು ಈ ನಿರ್ಧಾರವನ್ನು ತೀವ್ರವಾಗಿ ಖಂಡಿಸುತ್ತಿದ್ದಾರೆ. “ಅಪರಾಧಿಗಳು ಅಥವಾ ಕುಡುಕರು ತಪ್ಪು ಮಾಡಿದರೆ, ಅದಕ್ಕೆ ಮಹಿಳೆಯರನ್ನು ಅಂಗಡಿಗೆ ಬಾರದಂತೆ ತಡೆಯುವುದು ಹೇಗೆ ಪರಿಹಾರವಾಗುತ್ತದೆ?” ಎಂದು ಪ್ರಶ್ನಿಸುತ್ತಿದ್ದಾರೆ. ಮಹಿಳೆಯರನ್ನು ನಿರ್ಬಂಧಿಸುವ ಬದಲು, ಸಾರ್ವಜನಿಕ ಸ್ಥಳದಲ್ಲಿ ಪುಂಡಾಟಿಕೆ ನಡೆಸುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕಾದದ್ದು ಪೊಲೀಸರ ಮತ್ತು ಆಡಳಿತದ ಕರ್ತವ್ಯ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.