ಅಮೆರಿಕದಲ್ಲಿ ಹೆಚ್ಚುತ್ತಿರುವ ‘ಹಿಂದೂ ದ್ವೇಷ’

ದೀಪಾವಳಿ ಆಚರಣೆಯ ವೇಳೆ ತಿಲಕ ಧರಿಸಿದವರ ವಿರುದ್ಧ ಜನಾಂಗೀಯ ನಿಂದನೆ!

Sponsored

​ಅಮೆರಿಕದಲ್ಲಿ ಇತ್ತೀಚಿನ ದಿನಗಳಲ್ಲಿ ಹಿಂದೂಗಳ ಧಾರ್ಮಿಕ ಚಿಹ್ನೆಗಳು ಮತ್ತು ಆಚರಣೆಗಳನ್ನು ಗುರಿಯಾಗಿಸಿ ದ್ವೇಷ ಹಾಗೂ ಅಸಹಿಷ್ಣುತೆ ಹೆಚ್ಚುತ್ತಿರುವುದು ಆತಂಕಕಾರಿ ಬೆಳವಣಿಗೆಯಾಗಿದೆ. ಇದಕ್ಕೆ ಸಾಕ್ಷಿಯೆಂಬಂತೆ, ಸಿಯಾಟಲ್ ನಗರದಲ್ಲಿ ನಡೆದ ಸಾರ್ವಜನಿಕ ದೀಪಾವಳಿ ಆಚರಣೆಯ ಸಂದರ್ಭದಲ್ಲಿ ಬಲಪಂಥೀಯ ಕಾರ್ಯಕರ್ತರು ದಿಢೀರ್‌ ನುಗ್ಗಿ ಗೊಂದಲ ಸೃಷ್ಟಿಸಿರುವ ಘಟನೆ ವರದಿಯಾಗಿದೆ.
​
​ಅಮೆರಿಕದ ಸಿಯಾಟಲ್ ಸೆಂಟರ್‌ನಲ್ಲಿ ಹಿಂದೂ ಸಮುದಾಯದವರು ಸಡಗರದಿಂದ ದೀಪಾವಳಿ ಹಬ್ಬವನ್ನು ಆಚರಿಸುತ್ತಿದ್ದ ವೇಳೆ, ಬಲಪಂಥೀಯ ವಲಸಿಗ ವಿರೋಧಿ ಕಾರ್ಯಕರ್ತರ ಗುಂಪು ಅಲ್ಲಿಗೆ ನುಗ್ಗಿದೆ. ಸಣ್ಣ ಮಕ್ಕಳು ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ತೊಡಗಿದ್ದ ಸಂದರ್ಭದಲ್ಲೇ ಅಡ್ಡಿಪಡಿಸಿದ ಈ ಗುಂಪು, ಕೈಯಲ್ಲಿ “ದೇಶ ಬಿಟ್ಟು ತೊಲಗಿ” ಎಂದು ಬರೆದಿದ್ದ ಫಲಕಗಳನ್ನು ಹಿಡಿದು ಅಸಹ್ಯಕರ ಜನಾಂಗೀಯ ನಿಂದನೆಗಳನ್ನು ಕೂಗಿದೆ.
​ವಿಶೇಷವಾಗಿ ಹಣೆಯ ಮೇಲೆ ತಿಲಕ ಅಥವಾ ಬಿಂದಿ ಧರಿಸಿದ್ದ ಭಾರತೀಯ ಮೂಲದವರನ್ನು ಗುರಿಯಾಗಿಸಿ ಈ ನಿಂದನೆ ಮಾಡಲಾಗಿದೆ. ತಕ್ಷಣವೇ ಎಚ್ಚೆತ್ತುಕೊಂಡ ಸ್ಥಳದಲ್ಲಿದ್ದ ಭಾರತೀಯರು ಮತ್ತು ಸ್ಥಳೀಯರು ಇವರನ್ನು ತೀವ್ರವಾಗಿ ವಿರೋಧಿಸಿ, ಸಭಾಂಗಣದಿಂದ ಹೊರಹಾಕಿದ್ದಾರೆ.
​
​ ಅಮೆರಿಕದ ಅತಿರೇಕದ ಬಲಪಂಥೀಯ ಹಾಗೂ ವಲಸಿಗ ವಿರೋಧಿ ಕಾರ್ಯಕರ್ತರಾದ ಜೇಕ್ ಲ್ಯಾಂಗ್ ಮತ್ತು ಥಾಮಸ್ ಅಲೆನ್ ನೇತೃತ್ವದ ಗುಂಪು ಈ ಕೃತ್ಯವೆಸಗಿದೆ. ಜೇಕ್ ಲ್ಯಾಂಗ್ ಎಂಬಾತ ‘ವೈಟ್ ರಿಪ್ಲೇಸ್‌ಮೆಂಟ್’ ಎಂಬ ಗುಂಪನ್ನು ಮುನ್ನಡೆಸುತ್ತಾನೆ. ಈತ ಈ ಹಿಂದೆ ಜನವರಿ 6, 2021ರಂದು ಅಮೆರಿಕದ ಕ್ಯಾಪಿಟಲ್ ಹಿಲ್ ಮೇಲೆ ನಡೆದ ದಾಂಧಲೆ ಪ್ರಕರಣದಲ್ಲಿ ಭಾಗಿಯಾಗಿದ್ದ ಆರೋಪದ ಮೇಲೆ ನಾಲ್ಕು ವರ್ಷಗಳ ಕಾಲ ಜೈಲು ಶಿಕ್ಷೆ ಅನುಭವಿಸಿದ್ದ ವಿವಾದಾತ್ಮಕ ವ್ಯಕ್ತಿಯಾಗಿದ್ದಾನೆ.