ಕಾರ್ಕಳ: ಹೊಸ ಮನೆ ವಿಚಾರದಲ್ಲಿ ಜಗಳ, ಮಗನ ಮೇಲೆ ಕತ್ತಿಯಿಂದ ಗಂಭೀರ ಹಲ್ಲೆ ಮಾಡಿದ ತಂದೆ

ಕಾರ್ಕಳ: ಹೊಸ ಮನೆ ವಿಚಾರದಲ್ಲಿ ನಡೆದ ಜಗಳದಿಂದ ತಂದೆಯೇ ಮಗನಿಗೆ ಕತ್ತಿಯಿಂದ ಕಡಿದು ಗಂಭೀರ ಗಾಯಗೊಳಿಸಿದ ಘಟನೆ ತೆಳ್ಳಾರ್‌ ದುರ್ಗಾ ಗ್ರಾಮದ ಪುಲ್ಲಾಟ್‌ನಲ್ಲಿ ಸೋಮವಾರ (ಸೆ.28) ರಾತ್ರಿ ನಡೆದಿದೆ.

Sponsored

ಮೂಲತಃ ಕೇರಳದವರಾದ ತೆಳ್ಳಾರ್‌ ದುರ್ಗಾ ಗ್ರಾಮದ ತ್ರೆಸಿಯಾಮ್‌ ಮತ್ತು ಮಥಾಯ್‌ ಅವರ ಮಗ ಚಾಲ್ಸ್‌ ಗಾಯಗೊಂಡ ವ್ಯಕ್ತಿ.

ಸೆ.28 ರಂದು ರಾತ್ರಿ 10 ರ ಸುಮಾರಿಗೆ ಹಳೆಯ ಮನೆಯಲ್ಲಿ ಹೊಸ ಮನೆಯನ್ನು ತನಗೆ ಬಿಟ್ಟು ಕೊಡುವಂತೆ ಚಾಲ್ಸ್‌ ಜಗಳವಾಡುತ್ತಿದ್ದ ಎನ್ನಲಾಗಿದೆ. ಈ ವೇಳೆ ಜಗಳ ಬಿಡಿಸಲು ಬಂದ ಮಥಾಯ್‌ ಅವರನ್ನು ಚಾಲ್ಸ್‌ ತಳ್ಳಿದ್ದು, ಆಯತಪ್ಪಿ ಕೆಳಗೆ ಬಿದ್ದಿದ್ದಾರೆ. ನಂತರ ಮಥಾಯ್‌ ಹೊಸ ಮನೆ ನಿರ್ಮಾಣದ ಶೆಡ್‌ ಬಳಿ ಕುಳಿತಿದ್ದು, ಅಲ್ಲಿಗೆ ಬಂದ ಚಾಲ್ಸ್‌ಗೆ ಮಥಾಯ್‌ ಅವರು ಕತ್ತಿಯಿಂದ ಕಡಿದಿದ್ದಾರೆ ಎನ್ನಲಾಗಿದೆ.

ಈ ಘಟನೆಯಲ್ಲಿ ಚಾಲ್ಸ್‌ ಕುತ್ತಿಗೆ, ಎದೆ ಭಾಗಕ್ಕೆ ತೀವ್ರ ಗಾಯವಾಗಿದೆ. ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.