ಬೆಳ್ತಂಗಡಿ: ಉಂಗುರ ಖರೀದಿಸುವ ನೆಪದಲ್ಲಿ ರೂ.4.40ಲಕ್ಷ ಮೌಲ್ಯದ ಚಿನ್ನದ ಬ್ರೇಸ್ಲೆಟ್ ಕದ್ದ ಖದೀಮರು
ಬೆಳ್ತಂಗಡಿ: ಚಿನ್ನದ ಉಂಗುರ ಖರೀದಿಸುವ ನೆಪದಲ್ಲಿ ಜ್ಯುವೆಲ್ಲರ್ ಮಳಿಗೆಗೆ ಬಂದ ಇಬ್ಬರು ಅಪರಿಚಿತ ಕಳ್ಳರು, ಮಾಲೀಕರ ಗಮನ ಬೇರೆಡೆಗೆ ಸೆಳೆದು ರೂ.4.40ಲಕ್ಷ ಮೌಲ್ಯದ ಚಿನ್ನದ ಬ್ರೇಸ್ಲೆಟ್ಗಳನ್ನು ಎಗರಿಸಿ ಪರಾರಿಯಾದ ಘಟನೆ ಬೆಳ್ತಂಗಡಿ ತಾಲೂಕಿನ ಮಡಂತ್ಯಾರಿನಲ್ಲಿ ನಡೆದಿದೆ.
Sponsoredಮಡಂತ್ಯಾರು ಕಾನ್ವೆಂಟ್ರೋಡ್ ನಿವಾಸಿ, ಸಾನಿಧ್ಯ ಜ್ಯುವೆಲ್ಲರೀಸ್ ಮಾಲೀಕ ರಾಜೇಶ್ (43) ಅವರು ಈ ಕುರಿತು ಪೂಂಜಾಲಕಟ್ಟೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದು, ಪ್ರಕರಣ ದಾಖಲಾಗಿದೆ. ನ.16 ರಂದು ಸಂಜೆ ರಾಜೇಶ್ ಅವರು ಮಡಂತ್ಯಾರಿನ ಆರ್.ಕೆ ಕಾಂಪ್ಲೆಕ್ಸ್ನಲ್ಲಿರುವ ತಮ್ಮ ʼಸಾನಿಧ್ಯ ಜ್ಯುವೆಲ್ಲರಿʼ ಶಾಪ್ನಲ್ಲಿದ್ದ ಸಂದರ್ಭದಲ್ಲಿ ಸಂಜೆ ಸುಮಾರು 6.25 ರಿಂದ 6.35 ರ ಮಧ್ಯಾವಧಿಯಲ್ಲಿ ಇಬ್ಬರು ಅಪರಿಚಿತ ವ್ಯಕ್ತಿಗಳು ಚಿನ್ನದ ಉಂಗುರ ಖರೀದಿಸುವ ನೆಪದಲ್ಲಿ ಅಂಗಡಿಗೆ ಬಂದಿದ್ದಾರೆ.
ಉಂಗುರ ನೋಡುವ ನೆಪ ಮಾಡುತ್ತಾ, ಅಂದಾಜು 35 ಗ್ರಾಂ ತೂಕದ 5 ರಿಂದ 6 ಚಿನ್ನದ ಬ್ರೇಸ್ಲೆಟ್ಗಳಿದ್ದ ಪ್ಲಾಸ್ಟಿಕ್ ಪ್ಯಾಕೆಟನ್ನು ಕೂಲಡೇ ಕದ್ದು ಅಲ್ಲಿಂದ ಕಾಲ್ಕಿತ್ತಿದ್ದಾರೆ. ಚಿನ್ನಾಭರಣ ಜೋಡಿ ಇಡುವ ಸಂದರ್ಭದಲ್ಲಿ ಬ್ರೇಸ್ಲೆಟ್ಗಳಿದ್ದ ಪ್ಯಾಕೆಟ್ ನಾಪತ್ತೆಯಾಗಿರುವುದು ರಾಜೇಶ್ ಗಮನಕ್ಕೆ ಬಂದಿದೆ. ಕೂಡಲೇ ಸಿಸಿಟಿವಿ ಪರಿಶೀಲನೆ ಮಾಡಿದಾಗ, ಉಂಗುರ ಖರೀದಿಸಲು ಬಂದಿದ್ದ ಇಬ್ಬರು ಅಪರಿಚಿತರೇ ಚಿನ್ನದ ಬ್ರೇಸ್ಲೆಟ್ಗಳನ್ನು ಕಳವು ಮಾಡಿ ಹೋಗಿರುವುದು ಕಂಡು ಬಂದಿದೆ.
ಈ ಕುರಿತು ಪೂಂಜಾಲಕಟ್ಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆರೋಪಿಗಳ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ.




