ಸ್ನಾನದ ವಿಡಿಯೋ ಚಿತ್ರೀಕರಣ ಮಾಡಿ ಲೈಂಗಿಕ ಕ್ರಿಯೆಗೆ ಒತ್ತಾಯ; ಕಾಲೇಜು ವಿದ್ಯಾರ್ಥಿಯ ಹತ್ಯೆ ಮಾಡಿದ ದಂಪತಿ

ಸ್ನಾನ ಮಾಡುತ್ತಿದ್ದ ಸಂದರ್ಭದಲ್ಲಿ ವಿಡಿಯೋ ಮಾಡಿ ವಿವಾಹಿತ ಮಹಿಳೆಯನ್ನು ಬೆದರಿಸಿ ದೈಹಿಕ ಸಂಪರ್ಕಕ್ಕೆ ಒತ್ತಾಯಿಸುತ್ತಿದ್ದನೆಂಬ ಆರೋಪದ ಹಿನ್ನೆಲೆಯಲ್ಲಿ 20 ವರ್ಷದ ಕಾಲೇಜು ವಿದ್ಯಾರ್ಥಿಯನ್ನು ದಂಪತಿ ಕೊಲೆ ಮಾಡಿರುವ ಘಟನೆ ಗುಜರಾತ್‌ನ ಗಾಂಧಿನಗರ ಜಿಲ್ಲೆಯ ಕಲೋಲ್‌ ತಾಲೂಕಿನಲ್ಲಿ ನಡೆದಿದೆ.

Sponsored

ಹತ್ಯೆಗೀಡಾದ ಹಾರ್ದಿಕ್‌ ಎಂದು ಗುರುತಿಸಲಾಗಿದೆ. ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮಹಿಳೆ ಹಾಗೂ ಆಕೆಯ ಪತಿಯನ್ನು ಪೊಲೀಸರು ಬಂಧನ ಮಾಡಿದ್ದಾರೆ.

ಹಾರ್ದಿಕ್‌ ಆರೋಪಿಗಳ ಮನೆಯ ಸಮೀಪದಲ್ಲಿಯೇ ವಾಸಿಸುತ್ತಿದ್ದ. ಒಂದೂವರೆ ಎರಡು ತಿಂಗಳ ಹಿಂದೆ ಮಹಿಳೆ ಸ್ನಾನ ಮಾಡುತ್ತಿದ್ದ ದೃಶ್ಯವನ್ನು ಆತ ಗುಪ್ತವಾಗಿ ಚಿತ್ರೀಕರಣ ಮಾಡಿದ್ದ ಎನ್ನಲಾಗಿದೆ. ನಂತರ ಆ ವಿಡಿಯೋವನ್ನು ಬಹಿರಂಗ ಮಾಡುವುದಾಗಿ ಬೆದರಿಸಿ ಮಹಿಳೆಯ ಜೊತೆ ಬಲವಂತವಾಗಿ ಲೈಂಗಿಕ ಸಂಬಂಧ ಬೆಳೆಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಪಮಾನದ ಭಯದಿಂದ ಮಹಿಳೆ ಆತನ ಒತ್ತಡಕ್ಕೆ ಒಪ್ಪಿದ್ದಳು ಎನ್ನಲಾಗಿದೆ. ಮಹಿಳೆಯ ಪತಿ ಫ್ಯಾನ್‌ ದುರಸ್ತಿ ವಿದ್ಯುತ್‌ ವೈರಿಂಗ್‌ ಕೆಲಸ ಮಾಡುತ್ತಿದ್ದು, ಈ ದಂಪತಿಗೆ ಮೂವರು ಮಕ್ಕಳಿದ್ದಾರೆ. ಹಾರ್ದಿಕ್‌ ನಿರಂತರವಾಗಿ ಬೆದರಿಸಿ ಲೈಂಗಿಕವಾಗಿ ಶೋಷಿಸುತ್ತಿದ್ದ ಎಂದು ತನಿಖೆಯಲ್ಲಿ ತಿಳಿದು ಬಂದಿದೆ.

ಇದರ ಮಧ್ಯೆ ಹಾರ್ದಿಕ್‌ ಜೊತೆ ಪತ್ನಿ ಮೊಬೈಲ್‌ನಲ್ಲಿ ಮಾತನಾಡುತ್ತಿದ್ದುದನ್ನು ಪತಿ ಗಮನಿಸಿ ಇವರಿಬ್ಬರ ಮಧ್ಯೆ ಗಲಾಟೆ ನಡೆದಿದೆ. ಆಗ ಮಹಿಳೆ ತನ್ನ ಮೇಲೆ ನಡೆಸಿದ್ದ ಕಿರುಕುಳ ಕುರಿತು ಪತಿಗೆ ಹೇಳಿದ್ದಾಳೆ. ಆಕ್ರೋಶಗೊಂಡ ಪತಿ, ಹಾರ್ದಿಕ್‌ನನ್ನು ಕೊಲ್ಲಲು ಸಂಚು ರೂಪಿಸಿದ್ದು, ಅದಕ್ಕೆ ಪತ್ನಿ ಕೂಡಾ ಸಹಕರಿಸಿದ್ದಾಳೆ. ಜು.11 ರಂದು ಮಹಿಳೆ ಹಾರ್ದಿಕ್‌ಗೆ ಕರೆ ಮಾಡಿ ಮನೆಗೆ ಬರಲು ಹೇಳಿದ್ದಳು. ಪತಿ ಬೈಕ್‌ನಿಂದ ಮನೆಯಿಂದ ಹೊರಟು ಹೋದಂತೆ ನಾಟಕವಾಡಿದ್ದ. ಬೆಳಗ್ಗೆ ಸುಮಾರು 9.10 ರ ವೇಳೆಗೆ ಹಾರ್ದಿಕ್‌ ತನ್ನ ತಂದೆಗೆ ಕರೆ ಮಾಡಿ ಪರ್ಬತ್ಪುರ ಪ್ರದೇದಲ್ಲಿ ಜಮೀನು ನೋಡಲು ಹೋಗುವುದಾಗಿ ತಿಳಿಸಿದ್ದ.

ದಂಪತಿಯ ಮೂವರು ಮಕ್ಕಳು ಶಾಲೆಗೆ ಹೋಗಿದ್ದರು. ಮನೆಗೆ ಬಂದ ಹಾರ್ದಿಕ್‌ ಮಹಿಳೆಯ ಜೊತೆ ಮಾತನಾಡುತ್ತಿದ್ದ ವೇಳೆ, ಪತಿ ಮನೆಗೆ ಪ್ರವೇಶಿಸಿ ಹಾರ್ದಿಕ್‌ನ ಎದೆ ಮೇಲೆ ಕುಳಿತಿದ್ದ. ಪತ್ನಿ ಹಾರ್ದಿಕ್‌ನ ಕೈಗಳನ್ನು ಹಿಡಿದುಕೊಂಡಿದ್ದು. ನಂತರ ಸ್ಕಾರ್ಫ್‌ನಿಂದ ಉಸಿರುಗಟ್ಟಿಸಿ ಹತ್ಯೆ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಇದಾದ ನಂತರ ಫ್ಯಾನ್‌ನ ವಿದ್ಯುತ್‌ ಕೇಬಲ್‌ನಿಂದ ಮತ್ತೊಮ್ಮೆ ಕುತ್ತಿಗೆ ಬಿಗಿದು ಮೃತಪಟ್ಟಿರುವುದಾಗಿ ಖಚಿತಗೊಂಡ ಬಳಿಕ, ಶವವನ್ನು ಪ್ಲಾಸ್ಟಿಕ್‌ ಚೀಲದಲ್ಲಿ ತುಂಬಿ ಮನೆಗೆ ಬೀಗ ಹಾಕಿ ಬೈಕ್‌ನಲ್ಲಿ ಹೊರಟಿದ್ದಾರೆ. ನಂತರ ಶಾಲೆಯಿಂದ ಮಕ್ಕಳನ್ನು ಕರೆದುಕೊಂಡು ಮಹಿಳೆಯ ತಂದೆಯ ಮನೆಗೆ ಬಿಟ್ಟು ನಗರದಿಂದ ಪರಾರಿಯಾಗಲು ಸಿದ್ಧತೆ ಮಾಡಿದ್ದಾರೆ ಎನ್ನಲಾಗಿದೆ.

ಈ ಕುರಿತು ಹಾರ್ದಿಕ್‌ ತಂದೆ ರಮೇಶ್‌ಜಿ ಠಾಕೋರ್‌ ನೀಡಿದ ದೂರಿನ ಅನ್ವಯ ಕಲೋಲ್‌ ತಾಲ್ಲೂಕು ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಆರಂಭಿಸಿದರು. ಮರಣೋತ್ತರ ಪರೀಕ್ಷೆಯಲ್ಲಿ ಉಸಿರುಗಟ್ಟಿಸಿ ಕೊಲೆ ಮಾಡಿರುವುದು ದೃಢಪಟ್ಟಿದೆ. ತನಿಖೆ ವೇಳೆ ಸ್ನಾನದ ವಿಡಿಯೋ ಚಿತ್ರೀಕರಿಸಿ ಅದನ್ನು ಲೈಂಗಿಕ ಸಂಬಂಧಕ್ಕೆ ಬಳಸಿ ಬ್ಲ್ಯಾಕ್‌ಮೇಲ್‌ ಮಾಡುತ್ತಿರುವುದು ತಿಳಿದು ಬಂದಿದೆ.

ಕೊಲೆ ನಡೆದ ನಂತರ ಹಾರ್ದಿಕ್‌ನ ಮೊಬೈಲ್‌ ಫೋನನ್ನು ಪತಿ ಕೋಪದಲ್ಲಿ ಒಡೆದು ರಸ್ತೆ ಬದಿಗೆ ಎಸೆದಿದ್ದಾನೆ ಎನ್ನಲಾಗಿದೆ. ಕಲೋಲ್‌ ತಾಲೂಕು ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿಕೊಂಡು ದಂಪತಿಯನ್ನು ಬಂಧನ ಮಾಡಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.