Central Govt : ಭಾರತದಲ್ಲಿ ಇನ್ಮುಂದೆ ಪೆಟ್ರೋಲ್ ಜೊತೆಗೆ ಆಲ್ಕೋಹಾಲ್ ಮೂಲಕ ವಾಹನಗಳ ಓಡಾಟ?! ಹೊಸ ಇಂಧನ ಬಳಕೆಗೆ ಕೇಂದ್ರ ಸಿದ್ಧತೆ!!

Central Govt : ಕೊಲ್ಲಿ ರಾಷ್ಟ್ರಗಳಲ್ಲಿ ಉಂಟಾಗಿರುವ ಯುದ್ಧದ ವಾತಾವರಣದಿಂದಾಗಿ ಪ್ರಪಂಚದಾದ್ಯಂತ ಅನಿಲ ಮತ್ತು ತೈಲದ ಪೂರೈಕೆಯಲ್ಲಿ ವ್ಯತ್ಯಯ. ಕೆಲವು ದೇಶಗಳಲ್ಲಂತೂ ಇಂಧನ ದರ ಗಗನಕ್ಕೇರಿದೆ. ಭಾರತದಲ್ಲಿ ಯಥಾ ಸ್ಥಿತಿ ಕಾಯ್ದುಕೊಂಡರು ಕೂಡ ಭವಿಷ್ಯದಲ್ಲಿ ಇಂಧನದ ಕೊರತೆ ಉಂಟಾಗುವ ಆತಂಕ ಎದುರಾಗಿರುವುದಂತೂ ಸತ್ಯ. ಹೀಗಾಗಿ ಕೇಂದ್ರ ಸರ್ಕಾರವು ಪೆಟ್ರೋಲ್ ಬದಲಿಗೆ ಹೊಸ ಇಂಧನ ಬೆಳಕಿಗೆ ಸಿದ್ಧತೆ ನಡೆಸಿದೆ ಎನ್ನಲಾಗಿದೆ.

Sponsored

ಹೌದು, ಭಾರತದ ರಸ್ತೆಗಳಲ್ಲಿ ಇನ್ನು ಮುಂದೆ ಕಾರುಗಳು ಪೆಟ್ರೋಲ್‌ನಿಂದ (Petrol) ಮಾತ್ರವಲ್ಲದೆ, ಕಬ್ಬು ಮತ್ತು ಧಾನ್ಯಗಳಿಂದ ತಯಾರಿಸಿದ ಆಲ್ಕೋಹಾಲ್ (Ethanol) ಮೂಲಕವೂ ಓಡಲಿವೆ. ಪ್ರಸ್ತುತ ಬಳಕೆಯಲ್ಲಿರುವ ಶೇಕಡಾ 20ರಷ್ಟು ಎಥನಾಲ್ ಮಿಶ್ರಿತ ಪೆಟ್ರೋಲ್ (E20) ಬೆನ್ನಲ್ಲೇ, ಈಗ ಶೇಕಡಾ 85ರಷ್ಟು ಎಥನಾಲ್ ಹೊಂದಿರುವ E85 ಇಂಧನವನ್ನು ಜಾರಿಗೆ ತರಲು ಕೇಂದ್ರ ಸರ್ಕಾರ ಅಂತಿಮ ಸಿದ್ಧತೆ ನಡೆಸಿದೆ.

ಭಾರತವು ತನ್ನ ತೈಲ ಅಗತ್ಯತೆಯ ಶೇಕಡಾ 90ರಷ್ಟನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತಿದೆ. ಎಥನಾಲ್ ಸಂಪೂರ್ಣವಾಗಿ ನಮ್ಮ ದೇಶದಲ್ಲೇ ಉತ್ಪಾದನೆಯಾಗುವ ನವೀಕರಿಸಬಹುದಾದ ಇಂಧನವಾಗಿದ್ದು, ಇದು ಪೆಟ್ರೋಲ್‌ಗಿಂತಲೂ ಕಡಿಮೆ ಮಾಲಿನ್ಯಕಾರಿಯಾಗಿದೆ. ಈಗಾಗಲೇ ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರು ಶೇಕಡಾ 100ರಷ್ಟು ಎಥನಾಲ್‌ನಿಂದ ಓಡುವ ಕಾರನ್ನು ಪ್ರದರ್ಶಿಸಿ ದೇಶದ ಗಮನ ಸೆಳೆದಿದ್ದರು. ಆದರೆ ಇದೀಗ ಇದನ್ನು ಜಾರಿಗೊಳಿಸಲು ಸರ್ಕಾರ ಸಿದ್ಧತೆ ನಡೆಸಿದ್ದು, ಈ ಕುರಿತಾದ ಕರಡು ನಿಯಮಗಳು ಶೀಘ್ರದಲ್ಲೇ ಪ್ರಕಟವಾಗಲಿವೆ ಎಂದು ತಿಳಿದುಬಂದಿದೆ.

ರೈತರಿಗೆ ವರದಾನವಾಗಲಿರುವ ಯೋಜನೆ

ಭಾರತದಲ್ಲಿ ಎಥನಾಲ್ ಉತ್ಪಾದನೆ ಈಗ ಹೆಚ್ಚುವರಿಯಾಗಿದ್ದು, ಇದು ಸಾರಿಗೆಗೆ ಮಾತ್ರವಲ್ಲದೆ ವಿಮಾನಗಳ ಇಂಧನದಲ್ಲೂ ಮಿಶ್ರಣ ಮಾಡಲು ಬಳಕೆಯಾಗಲಿದೆ. ಈ ಯೋಜನೆಯಿಂದಾಗಿ ಕಬ್ಬು, ಮೆಕ್ಕೆಜೋಳ ಮತ್ತು ಇತರೆ ಧಾನ್ಯಗಳನ್ನು ಬೆಳೆಯುವ ರೈತರಿಗೆ ಹೆಚ್ಚಿನ ಆದಾಯ ಸಿಗಲಿದೆ. 2016 ರಿಂದಲೇ ಈ ಬಗ್ಗೆ ಚಿಂತನೆ ನಡೆಸಿದ್ದ ಸರ್ಕಾರ, 2026ರ ಏಪ್ರಿಲ್ 1 ರಿಂದ ದೇಶಾದ್ಯಂತ E20 ಪೆಟ್ರೋಲ್ ಮಾರಾಟವನ್ನು ಕಡ್ಡಾಯಗೊಳಿಸಿದೆ. ಈಗ E85 ಜಾರಿಗೆ ತರುವ ಮೂಲಕ ಪೆಟ್ರೋಲ್ ಅವಲಂಬನೆಯನ್ನು ಮತ್ತಷ್ಟು ಕಡಿಮೆ ಮಾಡಲು ಸರ್ಕಾರ ಮುಂದಾಗಿದೆ.

ಹೊಸ ಇಂಜಿನ್‌ಗಳ ಅನಿವಾರ್ಯತೆ

E85 ಇಂಧನವು ಈಗಿನ ಸಾಮಾನ್ಯ ಪೆಟ್ರೋಲ್ ಇಂಜಿನ್‌ಗಳಿಗೆ ಸರಿಹೊಂದುವುದಿಲ್ಲ. ಇಷ್ಟು ಹೆಚ್ಚಿನ ಪ್ರಮಾಣದ ಆಲ್ಕೋಹಾಲ್ ಬಳಕೆಯಿಂದ ಹಳೆಯ ಇಂಜಿನ್‌ಗಳ ಭಾಗಗಳು ತುಕ್ಕು ಹಿಡಿಯುವ ಅಥವಾ ಹಾನಿಯಾಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ, ವಾಹನ ತಯಾರಕ ಕಂಪನಿಗಳು ಫ್ಲೆಕ್ಸ್ ಫ್ಯೂಯಲ್ ವೆಹಿಕಲ್ಸ್ (FFVs) ಎಂಬ ಹೊಸ ತಂತ್ರಜ್ಞಾನದ ಇಂಜಿನ್‌ಗಳನ್ನು ತಯಾರಿಸಬೇಕಾಗುತ್ತದೆ. ಈ ಹೊಸ ಇಂಜಿನ್‌ಗಳು ಪೆಟ್ರೋಲ್ ಮತ್ತು ಎಥನಾಲ್ ಎರಡರಲ್ಲೂ ಸುಗಮವಾಗಿ ಚಲಿಸಬಲ್ಲವು. ಪೆಟ್ರೋಲ್ ಬಂಕುಗಳಲ್ಲಿಯೂ E85 ಇಂಧನಕ್ಕಾಗಿ ಪ್ರತ್ಯೇಕ ವ್ಯವಸ್ಥೆಯನ್ನು ಕಲ್ಪಿಸಬೇಕಾಗುತ್ತದೆ.