ಪ್ರಿಯಕರನ ಮೋಹಕ್ಕೆ ಬಿದ್ದ ಐದು ಮಕ್ಕಳ ತಾಯಿ | ಪ್ರೇಮಿ ಜೊತೆನೇ ಮದುವೆ ಮಾಡಿಸಿದ ಗಂಡ

ಗಂಡನೋರ್ವ ತನ್ನ ಪತ್ನಿಯ ವಿವಾಹವನ್ನು ಆಕೆಯ ಪ್ರಿಯಕರನೊಂದಿಗೆ ಶಿವನ ದೇವಾಲಯವೊಂದರಲ್ಲಿ ನೆರವೇರಿಸಿದ ಘಟನೆ ನಡೆದಿದೆ. ಈ ಘಟನೆಯು ಉತ್ತರ ಪ್ರದೇಶದ ಸಂತ ಕಬೀರ್ ನಗರ ಜಿಲ್ಲೆಯಲ್ಲಿ ನಡೆದಿದೆ.

Sponsored

ಕುಟುಂಬ ಸದಸ್ಯರು ಮತ್ತು ಗ್ರಾಮದ ಮುಖ್ಯಸ್ಥರ ಪ್ರಕಾರ, ಡೆಬ್ರಿ ಗ್ರಾಮದ ಬುದ್ಧಿರಾಮ್ ನಿಷಾದ್ (45) ಮತ್ತು ಫೂಲ್ಮತಿ (37) ಸುಮಾರು 21 ವರ್ಷಗಳ ಹಿಂದೆ ಪ್ರೇಮ ವಿವಾಹವಾಗಿದ್ದರು. ಈ ದಂಪತಿಗೆ 18 ವರ್ಷದ ಮಗನೂ ಸೇರಿದಂತೆ ಐವರು ಮಕ್ಕಳಿದ್ದರು. ಕೆಲವು ತಿಂಗಳ ಹಿಂದೆ, ಫೂಲ್ಮತಿ 26 ವರ್ಷದ ಅವಧೇಶ್ ಎಂಬಾತನ ಪ್ರೀತಿಯಲ್ಲಿ ಬಿದ್ದಿದ್ದು, ಇದರಿಂದಾಗಿ ದಾಂಪತ್ಯದಲ್ಲಿ ಬಿರುಕು ಮೂಡಿತು.

ಫೂಲ್ಮತಿ ಸುಮಾರು ಎರಡು ತಿಂಗಳ ಹಿಂದೆ ಅವಧೇಶ್‌ನೊಂದಿಗೆ ಮನೆಯಿಂದ ಹೊರಹೋಗಿದದ್ದು, ನಂತರ ಕುಟುಂಬ ಸದಸ್ಯರ ಮನವೊಲಿಕೆಯ ನಂತರ ಹಿಂತಿರುಗಿದರು. ಆದರೂ, ಮನೆಯಲ್ಲಿ ಅಸಮಾಧಾನ ಮುಂದುವರಿಯಿತು. ಆಗ ಬುದ್ಧಿರಾಮ್ ತನ್ನ ಪತ್ನಿಯ ವಿವಾಹವನ್ನು ಅವಧೇಶ್‌ನೊಂದಿಗೆ ಏರ್ಪಡಿಸಲು ನಿರ್ಧರಿಸಿದರು. ಮಂಗಳವಾರ ಅಶ್ರಫ್‌ಪುರ ಗ್ರಾಮದ ಶಿವನ ದೇವಾಲಯವೊಂದರಲ್ಲಿ ಗ್ರಾಮಸ್ಥರ ಸಮ್ಮುಖದಲ್ಲಿ ಈ ವಿವಾಹ ಸಮಾರಂಭ ನಡೆಯಿತು. ಪತಿಯು ವಿವಾಹ ಸಮಾರಂಭ ಮತ್ತು ಸಾಂಪ್ರದಾಯಿಕ ಬೀಳ್ಕೊಡುಗೆಯಲ್ಲಿ ಭಾಗವಹಿಸಿದ್ದರು.

ಪತ್ರಕರ್ತರೊಂದಿಗೆ ಮಾತನಾಡಿದ ಬುದ್ಧಿರಾಮ್, ತಾವು 21 ವರ್ಷಗಳ ಹಿಂದೆ ಫೂಲ್‌ಮತಿ ಅವರನ್ನು ವಿವಾಹವಾಗಿದ್ದರೂ, ಅವರು ಇನ್ನು ಮುಂದೆ ತಮ್ಮೊಂದಿಗೆ ವಾಸಿಸಲು ಬಯಸುತ್ತಿರಲಿಲ್ಲ ಎಂದು ಹೇಳಿದರು.

“ಮನೆಯಲ್ಲಿ ನಿತ್ಯದ ಕಲಹದೊಂದಿಗೆ ಬದುಕಲು ನಾನು ಬಯಸುವುದಿಲ್ಲ. ಹಾಗಾಗಿ, ಆಕೆ ಯಾರೊಂದಿಗೆ ವಾಸಿಸಲು ಬಯಸಿದ್ದರೋ ಆ ವ್ಯಕ್ತಿಯೊಂದಿಗೆ ಆಕೆಯ ಮದುವೆ ಮಾಡಿಕೊಡಲು ನಾನು ನಿರ್ಧರಿಸಿದೆ,” ಎಂದು ಗಂಡ ಹೇಳಿದ್ದಾನೆ. ಈ ಘಟನೆಗೆ ಸಂಬಂಧಿಸಿದಂತೆ ಯಾವುದೇ ದೂರು ಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.